កំពង់ស្ពឺៈ ប្រជាពលរដ្ឋប្រមាណ ១៦០ នាក់កាលពីថ្ងៃទី ១៩ ខែតុលា បាននាំគ្នាតវ៉ាមិនឱ្យមានការឈូសឆាយដីព្រៃក្នុងភូមិពោធិ៍មាស ឃុំត្រពាំងជោរ ស្រុកឱរ៉ាល់ ដោយសំអាងថា ទីនោះស្ថិតក្នុងការគ្រប់គ្រងរបស់សហគមន៍ឧត្តមស្រែពស់។ ប៉ុន្តែអាជ្ញាធរឃុំអះអាងថា នោះជាដីបរិស្ថាន ដែលរដ្ឋាភិបាលសម្រេចធ្វើប្រទានកម្មជូនគ្រួសារយោធិនសម្រាប់សាងសង់លំនៅឋាន និងបង្កបង្កើនផល។
លោក ឃន សារឹទ្ធ តំណាងប្រជាពលរដ្ឋក្នុងសហគមន៍ឧត្តមស្រែពស់ ថ្លែងនៅថ្ងៃទី ២១ ខែតុលាថាប្រជាសហគមន៍ប្រមាណ ១៦០ នាក់បាននាំគ្នាធ្វើការតវ៉ា មិនឱ្យមានការឈូសឆាយដីព្រៃស្ថិតក្នុងភូមិពោធិ៍មាសឃុំត្រពាំងជោរ ស្រុកឱរ៉ាល់កាលពីថ្ងៃទី ១៩ ខែតុលា ព្រោះនោះជាដីសហគមន៍ឧត្តមស្រែពស់ដែលពលរដ្ឋតែងអាស្រ័យផល។
គ្រឿងចក្របានចូលធ្វើការឈូសឆាយតាំងពីថ្ងៃទី ១៩ រហូតមកដល់ថ្ងៃទី ២១ ក៏នៅតែបន្តឈូសដដែល។ លោកថ្លែងថា៖ «ការឈូសនោះ បើសិនជាមានប្រជាពលរដ្ឋទៅហាមឃាត់ខ្លាំង គេក៏ឈប់សិនទៅ។ និយាយទៅពេលយើងឃាត់គេក៏ឈប់ទៅ ពេលដែលគ្នាយើងខ្លះទៅហូបបាយ គេចាប់ផ្តើមឈូសទៀត» ។
ប្រជាពលរដ្ឋមានការព្រួយបារម្ភចំពោះការបាត់បង់ដីព្រៃទីនោះ ព្រោះជាទីកន្លែងដែលធ្លាប់អាស្រ័យផល។ បច្ចុប្បន្នសហគមន៍មានផ្ទៃដីជាង ៨០០ ហិកតា ដែលប្រជាជនសហគមន៍នៅក្នុងតំបន់នោះ តែងធ្វើការដកផ្សិត រកអុស និងឃ្វាលគោក្របីជាដើម។
លោកថ្លែងថា៖ «ក្នុង ៨០០ ហិកតាជាងហ្នឹង ភាគច្រើនគឺមានអ្នកមានធំៗ គាត់ដាំស្វាយចន្ទីដាំអីចង់អស់ហើយ ដីដែលនៅជាក់ស្តែងគឺនៅតិចបំផុត បើសិនជាគាត់យកជាង ២០០ ហិកតាហ្នឹងទៀត គឺអស់រលីង» ។
លោក ទេព ណែម មេឃុំត្រពាំងជោរថ្លែងថា ដីព្រៃដែលមានគ្រឿងចក្រឈូសឆាយ ស្ថិតក្នុងភូមិពោធិ៍មាស ឃុំត្រពាំងជោរ ស្រុកឱរ៉ាល់ នោះជាដីរបស់ក្រសួងបរិស្ថាន ស្ថិតក្រោមការគ្រប់គ្រងរបស់ដែនជម្រកសត្វព្រៃភ្នំឱរ៉ាល់ ដែលប្រមុខរដ្ឋាភិបាលសម្រេចធ្វើប្រទានកម្មជាកម្មសិទ្ធិជូនគ្រួសារយោធិន ៤១ គ្រួសារ សម្រាប់សាងសង់លំនៅឋាន និងបង្កបង្កើនផល។
លោកមេឃុំបញ្ជាក់ថា៖ «ខាងទាហាន គាត់សុំស្នើដី ១ កន្លែងហ្នឹងប្រហែលជាង ២០០ ហិកតា សម្រាប់គ្រួសារកងទ័ព។ ដីហ្នឹងវាមិននៅក្នុងសហគមន៍ទេវានៅជាប់ដីសហគមន៍ផ្នែកខាងជើង»។
យោងតាមអនុក្រឹត្យដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន នៅថ្ងៃទី ២០ ខែសីហា ឆ្នាំ ២០២១ បញ្ជាក់ថា មានការធ្វើអនុប្បយោគផ្ទៃដីទំហំ ២៦២,២៤ ហិកតាក្នុងដែនជម្រកសត្វព្រៃភ្នំឱរ៉ាល់ ភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ជាទ្រព្យសម្បត្តិឯកជនរបស់រដ្ឋ ដើម្បីធ្វើប្រទានកម្មជាកម្មសិទ្ធិជូនក្រុមគ្រួសារយោធិនបញ្ជាការដ្ឋានរថក្រោះកងទ័ពជើងគោក និងប្រជាពលរដ្ឋសរុបចំនួន ៤១ គ្រួសារ សម្រាប់សាងសង់លំនៅឋាន និងបង្កបង្កើនផលស្របច្បាប់ ។
ចំណែកលិខិតរបស់មន្ទីរបរិស្ថានខេត្តកំពង់ស្ពឺនៅថ្ងៃទី ១៣ ខែតុលា បញ្ជាក់ថា បានស្នើសុំដាក់គ្រឿងចក្រចំនួន ៥ គ្រឿង សម្រាប់ចុះកំណត់ព្រំ និងឈូសឆាយដីក្រុមគ្រួសារយោធិនបញ្ជាការដ្ឋានរថក្រោះកងទ័ពជើងគោកនិងប្រជាពលរដ្ឋចំនួន ៤១ គ្រួសារ នៅទីតាំងនោះត្រូវបានអភិបាលខេត្តកំពង់ស្ពឺចុះហត្ថលេខាឯកភាព៕
វីដេអូ៖