.jpg)
អ្នកជំនាញពាក់ព័ន្ធចុះពិនិត្យទីតាំងគម្រោងអង្គការ GIZ នៅខេត្តឧត្តរមានជ័យកាលពីខែមិថុនា។ រូបថត GIZ
ភ្នំពេញៈ អង្គការ GIZ នៅថ្ងៃទី ២០ តុលាបានដាក់ឱ្យដំណើរការគម្រោង «ពង្រឹងប្រព័ន្ធកសិកម្មបន្សាំទៅនឹងការប្រែប្រួលអាកាសធាតុនៅក្នុងប្រទេសកម្ពុជា និងប្រទេសវៀតណាម (CRAS)» ដើម្បីពង្រឹងភាពធន់របស់ក្រុមប្រជាជនក្រីក្រចំពោះការប្រែប្រួលអាកាសធាតុនៅក្នុងប្រទេសទាំង ២ សម្រាប់ខ្សែចង្វាក់តម្លៃ។
គម្រោង CRAS លើកទឹកចិត្តឱ្យមានការបង្កើតថ្មីលើការអនុវត្តផ្នែកកសិកម្មដំណោះស្រាយផ្នែកកសិកម្មការតភ្ជាប់ខ្សែចង្វាក់ផ្គត់ផ្គង់ និងសេវាកម្មអាជីវកម្ម ជាពិសេសគិតគូរអំពីការកាត់បន្ថយផលប៉ះពាល់ពីជំងឺកូវីដ ១៩។
GIZ បញ្ជាក់ក្នុងសេចក្តីជូនដំណឹងថា កសិកម្មគឺជាប្រភពការងារធំបំផុតមួយ នៅក្នុងប្រទេសកម្ពុជា និងវៀតណាម។ ប្រជាជនជាង ៧០ ភាគរយ ផលិតទំនិញកសិកម្មដោយផ្ទាល់ ឬដោយប្រយោល។ ការបរាជ័យក្នុងការបង្កបង្កើនផល ដោយសារគ្រោះរាំងស្ងួតនៅរដូវប្រាំង និងការជន់លិចនៅរដូវវស្សាបង្កបញ្ហាធំដល់អ្នកផលិត។
គម្រោងនេះសហការជាមួយក្រសួងកសិកម្ម រុក្ខាប្រមាញ់ និងនេសាទនៅកម្ពុជា និងក្រសួងកសិកម្ម និងអភិវឌ្ឍន៍ជនបទនៅប្រទេសវៀតណាម និងមានគោលដៅគាំទ្រដល់តួអង្គខ្សែចង្វាក់តម្លៃ ជាពិសេសកសិករដាំដំឡូងមី និងស្វាយចន្ទីខ្នាតតូចនៅកម្ពុជាក៏ដូចជាកសិករដាំកាហ្វេនៅវៀតណាម។
គម្រោងនេះក៏សហការជាមួយសាកលវិទ្យាល័យភូមិន្ទកសិកម្មនៅកម្ពុជា ដែលនឹងបង្កើតប្រព័ន្ធឌីជីថលក្នុងការគ្រប់គ្រងចំណេះដឹងកសិកម្ម។
លោក Günter Riethmacher តំណាងប្រចាំប្រទេសនៃអង្គការ GIZ បានថ្លែងក្នុងសិក្ខាសាលាដាក់ឱ្យប្រើប្រាស់គម្រោងនេះកាលពីថ្ងៃទី ២០ តុលាថា នៅក្នុងប្រទេសកម្ពុជា ប្រជាជនភាគច្រើនជាពិសេសអ្នកដែលរស់នៅតំបន់ជនបទជួបប្រទះផលប៉ះពាល់ផ្ទាល់ពីគ្រោះរាំងស្ងួតទឹកជំនន់ការប្រែប្រួលខ្លាំងនៃសីតុណ្ហភាព និងបញ្ហាប្រឈមនានា។
លោកថ្លែងថា គោលដៅចម្បងរបស់គម្រោងនេះគឺដើម្បីពង្រឹងភាពធន់អាកាសធាតុដល់ក្រុមប្រជាជននៅជនបទដែលងាយរងគ្រោះដើម្បីទប់ទល់នឹងផលប៉ះពាល់នៃបរិយាកាសប្រែប្រួលហើយការលើកយកបញ្ហាចម្បងនៃភាពធន់នឹងអាកាសធាតុទៅកាន់ថ្នាក់ជាតិ និងថ្នាក់តំបន់គឺពិតជាមានសារៈសំខាន់ណាស់។
លោក Günter Riethmacher បានថ្លែងថា៖ «ក្រុមការងារ GIZ របស់យើង ដែល មានចំនួនតិចនេះមិនអាចសម្រេចគោលដៅបានតែឯកឯងនោះទេ ដូច្នេះហើយយើងសូមអរគុណចំពោះអ្នកទាំងអស់គ្នាដែលបានរួមកម្លាំងជាមួយយើងដើម្បីបន្តផលប្រយោជន៍រួមរបស់យើង។ មានតែការសហការគ្នាទេ ទើបយើងអាចបង្កើតឱ្យមានផលវិជ្ជមានដែលផ្តល់អត្ថប្រយោជន៍ដល់អ្នកដែលមានតម្រូវការ»។
លោក ម៉ាក់ សឿន អគ្គនាយករងនៃអគ្គនាយកដ្ឋានកសិកម្មនៃក្រសួងកសិកម្ម ថ្លែងក្នុងសិក្ខាសាលានេះថា គម្រោង CRAS នេះ មានសារៈសំខាន់ណាស់ ក្នុងការផ្តល់ឱកាសដល់ក្រសួងរបស់លោកក្នុងការកែលម្អការផលិត កែច្នៃ និងទីផ្សារគ្រាប់ស្វាយចន្ទី និងដំឡូងមីសម្រាប់ខ្សែចង្វាក់តម្លៃនៅកម្ពុជា។
លោកបានថ្លែងថា៖ «ខ្ញុំសូមស្នើតួអង្គពាក់ព័ន្ធទាំងអស់ដូចជាវិស័យសាធារណៈ មន្ទីរកសិកម្មក្នុងខេត្តទាំង ២ វិស័យឯកជន កសិករខ្នាតតូចដែលជាអ្នកផលិតក៏ដូចជា សហគ្រាសធុនតូច និងមធ្យមចូលរួមក្នុងគម្រោងនេះ»។
លោក ម៉ាក់ សឿន ថ្លែងថា នេះគឺជាឱកាសល្អនៅពេលដែលគម្រោងនេះត្រូវបានអនុវត្ត ហើយលោកជំរុញឱ្យដៃគូ និងអ្នកពាក់ព័ន្ធដទៃទៀតដែលចាប់អារម្មណ៍អនុវត្តគម្រោងនេះដាក់សំណើទៅក្រុមការងារគម្រោងដើម្បីទទួលបានការពិចារណា និងទទួលបានធាតុចូលសម្រាប់ចូលរួមអនុវត្តគម្រោងនេះ។
លោកថ្លែងថា៖ «ខ្ញុំសូមស្នើក្រុមការងារគម្រោង ឬដៃគូប្រសិនបើត្រូវការការកសាងសមត្ថភាពទាក់ទងនឹងការកែលម្អគុណភាព និងសុវត្ថិភាពការផលិត ឬកែច្នៃគ្រាប់ស្វាយចន្ទី និងដំឡូងមី ឬដើម្បីធ្វើឱ្យប្រសើរឡើងនូវការសម្រួលពាណិជ្ជកម្ម នាយកដ្ឋានបច្ចេកទេសនៃអគ្គនាយកដ្ឋានកសិកម្មអាចធ្វើសំណើក្នុងការពង្រឹងសមត្ថភាពទាំងនេះបាន»៕
