.jpg)
ឪពុក-ម្ដាយ នាំកូនទៅព្យាបាលនៅមន្ទីរពេទ្យគន្ធបុប្ផាកម្ពុជា។ ហុង មិនា
ភ្នំពេញៈ មូលនិធិគន្ធបុប្ផាកម្ពុជា ប្រកាសនៅថ្ងៃទី ២១ ខែតុលានេះថា ក្នុងត្រីមាសទី៣ ឆ្នាំ ២០២១ នេះ មូលនិធិបានទទួលថវិកាបរិច្ចាគ ទាំងប្រាក់រៀល និងដុល្លារ សរុបចំនួនជាង ១ ៧១២ ៨៨១ ដុល្លារសហរដ្ឋអាមេរិកពីសប្បុរសជនចំនួន ២៤ ០៣៩ នាក់។
មូលនិធិគន្ធបុប្ផាកម្ពុជាបានថ្លែងអំណរគុណយ៉ាងជ្រាលជ្រៅ ជូនសប្បុរសជនទាំងអស់ ដែលតែងតែផ្តល់នូវអំណោយថវិកា និងផ្តល់ឱ្យគ្រួសារកុមារ នូវអំណោយជាក្តីសង្ឃឹមតាមរយៈការគាំទ្រ និងចូលរួមបរិច្ចាគជូន មូលនិធិគន្ធបុប្ផាកម្ពុជា តាមរយៈ មធ្យោបាយបរិច្ចាគ ដោយឥតគិតថ្លៃសេវា ជាមួយបណ្តាធនាគារដៃគូ។
មូលនិធិនេះបញ្ជាក់ជា មហាជនដែលមានបំណងចង់ចូលរួមជួយអាចបរិច្ចាកតាមរយៈ ធនាគារ Canadia ធនាគារ ACLEDA ធនាគារ ABA ធនាគារ Chip Mong ធនាគារ Wing ធនាគារ Sathapana ធនាគារ J Trust Royal និងភ្នាក់ងារ True Money ឬតាមរយៈការបរិច្ចាគ ដោយផ្ទាល់នៅលេខាធិការដ្ឋានមូលនិធិគន្ធបុប្ផាកម្ពុជា ដែលមានទីតាំងនៅទីស្តីការក្រសួងសេដ្ឋកិច្ច និងហិរញ្ញវត្ថុ ឬតាមរយៈលេខទូរស័ព្ទ ០៦១ ៧០ ១១១១។
មូលនិធិគន្ធបុប្ផាកម្ពុជានៅតែបន្តអំពាវនាវ និងលើកទឹកចិត្តដល់សប្បុរសជនទាំងក្នុង និងក្រៅប្រទេសឱ្យចូលរួមបរិច្ចាគជាសមាជិកដែលរួមមាន ១ សមាជិកកិត្តិយស បរិច្ចាគចាប់ពី ៥ ពាន់ដុល្លារអាមេរិក ក្នុង ១ ឆ្នាំឬ សមាជិកគាំទ្រ បរិច្ចាគចាប់ពី ៥ ០០០ រៀល ក្នុង ១ ខែ ស្មើនឹង ៦ ម៉ឺនរៀល ក្នុង ១ ឆ្នាំ ដើម្បីបង្ហាញពីសាមគ្គីភាពក្នុងស្មារតី «ខ្មែរជួយខ្មែរ»។
លោក រឿន សារ័ត្ន អ្នកគ្រប់គ្រងអង្គការសប្បុរសធម៌កម្ពុជកុលបុត្រ ថ្លែងនៅថ្ងៃទី ២១ ខែតុលានេះថា មន្ទីរពេទ្យគន្ធបុប្ផាជាអាយុជីវិតតិរបស់កុមារកម្ពុជា ហេតុនេះពលរដ្ឋខ្មែរគួរតែមានស្មារតីចូលរួមឧបត្ថមទៅមន្ទីរពេទ្យមួយនេះ ដើម្បីជួយទៅដល់កូនខ្មែរគ្រប់រូប។
លោកថ្លែងថា៖ «ខ្ញុំគិតថា បើសិនជាពលរដ្ឋម្នាក់ គាត់ឧបត្ថម្ភតែមួយដុល្លារ នឹងអាចមានការរីកចម្រើនសម្រាប់មន្ទីរពេទ្យគន្ធបុប្ផា។ កន្លងមកខាងក្រុមខ្ញុំក៏ធ្លាប់បានជិះកង់ចំនួន ២ ដងដែរ ដើម្បីរៃថវិកាជួយឧបត្ថមដល់មន្ទីរពេទ្យគន្ធបុប្ផាហ្នឹង ដោយយើងជិះរៃតាមភូមិ-ស្រុក និងបានផ្សព្វផ្សាយដល់ពលរដ្ឋមួយចំនួន ហើយក៏មានពលរដ្ឋមួយចំនួនចូលរួមជិះកង់ក្នុងកម្មវិធីរបស់យើងដែរ»។
លោក រឿន សារ័ត្ន ក៏បានសំណូមពរដល់បងប្អូនប្រជាពលរដ្ឋទាំងអស់ មេត្តាងាកពីការលេងហ្វេសប៊ុកដែលគ្មានប្រយោជន៍ មើលការរិះគន់គ្នាដោយឥតប្រយោជន៍ ហើយយកថវិកាដែលបានបញ្ជូលកាតទូរស័ព្ទមួយចំនួនតូចនោះ មកធ្វើការជួយឧបត្ថមដល់មូលនិធិគន្ធបុប្ផាកម្ពុជា គឺជារឿងល្អប្រសើរជាង។
អ្នកគ្រប់គ្រងអង្គការសប្បុរសធម៌កម្ពុជកុលបុត្របានលើកឡើងផងដែរថា ការចំណាយពេលវេលា និងថវិកា ទៅលើការទទួលទានគ្រឿងស្រវឹង ក៏គួរតែមានការកាត់បន្ថយខ្លះ ខណៈល្បែងភ្នាល់ផ្សេងៗ ក៏មិនបាននាំមកនូវកិត្តិយសនិងសេចក្តីថ្លៃថ្នូរនោះទេ។
ហេតុនេះលោកថា បើគ្រប់គ្នាបង្កើតទម្លាប់ យកចំណែកថវិកាខ្លះពីសកម្មភាពគ្មានប្រយោជន៍ទាំងនោះ មកជួយដល់ការងារសប្បុរសធម៌ ជួយសង្គម ឬជួយដល់ មន្ទីរពេទ្យគន្ធបុប្ផានេះ គឺជារឿងល្អបំផុត៕
