ភ្នំពេញៈ រដ្ឋមន្ដ្រីក្រសួងមហាផ្ទៃ លោក ស ខេង បានណែនាំក្រសួង-ស្ថាប័នពាក់ព័ន្ធត្រូវពន្លឿនការផ្ទេរទ្រព្យសម្បត្តិដែលពាក់ព័ន្ធនឹងមុខងារដែលត្រូវផ្ទេរទៅឱ្យរដ្ឋបាលថ្នាក់ក្រោមជាតិ ដើម្បីឱ្យរដ្ឋបាលថ្នាក់ក្រោមជាតិ មានការទទួលខុសត្រូវច្បាស់លាល់ក្នុងការគ្របគ្រង់ចាត់ចែង និងប្រើប្រាស់ទ្រព្យសម្បត្តិទាំងនោះសម្រាប់អនុវត្តមុខងារ ដែលបានផ្ទេរឱ្យមានប្រសិទ្ធភាព។
លោក ស ខេង ដែលក៏ជាឧបនាយករដ្ឋមន្ត្រី និងជាប្រធានគណៈកម្មាធិការជាតិ សម្រាប់ការអភិវឌ្ឍ តាមបែបប្រជាធិបតេយ្យ នៅថ្នាក់ក្រោមជាតិ (គជអប)បានណែនាំបែបនេះ ក្នុងពេលធ្វើជាអធិបតីដឹកនាំកិច្ចប្រជុំលើកទី១៩ របស់ គ.ជ.អ.ប.នាថ្ងៃទី ២១ តុលា ដោយមានការចូលរួមពីរដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រីក្រសួង-ស្ថាប័នពាក់ព័ន្ធ សមាគមក្រុមប្រឹក្សា និងអភិបាល រាជធានី-ខេត្ត សរុបប្រមាណជាង ១០០ នាក់។
លោក ស ខេង ក៏បានថ្លែងអំណរគុណនិងវាយតម្លៃខ្ពស់ចំពោះសមាជិក សមាជិកាដែលបានគាំទ្រនិងចូលរួមក្នុងកិច្ចដំណើរការកំណែទម្រង់វិមជ្ឈការនិងវិសហមជ្ឈការដ៏មានសារៈសំខាន់នេះតាមតួនាទីនិងភាពទទួលខុសត្រូវរៀងៗខ្លួន។
លោកបន្តថា ទោះបីប្រទេសកម្ពុជានិងបណ្ដាប្រទេសនានាលើសកលលោកបាននិងកំពុងជួបស្ថានភាពដ៏លំបាកដោយសារឆ្លងរាលដាលនៃជំងឺកូវីដ ១៩ តាំងពីដើមឆ្នាំ ២០២០ មកក្តី ក៏ប្រទេសទាំងអស់បន្ដរួមសហការគ្នារៀបចំនិងអនុវត្តកិច្ចការជាអាទិភាព ដើម្បីធានាដល់ការការពារទប់ស្កាត់ការឆ្លងរាលដាលជំងឺកូវីដ ១៩ នេះ។ ជាមួយគ្នានេះរក្សាបាននូវនិរន្ដរភាពនៃការបំពេញការងារតាមវិស័យជំនាញនានាដោយផ្សារភ្ជាប់ជាមួយនឹងការជំរុញកិច្ចដំណើរការកំណែទម្រង់នានា។
លោកថ្លែងថា៖ «ការកោះប្រជុំលើកទី១៩ របស់ គ.ជ.អ.ប. នាពេលព្រឹកនេះ គឺក្នុងគោលបំណងពិនិត្យឡើងវិញនូវវឌ្ឍភាពនិងបញ្ហាប្រឈមនានានៃការអនុវត្តកម្មវិធីកំណែទម្រង់វិមជ្ឈការនិងវិសហមជ្ឈការក្នុងអំឡុងឆ្នាំ ២០២០ និងក្នុងឆមាសទី១ ឆ្នាំ ២០២១។ ជាពិសេសការពិនិត្យលើសេចក្ដីព្រាងឯកសារកម្មវិធីជាតិ សម្រាប់ការអភិវឌ្ឍន៍តាមបែបប្រជាធិបតេយ្យ នៅថ្នាក់ក្រោមជាតិដំណាក់កាលទី២ ដែលគ្រោងដាក់ជូនប្រមុខរាជរដ្ឋាភិបាលកម្ពុជាដើម្បីពិនិត្យនិងសម្រេចនាដើមខែវិច្ឆិកាខាងមុខនេះ»។
លោក ស ខេង បន្ថែមថា ពាក់ព័ន្ធនឹងសេចក្ដីណែនាំអំពីគោលការណ៍បែបបទនិងនីតីវិធីគ្រប់គ្រងបុគ្គលិករដ្ឋបាលថ្នាក់ក្រោមជាតិ លោកស្នើដល់ក្រសួងមុខងារសាធារណៈពិនិត្យកែសម្រួលនិងដាក់ចេញជាផ្លូវការនូវសេចក្ដីណែនាំផ្អែកតាមស្មារតីនៃកិច្ចប្រជុំនិងត្រូវបន្ដរៀបចំផ្សព្វផ្សាយឱ្យបានទូលំទូលាយ។
លោកណែនាំដល់ក្រសួង-ស្ថាប័នពាក់ព័ន្ធត្រូវបន្ដគាំទ្រ និងបណ្ដុះបណ្ដាលដល់មន្ដ្រីរដ្ឋបាលថ្នាក់ក្រោមជាតិ ដើម្បីឱ្យរដ្ឋបាលថ្នាក់ក្រោមជាតិអាចបំពេញការងាររបស់ខ្លួនស្របតាមរចនាសម្ព័ន្ធ និងប្រព័ន្ធមុខងារថ្មីនានាដែលផ្ទេរទៅឱ្យ ត្រូវអនុវត្តឱ្យមានប្រសិទ្ធភាពខ្ពស់។
លោក ស ខេង ថ្លែងថា៖ «ក្រសួង-ស្ថាប័នពាក់ព័ន្ធត្រូវពន្លឿនការផ្ទេរទ្រព្យសម្បត្តិដែលពាក់ព័ន្ធនឹងមុខងារដែលបានផ្ទេរទៅឱ្យរដ្ឋបាលថ្នាក់ក្រោមជាតិ ដើម្បីឱ្យរដ្ឋបាលថ្នាក់ក្រោមជាតិមានការទទួលខុសត្រូវច្បាស់លាល់ក្នុងការគ្រប់គ្រងចាត់ចែងនិងប្រើប្រាស់ទ្រព្យសម្បត្តិទាំងនោះសម្រាប់អនុវត្តមុខងារដែលបានផ្ទេរឱ្យមានប្រសិទ្ធភាព»។
លោក ចាន់ សុធា អនុប្រធានលេខាធិការដ្ឋាន គ.ជ.អ.ប. បានរាយការណ៍សង្ខេបស្ដីពីវឌ្ឍនភាព និងបញ្ហាប្រឈម នៃការអនុវត្តកម្មវិធីកំណែទម្រង់វិមជ្ឈការនិងវិសហមជ្ឈការសម្រាប់ឆ្នាំ ២០២០ និងឆមាសទី១ ឆ្នាំ ២០២១ ថា សកម្មភាពជាអាទិភាពសំខាន់ៗដែលអនុវត្តទទួលបាននាពេលកន្លងទៅរួមមានការកែសម្រួលអនុគណៈកម្មាធិការគ.ជ.អ.ប.និងក្រុមការងារបច្ចេកទេសនានា។ ការរៀបចំឯកសារទស្សនទានសម្រាប់ការរៀបចំតាត់តែងកម្មវិធីជាតិទី២ ការរៀបចំសេចក្ដីព្រាងកម្មវិធីជាតិដំណាក់កាលទី២ (២០២១-២០៣០)។ ការរៀបចំកម្មវិធីការងាររយៈពេល ៥ ឆ្នាំ (២០២១-២០២៥) សម្រាប់ Green Climate Fund ដើម្បីផ្ដល់មូលនិធិគាំទ្រដល់គម្រោងបន្សាំទៅនឹងការប្រែប្រួលអាកាសធាតុការសម្របសម្រួលតាមដានជាដើម។
ចំណែកលោក ង៉ាន់ ចំរើន ប្រធានលេខាធិការដ្ឋាន គ.ជ.អ.ប. ក៏បានធ្វើសេចក្ដីរាយការណ៍អំពីការពិនិត្យពិភាក្សាលើសេចក្ដីព្រាងឯកសារកម្មវិធីជាតិដំណាក់កាលទី២ (២០២១-២០៣០) ថា ប្រជាពលរដ្ឋទទួលបានសេវានិងផលប្រយោជន៍ពីការអភិវឌ្ឍដែលផ្ដល់ដោយរដ្ឋបាលថ្នាក់ក្រោមជាតិប្រកបដោយបរិយាប័ន្ននិងសមធម៌សង្គម ព្រមទាំងរួមចំណែកសម្រេចបានគោលបំណងប្រែក្លាយកម្ពុជាឱ្យទៅជាប្រទេសដែលមានចំណូលមធ្យមកម្រិតខ្ពស់ឆ្នាំ ២០៣០។
លោកបានបន្ដថា៖ «ជាពិសេសនោះលើកកម្ពស់ការផ្ដល់សេវានិងការអភិវឌ្ឍប្រកបដោយប្រជាធិបតេយ្យបរិយាប័ន្នសមធម៌និងយុត្តិធម៌តាមរយៈការធ្វើទំនើបកម្មប្រព័ន្ធអភិបាលកិច្ចថ្នាក់ក្រោមជាតិនិងការកែលម្អដំណើរការផ្ដល់សេវា ដើម្បីរួមចំណែកក្នុងការលុបបំបាត់ភាពក្រីក្រនិងលើកកម្ពស់គុណភាពជីវភាពរបស់ប្រជាជនឱ្យកាន់តែប្រសើរឡើង»។
ពាក់ព័ន្ធឯកសារកម្មវិធីជាតិដំណាក់កាលទី២ លោក ស ខេង ស្នើលេខាធិការដ្ឋាន គ.ជ.អ.ប. ពិនិត្យកែសម្រួលនិងរៀបចំបែបបទដើម្បីដាក់ឯកសារកម្មវិធីជាតិដំណាក់កាលទី២ នេះជូនប្រមុខរាជរដ្ឋាភិបាលកម្ពុជាពិនិត្យនិងសម្រេចនាដើមខែវិច្ឆិកា ឆ្នាំ ២០២១ ខាងមុខ ហើយត្រូវបន្ដសម្របសម្រួលក្នុងការរៀបចំផែនការអនុវត្ត ៥ ឆ្នាំលើកទី១ នៃកម្មវិធីជាតិដំណាក់កាលទី២នេះឱ្យបានឆាប់៕