.jpg)
មន្ត្រី កបប កំពុងត្រួតពិនិត្យទំនិញនៅតៀមលក់ដូរ ១ កន្លែង។ រូបថត កបប
ភ្នំពេញៈ ក្នុងរយៈពេល ៣ ថ្ងៃមន្ត្រីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប ឬ CCF) រកឃើញដេប៉ូលក់ប្រេងឥន្ធនៈចំនួន ១៧ ទីតាំង ក្នុងខេត្តចំនួន ៤ ធ្វើអាជីវកម្ម មិនអនុលោមតាមច្បាប់ ខណៈទំនិញខូចគុណភាពជាង ១ ០០០ គីឡូក្រាម និងអាល់កុល ភេសជ្ជៈក្លែងក្លាយជាង ៥០០ លីត្រត្រូវបានដកហូត និងកម្ទេចចោល។
ទំព័រហ្វេសប៊ុករបស់ ក.ប.ប បានឱ្យដឹងនៅថ្ងៃទី ២០ តុលាថា ក្នុងរយៈពេល ៣ ថ្ងៃមន្ត្រី ក.ប.ប បានចុះត្រួតពិនិត្យតាមបណ្ដាស្ថានីយ និងដេប៉ូលក់ប្រេងឥន្ធនៈចំនួន ៤៤ ទីតាំង គិតពីថ្ងៃទី ១៨ ដល់ថ្ងៃទី ២០ ខែតុលា ឆ្នាំ ២០២១។
ក.ប.ប បញ្ជាក់ថា៖ «ការចុះត្រួតពិនិត្យនេះត្រូវបានធ្វើឡើងក្នុងខេត្តកោះកុង ខេត្តកំពង់ស្ពឺ ខេត្តបាត់ដំបង និងខេត្តព្រៃវែង ដោយបានរកឃើញដេប៉ូចំនួន ១៧ ទីតាំង មិនអនុលោមទៅតាមច្បាប់។ ក្រោយពីបានរកឃើញដូចនេះ មន្ត្រីជំនាញបានធ្វើការពិន័យអន្តរការណ៍ និងណែនាំដល់ម្ចាស់ដេប៉ូឱ្យឈប់ប្រព្រឹត្តល្មើសនឹងច្បាប់ដែលធ្វើឱ្យប៉ះពាល់ជីវភាពប្រជាពលរដ្ឋ ក៏ដូចជាខាតបង់សេដ្ឋកិច្ចជាតិទាំងមូល»។
ក្រៅពីដេប៉ូប្រេងសាំងមិនអនុលោមទៅតាមច្បាប់ កបប ក៏បានឱ្យដឹងដែរថា នៅថ្ងៃទី ២០ តុលា មន្ត្រីរបស់ខ្លួនក៏បានចុះត្រួតពិនិត្យតាមបណ្ដាផ្សារក្នុងខេត្តប៉ៃលិន ខេត្តឧត្តរមានជ័យ ខេត្តបន្ទាយមានជ័យ ខេត្តកែប និងខេត្តត្បូងឃ្មុំ ដើម្បីទប់ស្កាត់ការដាក់ចរាចរនូវទំនិញខូចគុណភាព។ ទំនិញហួសកាលបរិច្ឆេទប្រើប្រាស់ និងទំនិញក្លែងក្លាយ ដែលបង្កហានិភ័យដល់សុខភាព និងធ្វើឱ្យខាតបង់សេដ្ឋកិច្ចរបស់ប្រជាពលរដ្ឋ។
ក្នុងប្រតិបត្តិការចុះត្រួតពិនិត្យនេះ មន្ត្រីជំនាញបានរកឃើញទំនិញហួសសុពលភាពប្រើប្រាស់ចំនួន ១ ១៨៦ គីឡូក្រាមដែលសុទ្ធសឹងជាគ្រឿងឧបភោគ- បរិភោគ និងអាល់កុលក្លែងក្លាយ (មេតាណុល) ចំនួន ១៩៣,៥០ លីត្រផងដែរ។
ចំណែកនៅថ្ងៃទី ១៨-១៩ ខែតុលា មន្ត្រីស៊ើបអង្កេតសាខា ក.ប.ប ប្រចាំខេត្តកំពង់ស្ពឺ ខេត្តតាកែវ ខេត្តព្រះវិហារ ខេត្តក្រចេះ និងខេត្តឧត្តរមានជ័យ បានចុះត្រួតពិនិត្យទំនិញ ម្ហូបអាហារគ្រប់ប្រភេទ ដែលដាក់លក់នៅលើទីផ្សារនៃខេត្តទាំងនេះ។
ក្នុងប្រតិបត្តិការ ២ ថ្ងៃនេះ កបប បានរកឃើញ និងដកហូតភេសជ្ជៈមានជាតិអាល់កុល និងគ្មានជាតិអាល់កុល ដែលហួសកាលបរិច្ឆេទប្រើប្រាស់ចំនួន ២៩៨ លីត្រ និងអាល់កុលក្លែងក្លាយ (មេតាណុល) ចំនួន ៥៩ លីត្រ និងទំនិញចម្រុះខូចគុណភាព និងហួសកាលបរិច្ឆេទប្រើប្រាស់ប្រមាណ ២៥,៧៤ គីឡូក្រាម យកមកកម្ទេចចោលភ្លាមៗ និងបានពិន័យអន្តរការណ៍ទៅតាមច្បាប់ដែលមានចែងផងដែរ។
ក.ប.ប បានអះអាងថា ក្នុងប្រតិបត្តិការនេះ ក្រៅពីចុះពិនិត្យទំនិញ និងពិនិត្យលើការអនុលោមមិនតាមច្បាប់ មន្ត្រីប្រចាំគោលដៅទាំងនោះក៏បានធ្វើការចែកខិត្តប័ណ្ណផ្សព្វផ្សាយអប់រំសុខភាព និងការយល់ដឹងស្ដីពីអំពើមិនសុចរិតក្នុងធុរកិច្ចប្រេងឥន្ធនៈក្នុងខេត្តទាំងនេះទៀតផង ដើម្បីធានាការពារ ផលប្រយោជន៍ សុខុមាលភាពរបស់ប្រជាពលរដ្ឋ និងការយល់ដឹងពាក់ព័ន្ធអំពើមិនសុចរិតលើអ្នកប្រើប្រាស់»៕
វីដេអូ៖
