ភ្នំពេញៈ មន្ត្រីជំនាញបច្ចេកទេសនៃក្រសួងសាធារណការ និងដឹកជញ្ជូនបន្តពិនិត្យសេចក្តីព្រាងច្បាប់ស្តីពីទឹកកខ្វក់ និងប្រព័ន្ធលូ ខណៈដែលបញ្ហាទឹកកខ្វក់ និងប្រព័ន្ធលូ កំពុងក្លាយជាហានិភ័យ និងបង្កភាពស្មុគស្មាញដល់សុខភាពសាធារណៈ។
កាលពីថ្ងៃទី ១៩ តុលា ថ្នាក់ដឹកនាំក្រសួងសាធារណការ និងមន្ត្រីជំនាញបច្ចេកទេសពាក់ព័ន្ធជាច្រើនរូបបានបន្តពិភាក្សាលើសេចក្តីព្រាងច្បាប់ស្តីពីទឹកកខ្វក់ និងប្រព័ន្ធលូ តាមប្រព័ន្ធវីដេអូពីចម្ងាយ ដើម្បីរិះរកនីតិវិធីពន្លឿនការរៀបចំសេចក្តីព្រាងច្បាប់នេះ ឱ្យមានសម្ទុះទៅមុខដោយរលូន ឆាប់លេចចេញរូបរាងប្រកបដោយភាពស៊ីចង្វាក់។
តាមទំព័រហ្វេសប៊ុករបស់ក្រសួងសាធារណការបានឱ្យដឹងថា បច្ចុប្បន្ននេះក្រសួង កំពុងស្ថិតក្នុងដំណាក់កាលរៀបចំសេចក្តីព្រាងច្បាប់ស្តីពីទឹកកខ្វក់ និងប្រព័ន្ធលូនេះជាលក្ខណៈផ្ទៃក្នុង ដោយចាប់ផ្តើមជជែកពិភាក្សានៅក្នុងក្រុមបច្ចេកទេសក្នុងក្រសួង ក្រោមកិច្ចសហការល្អពីទីភ្នាក់ងារសហប្រតិបត្តិការអន្តរជាតិជប៉ុន (JICA) ហើយបន្ទាប់មកនឹងបន្តរៀបចំប្រជុំ និងទទួលធាតុចូលពីបណ្តាក្រសួងស្ថាប័នពាក់ព័ន្ធផ្សេងទៀត។
ក្រសួងបានបញ្ជាក់ថា៖ «សេចក្តីព្រាងច្បាប់នេះនឹងត្រូវរៀបចំធ្វើយ៉ាងណា ឱ្យមានលក្ខណៈអាចទទួលយកបានពីគ្រប់ភាគីពាក់ព័ន្ធទាំងអស់ និងមានលក្ខណៈគ្រប់ជ្រុងជ្រោយ ដូចបណ្តាប្រទេសអភិវឌ្ឍន៍មួយចំនួន ដើម្បីគ្រប់គ្រងប្រព័ន្ធទឹកកខ្វក់ និងប្រព័ន្ធលូឱ្យបានល្អប្រសើរ ដើម្បីសុខុមាលភាពប្រជាពលរដ្ឋកម្ពុជា»។
លោក ប៉ាល់ ចន្ទតារា អ្នកនាំពាក្យក្រសួងសាធារណការ ដែលបានដឹកនាំកិច្ចប្រជុំនេះបានប្រាប់ភ្នំពេញប៉ុស្តិ៍នៅថ្ងៃទី ២០ តុលាថា មន្ត្រីក្រសួង កំពុងធ្វើការយ៉ាងយកចិត្តទុកដាក់ ដើម្បីប្រមូលធាតុចូលហើយធ្វើយ៉ាងណាជំរុញសេចក្តីព្រាងច្បាប់នេះឱ្យឆាប់ចប់ ឈានទៅរកការពិភាក្សាក្នុងដំណាក់កាលអន្តរក្រសួង។
ដោយសារតែច្បាប់នេះថ្មីហើយបញ្ហាទឹកកខ្វក់ និងប្រព័ន្ធលូនៅកម្ពុជាកំពុងជាហានិភ័យ និងបង្កភាពស្មុគស្មាញដល់សុខភាពសាធារណៈ ដូច្នេះក្រសួងសាធារណការត្រូវតែធ្វើយ៉ាងណា ដើម្បីធានាថា ច្បាប់នេះចេញហើយ មានប្រសិទ្ធភាព និង អាចដោះស្រាយបញ្ហាដែលកម្ពុជាកំពុងជួបប្រទះទាក់ទងនឹងបញ្ហាទឹកកខ្វក់ និងប្រព័ន្ធលូ។
លោកបញ្ជាក់ថា៖ «នៅពេលយើងតាក់តែងច្បាប់ក្នុងដំណាក់កាលក្រុមបច្ចេកទេសនេះទើបយើងអាចនឹងថា ច្បាប់នេះ មានប៉ុន្មានមាត្រា និងមានប៉ុន្មានជំពូកឱ្យច្បាស់។ ដូច្នេះ បានយើងខំពន្លឿនមន្ត្រីបច្ចេកទេសឱ្យបានលឿនក្នុងការបញ្ចប់ឱ្យបានចុងឆ្នាំនេះ»។
បើតាមលោក ចន្ទតារា ដោយសារតែការរីកចម្រើននៃទីក្រុងបញ្ហាទឹកកខ្វក់កំពុងប្រឈមខ្លាំងហើយមានការកើនឡើងនូវទឹកកខ្វក់ ដែលបានបង្ហូរចូលប្រភពទឹកដល់ទៅ ១០ ដង បើប្រៀបធៀបនឹងពេលដែលទីក្រុងមិនទាន់មានការរីកចម្រើន។
លោក ហែម ឧត្តម អ្នកជំនាញផ្នែកបរិស្ថានលើកឡើងថា បច្ចុប្បន្នប្រព័ន្ធគ្រប់គ្រងទឹកកខ្វក់ និងប្រព័ន្ធលូដែលកម្ពុជាបន្តប្រើប្រាស់ គឺត្រូវបានបន្សល់ទុកតាំងពីសម័យបារាំងមកម្ល៉េះហើយការធ្វើឱ្យប្រសើរឡើងនូវប្រព័ន្ធទាំងនោះគឺតិចតួចបំផុត។
លោកសង្ឃឹមថា នៅពេលច្បាប់នេះចេញជាធរមាន សមត្ថកិច្ចក៏នឹងបែងចែងការគ្រប់គ្រងពីថ្នាក់ក្រោមដល់ថា្នក់លើ ជាពិសេសក្រសួងមានសមត្ថកិច្ចក្នុងការគ្រប់គ្រងបញ្ហានេះឱ្យបានដាច់ស្រេចចៀសវាងមានការប្រទាំងប្រទើសគ្នា ដែលធ្វើឱ្យបញ្ហាទឹកកខ្វក់ និងប្រព័ន្ធលូនេះ បន្តមានភាពស្មុគស្មាញបន្តទៀត។
លោកបញ្ជាក់ថា៖ «នៅពេលមិនមានការគ្រប់គ្រងបញ្ហាទឹកកខ្វក់ ឬប្រព័ន្ធលូនេះ គឺប៉ះពាល់ធ្ងន់ធ្ងរដល់បរិស្ថាន»៕