កំពង់ស្ពឺៈ លោក វ៉ីសំណាង អភិបាលខេត្តកំពង់ស្ពឺបានអះអាងថាស្លាកប៉ាណូផ្សព្វផ្សាយគ្រឿងស្រវឹងតាមទីសាធារណៈក្នុងខេត្តត្រូវបានរុះរើចេញ ១០០ ភាគរយហើយ ក៏ប៉ុន្តែលោកបានអំពាវនាវឱ្យពលរដ្ឋរាយការណ៍ ប្រសិនបើឃើញករណីលើកស្លាកថ្មីនៅតាមមូលដ្ឋាន។
លោក វ៉ី សំណាង បានប្រាប់ ភ្នំពេញ ប៉ុស្តិ៍ នៅថ្ងៃទី ២១ តុលាថា៖ «មកទល់ពេលនេះទីតាំងលើកស្លាកប៉ាណូផ្សព្វផ្សាយផលិតផលគ្រឿងស្រវឹងគ្រប់ប្រភេទតាមទីសាធារណៈត្រូវបានរុះរើចេញ ១០០ ភាគរយ។
យើងសម្រេចបាន ១០០ ភាគរយព្រោះខ្ញុំដើរមើលអស់ហើយ»។
ជាមួយគ្នានេះលោកអះអាងថា អាជ្ញាធរទទួលបន្ទុកបញ្ហានេះក៏នឹងបន្តចុះត្រួតពិនិត្យ និងចុះរុះរើរាល់ស្លាកប៉ាណូផ្សព្វផ្សាយគ្រឿងស្រវឹងដែលបន្តលួចដាក់ថ្មី ហើយលោកក៏បានអំពាវនាវដល់ពលរដ្ឋឱ្យចូលរួមរាយការណ៍បើឃើញមានករណីលើកស្លាកប៉ាណូផ្សព្វផ្សាយគ្រឿងស្រវឹងតាមមូលដ្ឋានរបស់ពួកគេ។
លោកបានបញ្ជាក់ថា៖ «មកដល់ពេលនេះក៏មិនមានម្ចាស់ទីតាំង ឬមានការលួចដាក់ទៀតដែរគឺមិនមានទេ ហើយក្នុងករណីបើមានគឺយើងចុះទៅទម្លាក់។
ចំពោះអ្នកបន្តល្មើសយើងនឹងគិតពីវិធានការបន្តទៀត ក្រៅពីទម្លាក់ និងរុះរើចេញព្រោះការលើកស្លាកផ្សព្វផ្សាយនេះ វាមិនមែនទាក់ទងនឹងទោសទណ្ឌអីទេ វាគ្រាន់តែទាក់ទងនឹងសណ្តាប់ធ្នាប់សាធារណៈ»។
កាលពីខែឧសភាឆ្នាំនេះ លោក វ៉ី សំណាង ធ្លាប់បានដឹកនាំកិច្ចប្រជុំបន្ទាន់ក្នុងខេត្ត ដោយបានដាក់បទបញ្ជាហាមឃាត់ការផ្សាយពាណិជ្ជកម្មគ្រឿងស្រវឹងតាមស្លាកប៉ាណូនៅទីសាធារណៈ ហើយចាត់ទុកថា ធ្វើឱ្យបាត់បង់នូវសោភណភាព សេចក្តីថ្លៃថ្នូរ របៀបរៀបរយ និងសណ្តាប់ធ្នាប់សាធារណៈក្នុងខេត្តកំពង់ស្ពឺ។
លោក ជា ម៉ុម ប្រជាពលរដ្ឋរស់នៅក្នុងក្រុងច្បារមន ខេត្តកំពង់ស្ពឺបានលើកឡើងថា ស្ថានភាពជាក់ស្តែងនៅទូទាំងក្រុងដែលលោកកំពុងរស់នៅគឺមិនមានការផ្សព្វផ្សាយពាណិជ្ជកម្មគ្រឿងស្រវឹងតាមស្លាកប៉ាណូនៅទីសាធារណៈទេ។ លោកថាក្នុងនាមជាពលរដ្ឋម្នាក់ក្នុងខេត្តនេះពិតជាមានមោទនភាពដែលថ្នាក់ដឹកនាំខេត្តបានអនុវត្តមុនគេ និងធ្វើជាគំរូដើម្បីកុំឱ្យការផ្សព្វផ្សាយគ្រឿងស្រវឹង។
លោកបានរៀបរាប់ថា៖ «សកម្មភាពនេះខ្ញុំគាំទ្រ ១០០% ទាក់ទងនឹងការហាមឃាត់គ្រឿងស្រវឹងនេះ បើទោះជាប៉ះពាល់ខ្លះដល់បងប្អូនដែលប្រកបមុខរបរអាជីវកម្មមួយចំនួនក៏ដោយ តែគ្រាន់តែថា បើបិទតែការហាមឃាត់ [ផ្សាយពាណិជ្ជកម្មគ្រឿងស្រវឹង] ហើយការប្រើប្រាស់គ្រឿងស្រវឹងនៅធ្វើបានជាធម្មតាដដែល ព្រោះនេះក៏បង្ហាញថា ខេត្តយើងធ្វើបានខ្លះដែរ»។
លោក មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាសាទរចំពោះការសម្រេចបាននូវវិធានការ ១០០% ក្នុងការផ្តួចផ្តើមរបស់អភិបាលខេត្តកំពង់ស្ពឺ ដើម្បីហាមការផ្សព្វផ្សាយគ្រឿងស្រវឹងតាមស្លាកប៉ាណូ។ ប៉ុន្តែលោកថា ការផ្តើមចេញតែពីខេត្តនេះតែមួយ ហើយក្នុងទិសដៅបញ្ចប់ត្រឹមការផ្សព្វផ្សាយគ្រឿងស្រវឹងគឺមិនគ្រប់គ្រាន់ទេគឺត្រូវការការចូលរួមព្រមគ្នា និងគ្រប់មធ្យោបាយហាមឃាត់។
លោកថា៖ «អ្វីគួរតែមានលើសនេះគឺថា ការផ្សាយពាណិជ្ជកម្មគ្រឿងស្រវឹងគឺមិនមែនមានតែតាមរយៈប៉ាណូប៉ុណ្ណោះទេគឺមានតាមមធ្យោបាយផ្សេងៗ ហើយច្រើនទៀត ដូចជាទូរទស្សន៍ វិទ្យុបណ្តាញសង្គម ដែលទាំងនេះគឺជាកត្តាជំរុញឱ្យពលរដ្ឋប្រើប្រាស់គ្រឿងស្រវឹងយ៉ាងច្រើន»៕
វីដេអូ៖