សៀមរាបៈ អាជ្ញាធរជាតិអប្សរា និងសាលាភូមិន្ទរដ្ឋបាលបានរួមគ្នា ដាំកូនឈើប្រមាណ ២ ០០០ ដើម នៅបរិវេណវត្តឥន្ទបត្តបុរី(អង្គរខាងជើង) ដើម្បីប្រែក្លាយទីតាំងនេះឱ្យក្លាយជាសួនទេសភាពវប្បធម៌។
លោក ឡុង កុសល អគ្គនាយករងអាជ្ញាធរជាតិអប្សរា ថ្លែងក្នុងពិធីដាំកូនឈើកាលពីថ្ងៃទី ២១ ខែតុលាថា ការដាំកូនឈើនេះ មិនត្រឹមតែលើកតម្លៃទេសភាពវប្បធម៌ពាក់ព័ន្ធនឹងទីវត្តអារាមនោះទេ តែថែមទាំងផ្សារភ្ជាប់ការរៀបចំទីអារាមនេះ ទៅក្នុងតម្លៃលេចធ្លោជាសកលរបស់រមណីយដ្ឋានអង្គរ ដែលជាអត្តសញ្ញាណជាតិរបស់កម្ពុជា និងជាសម្បត្តិបេតិកភណ្ឌ វប្បធម៌របស់មនុស្សជាតិទាំងមូល។ នេះបើតាមហ្វេសប៊ុកអាជ្ញាធរជាតិអប្សរាកាលពីថ្ងៃទី ២១ ខែតុលា។
លោក យក់ ប៊ុនណា នាយកសាលាភូមិន្ទរដ្ឋបាល បានចាត់ទុកការដាំកូនឈើនេះថា ជាការចូលរួមចំណែកយ៉ាងសំខាន់ ដើម្បីបំពេញបន្ថែម នូវកិច្ចខិតខំប្រឹងប្រែងរបស់អាជ្ញាធរមូលដ្ឋាន និងអាជ្ញាធរជាតិអប្សរា ក្នុងការកែលម្អបរិស្ថានក្នុងតំបន់អង្គរ ព្រោះដើមឈើមានសារៈសំខាន់ខ្លាំងណាស់សម្រាប់ជីវិតមនុស្ស និងបរិស្ថាន។
ចាប់តាំងពីឆ្នាំ ២០០៤ មកដល់ពេលនេះអាជ្ញាធរជាតិអប្សរាបានដាំកូនឈើប្រណីតៗ ជាង ២ លានដើម នៅក្នុងតំបន់ឧទ្យានអង្គរ ដែលមានបេង នាងនួន ធ្នង់ គ្រញូង និងកូនឈើចម្រុះជាច្រើនទៀត។
អាជ្ញាធរជាតិអប្សរាក៏មានស្ថានីយបណ្តុះកូនឈើចំនួន ១០ ទីតាំង ដែលមានលទ្ធភាពបណ្តុះកូនឈើជាច្រើនម៉ឺនដើម ក្នុងមួយឆ្នាំៗ ដើម្បីដាំដុះ និងចែកជូនសាធារណជនផង៕