.jpg)
ពលរដ្ឋនៅខេត្តកណ្ដាលដែលស្លាប់ដោយពស់ចឹកពីថ្ងៃ ១៩ តុលា។ រូបថត ហ្វេសប៊ុក
កណ្ដាល/បន្ទាយមានជ័យៈ មន្ត្រីសុខាភិបាលខេត្តកណ្ដាល និងអាជ្ញាធរខេត្តបន្ទាយមានជ័យបានអំពាវនាវឱ្យពលរដ្ឋប្រុងប្រយ័ត្នពីករណីពស់ចឹក ឬសត្វអាសិរពិសនានាក្នុងរដូវទឹកជំនន់ដែលអាចប៉ះពាល់ដល់អាយុជីវិត បន្ទាប់ពីមានពលរដ្ឋម្នាក់ស្លាប់ ដោយសារពស់ចឹកពេលទៅលើកឡុក ឬឧបករណ៍នេសាទនៅខេត្តកណ្តាល។
កាលពីថ្ងៃទី ១៩ ខែតុលាមានកសិករនៅខេត្តកណ្ដាលម្នាក់ត្រូវបានពស់ចឹក ពេលគាត់ទៅលើកឡុក ហើយបានឃើញពស់វែកជាប់ក្នុងឡុករបស់គាត់ក៏លូកដៃចាប់ តែត្រូវពស់នោះចឹកចំចង្អុលដៃ បណ្ដាលឱ្យស្លាប់ពេលនាំទៅព្យាបាល។
កសិកររងគ្រោះរូបនោះឈ្មោះ ស៊ន វ៉ាត ភេទប្រុស អាយុ ៥១ ឆ្នាំ ជនជាតិខ្មែរ នៅភូមិរាំងដេក ឃុំគគីរធំ ស្រុកកៀនស្វាយ ខេត្តកណ្ដាល។ គាត់បានស្លាប់បន្ទាប់ពីអ្នកភូមិបានឌុបគាត់ពីកន្លែងកើតហេតុទៅរកការព្យាបាល។ នេះបើតាមព័ត៌មានដែលបានដកស្រង់ប្រភពពីប៉ុស្ដិ៍នគរបាលគគីរធំ។
លោក គួយ ប៊ុនធឿន ប្រធានមន្ទីរសុខាភិបាលខេត្តកណ្តាលបានប្រាប់ ភ្នំពេញ ប៉ុស្តិ៍ នៅថ្ងៃទី ២០ តុលាថា បើទោះជាករណីពស់ចឹកបានថយចុះក្ដី ក៏ករណីទាំងនេះនៅតែកើតមានដោយសារពលរដ្ឋធ្វេសប្រហែស។
លោកបានបន្តថា រាល់រដូវទឹកឡើងគឺសត្វពស់ ឬសត្វអាសិរពិសនានា តែងចេញពីសម្បុកដែលពលរដ្ឋងាយជួបប្រទះ ដូច្នេះពលរដ្ឋត្រូវប្រុងប្រយ័ត្នដោយមិនត្រូវនៅជិត ឬចាប់វាទេ។
លោកថ្លែងថា៖ «ដោយសារតែរដូវនេះទឹកឡើង យើងបានផ្សព្វផ្សាយដល់បណ្តាមណ្ឌលសុខភាព មន្ទីរពេទ្យរដ្ឋទាំងអស់ត្រៀមជួយសង្គ្រោះ និងត្រៀមថ្នាំពស់ចឹកឱ្យបានគ្រប់គ្រាន់។
យើងក៏បន្តផ្សព្វផ្សាយទៅតាមមណ្ឌលសុខភាពបន្តទៀត ដើម្បីឱ្យពួកគាត់ប្រយ័ត្នខ្លួន...»។
ស្រដៀងគ្នានេះដែរ លោក ណង សំរ៉ាំង នាយប៉ុស្តិ៍ឃុំអូបីជាន់ ខេត្តបន្ទាយមានជ័យ បានប្រាប់ភ្នំពេញប៉ុស្តិ៍នៅថ្ងៃទី ២០ តុលាថា ក្នុងឃុំអូរបីជាន់ក៏មានការផ្សព្វផ្សាយពីវិធានការសុវត្ថិភាពក្នុងរដូវទឹកជំនន់នេះផងដែរ ជាពិសេសគឺបញ្ហាពស់ចឹក និងសត្វអាសិរពិស។
លោកបន្តថា ដោយសារបញ្ហាទឹកជំនន់ក្នុងខេត្ត បណ្តាលឱ្យមានសត្វអាសិរពិសជាច្រើនដូចជា ពស់ ក្អែប ខ្ទួយ តែងបំផ្លាស់ទីដោយគេចចេញពីទឹកទៅរកទីទួល។ លោកថា បញ្ហានេះអាជ្ញាធរតែងចុះអប់រំដល់ពលរដ្ឋក្នុងមូលដ្ឋានជាប្រចាំ ដើម្បីឱ្យមានការប្រុងប្រយ័ត្ន ព្រោះមូលដ្ឋានរបស់លោកគឺតែងតែមានទឹកលិចលង់គ្រប់រដូវ។
លោកបានបញ្ជាក់ថា៖ «ពលរដ្ឋដែលរស់នៅជិតកន្លែងទឹកលិចទឹកអីហ្នឹងសូមថែរក្សាសុខភាពគាត់ផង និងធ្វើអនាម័យជាប្រចាំ ព្រោះយើងនៅលើអូរ ដែលមានភ្លៀង ឬទឹកហូរមកពីថៃអី គឺប្រឈមនឹងទឹកណាស់។ ដល់យើងជួបប្រទះលិចញឹកញាប់អ៊ីចឹង ពលរដ្ឋក៏គាត់ប្រុងប្រយ័ត្នខ្លាំងដែរ ហើយរដូវទឹកជំនន់ឆ្នាំនេះក្នុងឃុំយើងមិនទាន់មានករណីស្លាប់ ដោយសត្វអាសិរពិសហ្នឹងទេ តែយើងចេះបន្តឱ្យពួកគាត់ប្រុងប្រយ័ត្ន»៕
