ភ្នំពេញៈ រដ្ឋមន្ត្រីក្រសួងការពារជាតិ លោក ទៀ បាញ់ បានកោតសរសើរ ចំពោះយុទ្ធនាការចាក់វ៉ាក់សាំងបង្ការជំងឺកូវីដ ១៩ ដែលទទួលបាននូវលទ្ធផលល្អប្រសើរ ខណៈដែលចំនួនអ្នកចាក់វ៉ាក់សាំង សម្រាប់មនុស្សអាយុពី ៦ ឆ្នាំឡើងបានចំនួនជាង ៨៥% ហើយ ធៀបនឹងពលរដ្ឋ ១៦ លាននាក់ ប៉ុន្តែលោកនៅតែបន្តអំពាវនាវឱ្យប្រជាពលរដ្ឋការពារខ្លួនពីមេរោគកូវីដ ១៩ ដដែល។
លោក ទៀ បាញ់ បានសរសេរលើបណ្តាញសង្គមហ្វេសប៊ុករបស់លោកនាថ្ងៃទី ២០ តុលាថា៖ «ខ្ញុំសូមសម្តែងការកោតសរសើរចំពោះក្រុមប្រតិបត្តិយុទ្ធនាការចាក់វ៉ាក់សាំងកូវីដ ១៩ ដែលបានអនុវត្តភារកិច្ចចាក់វ៉ាក់សាំងកូវីដ ១៩ ជូនប្រជាពលរដ្ឋនៅក្នុងភូមិសាស្ត្ររាជធានីភ្នំពេញ និងតាមខេត្តនានាសម្រេចលទ្ធផលគួរជាទីមោទនៈ តាមការប្រគល់ភារកិច្ចរបស់រាជរដ្ឋាភិបាល»។ លោកបានបន្តអំពាវនាវឱ្យមានការយកចិត្តទុកដាក់ អនុវត្តវិធានការ៣កុំ ៣ការពារ ដើម្បីបង្កើតឱ្យមានភាពស៊ាំសហគមន៍រឹងមាំពិតប្រាកដ មួយយកឈ្នះសមរភូមិប្រយុទ្ធនឹងជំងឺកូវីដ ១៩ នេះ។
ជាមួយគ្នានេះដែរយុទ្ធនាការចាក់ដូសជំរុញនៃក្រុមការងារចាក់វ៉ាក់សាំងរបស់ក្រសួងការពារជាតិ ក្នុងរយៈពេល ៩ ថ្ងៃ នៃការចាប់ផ្តើមយុទ្ធនាការនេះបានចាក់ជូនប្រជាពលរដ្ឋក្នុងរាជធានីភ្នំពេញបានជិត ៣៧ ម៉ឺននាក់ ហើយក្នុងខណ្ឌចំនួន ៦ មាន ខណ្ឌមានជ័យ ដង្កោ កំបូល ពោធិ៍សែនជ័យ ឫស្សីកែវ ទួលគោក និងខណ្ឌសែនសុខ។
យោងតាមរបាយការណ៍បូកសរុបចាក់វ៉ាក់សាំងបង្ការជំងឺកូវីដ ១៩ របស់ក្រសួងការពារជាតិគិតត្រឹមថ្ងៃទី ១៩ ខែតុលា បានឱ្យដឹងថា ក្រុមការងារចាក់វ៉ាក់សាំងបានចាក់ជូនប្រជាពលរដ្ឋសរុបបានចំនួន ៣៦៨ ៩៩៣ នាក់ក្នុងនោះមានស្ត្រី ២០៩ ១៦០ នាក់។
ក្រុមការងារចាក់វ៉ាក់សាំងកូវីដ ១៩ ក្រសួងការពារជាតិបានចាប់ផ្តើមយុទ្ធនាការចាក់វ៉ាក់សាំងដូសជំរុញដល់ប្រជាពលរដ្ឋក្នុងរាជធានីភ្នំពេញកាលពីថ្ងៃទី ១១ តុលាកន្លងទៅនេះ។
លោក ឥត សារ៉ាត អគ្គមេបញ្ជាការរងនាយសេនាធិការចម្រុះកងយោធពលខេមរភូមិន្ទ និងជានាយកប្រតិបត្តិចាក់វ៉ាក់សាំងក្រសួងការពារជាតិកាលពីថ្ងៃទី ១៨ ខែតុលា ក្នុងពេលចុះពិនិត្យការចាក់វ៉ាក់សាំងនេះបានថ្លែងថា សម្រាប់រាជធានីភ្នំពេញ ក្រុមការងារនឹងបញ្ចប់ការចាក់ក្នុងរយៈពេល ២ សប្តាហ៍ ហើយក្រុមការងារនឹងបន្តយុទ្ធនាការចាក់វ៉ាក់សាំងដូសជំរុញនេះ នៅតាមខេត្តដែលនឹងចាប់ផ្តើមអនុវត្តនៅខែវិច្ឆិកាខាងមុខ។
ខេត្តដែលក្រុមការងារក្រសួងការពារជាតិនឹងចុះចាក់ដល់ប្រជាពលរដ្ឋទូទៅមាន ខេត្តតាកែវ ព្រះសីហនុ កោះកុង កំពង់ស្ពឺ ស្វាយរៀង សៀមរាប និងខេត្តបន្ទាយមានជ័យ។
ថ្លែងក្នុងសារពិសេសនៅថ្ងៃទី ១៩ តុលា លោកនាយករដ្ឋមន្ត្រី ហ៊ុន សែន បានអំពាវនាវទៅដល់ប្រជាពលរដ្ឋដែលបានចាក់វ៉ាក់សាំងកូវីដ ១៩ ដូសទី ១ និងទី ២ រួចហើយ ដល់ពេលដែលត្រូវចាក់ដូសទី ៣ ទៅតាមតំបន់ និងទីកន្លែងក្នុងរាជធានីភ្នំពេញត្រូវចាក់ឱ្យបានគ្រប់ៗគ្នាផងដែរ។
លោកមានប្រសាសន៍ថា៖ «វាជាគុណបុណ្យរបស់យើងដែលយើងមានវ៉ាក់សាំងគ្រប់គ្រាន់សម្រាប់ចាក់ជូនប្រជាពលរដ្ឋរបស់យើងតាមរយៈជំនួយភាគីជាមិត្ត ពិសេសសាធារណរដ្ឋប្រជាមានិតចិន សហរដ្ឋអាមេរិក អង់គ្លេស ជប៉ុន និងមជ្ឈមណ្ឌលកូវ៉ាក់ផងដែរ ប៉ុន្តែយើងក៏បានទិញដោយខ្លួនឯងក្នុងចំនួនដ៏ច្រើនផងដែរ»។
បើតាមរបាយការណ៍របស់ក្រសួងសុខាភិបាលគិតត្រឹមថ្ងៃទី ១៩ ខែ តុលា ឆ្នាំ ២០២១ ប្រជាពលរដ្ឋដែលមានអាយុចាប់ពី ១៨ ឆ្នាំឡើង ដែលបានចាក់វ៉ាក់សាំងរួចមានចំនួនជាង ៩,៩ លាននាក់ ឬស្មើនឹង ៩៩,៥៨% ធៀបជាមួយចំនួនប្រជាជនគោលដៅ ១០ លាននាក់។
សម្រាប់ក្រុមយុវវ័យអាយុពី ១២ ឆ្នាំ ទៅក្រោម ១៨ ឆ្នាំបានចំនួនជាង ១,៧ លាននាក់ ឬ ៩០,៤០% ធៀបជាមួយចំនួនប្រជាជនគោលដៅជិត ២ លាននាក់ និងលើកុមារអាយុពី ០៦ ឆ្នាំ ដល់ក្រោម ១២ ឆ្នាំចាក់បានចំនួនជាង ១,៨ លាននាក់ ឬ ៩៩,៤២% ធៀបជាមួយនឹងប្រជាជនគោលដៅជិត ១,៩ លាននាក់៕