ភ្នំពេញៈ តំណាងអយ្យការ នៅថ្ងៃទី ២១ តុលា កំពុងសាកសួរបុរសជនជាតិចិន ២ នាក់ ពាក់ព័ន្ធនឹងការបង្ខាំងបុរសខ្មែរ ២ នាក់ នៅភូមិគីឡូលេខ ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
លោក សំរិទ្ធ សុខុន អ្នកនាំពាក្យអយ្យការអមសាលាដំបូងខេត្តបន្ទាយមានជ័យប្រាប់នៅថ្ងៃទី ២១ តុលាថា បុរសជនជាតិចិន ឈ្មោះ ស៊ីន សៅស៊ុន អាយុ ៣៦ ឆ្នាំ និងឈ្មោះ កៅ ឈុង អាយុ៣៥ ឆ្នាំ កំពុងត្រូវបានតំណាងអយ្យការសាកសួរនៅឡើយ នៅថ្ងៃទី ២១ តុលា។
លោកបញ្ជាក់ថា៖ «ដោយសារតែស្ថិតនៅក្នុងនីតិវិធីសាកសួរ ដូច្នេះខ្ញុំមិនទាន់ដឹងថា ចោទបទអីដែរ។ នីតិវិធីសាកសួរអាចយូរ ព្រោះត្រូវបកប្រែភាសាទៀត»។
ពាក់ព័ន្ធនឹងការឃាត់ខ្លួននេះ លោកស្រី ឌី សុជាតិ ស្នងការរងទទួលផែនប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តបន្ទាយមានជ័យ ឱ្យដឹងនៅថ្ងៃទី ២១ តុលាថា ការផ្តើមឱ្យមានការឃាត់ខ្លួនបុរស ២ នាក់ខាងលើ ដោយសារកាលពីល្ងាចថ្ងៃទី ១៨ តុលា ឆ្នាំ ២០២១ នគរបាលក្រុងប៉ោយប៉ែត ទទួលបានព័ត៌មានពីប្រជាពលរដ្ឋថា មានករណីបង្ខាំងមនុស្សចំនួន ២ នាក់ នៅចំណុចអគារ ១ កន្លែង ស្ថិតក្នុងភូមិគីឡូលេខ ៤ សង្កាត់ផ្សារកណ្តាល ក្រុងប៉ោយប៉ែត។
លោកស្រីបន្តថា បន្ទាប់មក នៅថ្ងៃដដែល កម្លាំងសមត្ថកិច្ចក្រុងប៉ោយប៉ែត បានចុះអន្តរាគមន៍ ដោយការសហការជាមួយម្ចាស់អគាររំដោះបានជនរងគ្រោះជនជាតិខ្មែរ ២ នាក់ ឈ្មោះ ឌឿន ឌាត ភេទប្រុស អាយុ ៣៣ ឆ្នាំ និងឈ្មោះ ជឹម ក្តឹប ភេទប្រុស អាយុ ៣៣ ឆ្នាំ។ ពួកគេស្នាក់នៅបណ្តោះអាសន្នក្នុងភូមិគីឡូលេខ ៤ សង្កាត់ផ្សារកណ្តាល ក្រុងប៉ោយប៉ែត។
ក្រោយពីរំដោះបានជនរងគ្រោះហើយ សមត្ថកិច្ចក៏បន្តឃាត់ខ្លួនជនសង្ស័យជាជនជាតិចិនឈ្មោះ ស៊ីន សៅស៊ុន អាយុ ៣៦ ឆ្នាំ និងឈ្មោះ កៅ ឈុង អាយុ ៣៥ ឆ្នាំ។ ពួកគេជាមេការក្រមហ៊ុនអនឡាញមួយនៅក្រុងប៉ោយប៉ែត។
លោកស្រីថ្លែងថា៖ «យើងឃាត់ខ្លួនពួកគេ និងបញ្ជូនទៅតុលាការ ដោយសារការសារភាព និងចម្លើយរបស់ជនរងគ្រោះស៊ីចង្វាក់គ្នា»។
លោកស្រីប្រាប់តាមសម្តីជនរងគ្រោះថា នៅថ្ងៃទី ៩ តុលា ឆ្នាំ ២០២១ ពួកគេធ្វើសម្ភាសនៅរាជធានីភ្នំពេញ ដើម្បីសុំការងារធ្វើនៅក្រុមហ៊ុនអនឡាញនៅក្រុងប៉ោយប៉ែតខេត្តបន្ទាយមានជ័យ។ លុះនៅយប់ថ្ងៃទី ៩ តុលា ដដែលពួកគេមានគ្នាចំនួន៣នាក់បានជិះរថយន្ត ១ គ្រឿងពីរាជធានីភ្នំពេញមកក្រុងប៉ោយប៉ែត ដោយអ្នកបើកបរជាជាជនជាតិខ្មែរ និងអ្នករួមដំណើរជាមួយមានជនជាតិចិនម្នាក់ និងជនជាតិបង់ក្លាដែសម្នាក់ទៀត។ លុះដល់ក្រុងប៉ោយប៉ែតនៅវេលាម៉ោងជាង៣ទាបភ្លឺឈានចូលថ្ងៃទី ១០ តុលា ក៏នាំគ្នាសម្រាកស្នាក់នៅអគារអនឡាញ។
លោកស្រីបន្ថែមថា នៅថ្ងៃទី ១០ តុលា ក្រុមជនសង្ស័យបានហៅអ្នកទាំង ៣ នាក់ សម្ភាសម្តងម្នាក់ៗហើយជាប់តែជនរងគ្រោះ ២ នាក់ប៉ុណ្ណោះ និងធ្វើការបានតែប៉ុន្មានថ្ងៃទេ។
លុះនៅថ្ងៃទី ១៧-១៨ តុលា ឆ្នាំ ២០២១ ជនរងគ្រោះទាំង ២ នាក់ ត្រូវបានជនសង្ស័យទាំង២នាក់ដាក់ខ្នោះ និងគំរាមទារប្រាក់ដោយប្រាប់ពួកគេ (ជនរងគ្រោះ) ថា អ្នកនាំមក បានយកពួកគេទាំង ២ នាក់ មកលក់ឱ្យពួកខ្លួន (ក្រុមជនសង្ស័យ)។ បើមិនបានប្រាក់ទេ គេបង្ខាំងទុកក្នុងបន្ទប់ ៦ ខែ។ តាមចម្លើយជនសង្ស័យឈ្មោះ កៅ ឈុង បានសារភាពថា គាត់ធ្វើការជាអ្នកមើលការខូចខាតទឹក ភ្លើង និងសម្ភារផ្សេងៗក្នុងអគារអនឡាញ។ ចំពោះការដាក់ខ្នោះជនរងគ្រោះ គឺគាត់មិនបានពាក់ព័ន្ធឡើយ ដោយឈ្មោះ ស៊ី សៅស៊ុន ជាអ្នកធ្វើ៕