សៀមរាបៈ ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) និងក្រសួងសេដ្ឋកិច្ច និងហិរញ្ញវត្ថុបានចុះហត្ថលេខាលើកិច្ចព្រមព្រៀងឥណទានសម្បទានបន្ថែមប្រមាណ ៥៨ លានដុល្លារ សម្រាប់គម្រោងពង្រីកសមត្ថភាពផ្គត់ផ្គង់ទឹកស្អាតនៅក្រុងសៀមរាប។
កិច្ចព្រមព្រៀងនេះ ចុះហត្ថលេខាដោយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកស្រី KAMEI Haruko តំណាង JICA ប្រចាំកម្ពុជា កាលពីថ្ងៃទី ២១ ខែតុលា តាមប្រព័ន្ធវីដេអូ។
គម្រោងនេះមានទិសដៅសាងសង់រោងចក្រផលិតទឹកស្អាតមួយ ដែលមានសមត្ថភាពផលិតទឹកស្អាតបាន ៦០ ០០០ ម៉ែត្រគុប ក្នុង ១ ថ្ងៃដោយយកប្រភពទឹកពីបឹងទន្លេសាប ដែលក្នុងនោះមានការសាងសង់ប្រព័ន្ធបណ្តាញស្ថានីយបូមទឹក សាងសង់ប្រព័ន្ធចែកចាយទឹក និងសាងសង់រោងចក្រប្រព្រឹត្តិកម្មទឹកស្អាត ។
សេចក្តីប្រកាសព័ត៌មានរួមរវាងភាគីទាំង ២ បញ្ជាក់ថា៖ «គម្រោងនឹងដើរតួនាទីយ៉ាងសំខាន់ក្នុងការផ្គត់ផ្គង់ និងចែកចាយប្រព័ន្ធទឹកស្អាតជូនដល់ប្រជាពលរដ្ឋទូទាំងក្រុងសៀមរាបទាំងមូល »។ កិច្ចព្រមព្រៀងនេះ គឺជាឯកសារគតិយុត្តមួយទៀត បន្ទាប់ពីលិខិតប្ដូរសារដែលបានចុះហត្ថលេខាកាលពីថ្ងៃទី ១១ តុលា រវាងក្រសួងការបរទេស និងសហប្រតិបត្តិការអន្តរជាតិកម្ពុជា និងស្ថានទូតជប៉ុនប្រចាំនៅកម្ពុជា ។
សេចក្តីប្រកាសព័ត៌មានបញ្ជាក់ថា សមិទ្ធផលដែលទទួលបានពីគម្រោងនេះនឹងចូលរួមចំណែកយ៉ាងសំខាន់ក្នុងការជួយដល់រាជរដ្ឋាភិបាលកម្ពុជាឱ្យសម្រេចផែនការយុទ្ធសាស្ត្រអភិវឌ្ឍន៍ជាតិលើវិស័យផ្គត់ផ្គង់ទឹកស្អាតតាមរយៈការគាំទ្រដល់រដ្ឋាករទឹកស្វយ័តសៀមរាប ដែលឆ្លើយតបយ៉ាងជាក់ច្បាស់ទៅនឹងសេចក្តីត្រូវការជាអាទិភាពរបស់កម្ពុជាក្នុងការពង្រីក ប្រព័ន្ធផ្គត់ផ្គង់ទឹកស្អាត។
សេចក្តីប្រកាសព័ត៌មានបញ្ជាក់ថា ក្នុងនាមជាដៃគូអភិវឌ្ឍន៍ដ៏សំខាន់មួយនៅក្នុងវិស័យផ្គត់ផ្គង់ទឹកស្អាត រដ្ឋាភិបាលជប៉ុនតាមរយៈ JICA តែងតែប្រកាន់ខ្ជាប់នូវវិធីសាស្ត្រអភិវឌ្ឍន៍ដែលមានលក្ខណៈគ្រប់ជ្រុងជ្រោយ ក្នុងការពង្រឹងពង្រីកភាពជាដៃគូជាយុទ្ធសាស្ត្ររយៈពេលវែង ជាមួយរាជរដ្ឋាភិបាលកម្ពុជាដើម្បីឱ្យប្រជាជនគ្រប់រូបទទួលបាននូវទឹកដែលស្អាត និងមានសុវត្ថិភាពប្រើប្រាស់។
លោកស្រី Kamei Haruko ថ្លែងក្នុងពិធីចុះហត្ថលេខានេះថា កិច្ចសហការរបស់រាជរដ្ឋាភិបាលកម្ពុជាក្នុងការអនុវត្តគម្រោងនេះ មានសារៈសំខាន់ ហើយ JICA បានបន្តជួយដល់រដ្ឋាករទឹកស្វយ័តសៀមរាប តាមរយៈគម្រោងមួយទៀត គឺគម្រោងលើកកម្ពស់សេវាទឹកស្អាត និងអនាម័យ ដើម្បីទប់ស្កាត់ជំងឺកូវីដ ១៩ ផងដែរ ដែលនេះជាគម្រោងសហប្រតិបត្តិការបច្ចេកទេសក្នុងគ្រាអាសន្ន។
លោកស្រីថ្លែងថា៖ «គម្រោងនេះនឹងផ្តល់ជាសម្ភារ និងសារធាតុគីមីសម្រាប់ផ្គត់ផ្គង់ទឹកស្អាតដែលធានាគុណភាពទឹកស្របតាមស្តង់ដាគុណភាពថ្នាក់ជាតិក្នុងបរិបទនៃជំងឺកូវីដ ១៩»។
លោក អូន ព័ន្ធមុនីរ័ត្ន បានអរគុណដល់រដ្ឋាភិបាលជប៉ុន តាមរយៈ JICA ដែលកន្លងមកតែងតែយកចិត្តទុកដាក់ «រួមសុខទុក្ខ» ជាមួយកម្ពុជាគ្រប់កាលៈទេសៈជាពិសេសស្ថិតក្នុងអំឡុងពេលនៃការរីករាលដាលនៃជំងឺកូវីដ ១៩ ។
លោកថ្លែងក្នុងពិធីនេះថា៖ «ថ្មីៗនេះរដ្ឋាភិបាលជប៉ុនទើបតែបានបន្តសន្យាផ្តល់ហិរញ្ញប្បទានឥតសំណងដែលមានទឹកប្រាក់ ១ ៦០០ លានយ៉េន [១៤ លានដុល្លារ] សម្រាប់កម្មវិធីអភិវឌ្ឍន៍សេដ្ឋកិច្ច និងសង្គម ដល់រាជរដ្ឋាភិបាលកម្ពុជា ដែលសកម្មភាពទាំងនេះ គឺជាសក្ខីភាព ប្រកបដោយកាយវិការដ៏ប្រពៃ និងសមានទឹកចិត្តដ៏ថ្លៃថ្លារបស់ភាគីមិត្ត ជាពិសេស ការជឿទុកចិត្ត និងជឿជាក់លើការដឹកនាំរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ នាយករដ្ឋមន្ត្រី»៕