ភ្នំពេញៈ ក្រសួងសុខាភិបាលបានប្រកាសនៅថ្ងៃទី ២១ ខែ តុលា ឆ្នាំ ២០២១ នេះថា មនុស្សចំនួន ១១ នាក់បន្ថែមទៀតបានស្លាប់ ដោយសារជំងឺកូវីដ ១៩ ក្នុងនោះមាន ៧នាក់ មិនបានចាក់វ៉ាក់សាំង រីឯអ្នកឆ្លងថ្មីរកឃើញជាង ១០០ នាក់ និងអ្នកជាសះស្បើយមានជាង ៣០០ នាក់។
សេចក្តីប្រកាសបានបញ្ជាក់ថា ក្រសួងបានរកឃើញអ្នកឆ្លងវីរុសកូវីដ ១៩ បន្ថែមទៀតចំនួន ១៥១ (PCR) នាក់ និងអ្នកជាសះស្បើយចំនួន ៣៦៦ នាក់ ក្នុងនោះមានករណីឆ្លងសហគមន៍ ១៣០ នាក់ និងអ្នកដំណើរពីបរទេសចំនួន ២១ នាក់។
គិតត្រឹមព្រឹកថ្ងៃទី ២១ ខែ តុលា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ សរុបចំនួន ១១៧ ៣៥២ នាក់ អ្នកជាសះស្បើយសរុបចំនួន ១១២ ០៥៦ នាក់ និងអ្នកស្លាប់មានរហូតដល់ ២ ៧០៤ នាក់៕