.jpg)
លោកអធិការស្រុកប្រាសាទបាគង កាលពីពេលកន្លងមក។ រូបថត ប៉ូលិស
សៀមរាបៈ ស្នងការនគរបាលខេត្តសៀមរាបបានចាត់ក្រុមការងារឱ្យចុះស្រាវជ្រាវលើ លោក លឹម សម្បត្តិ អធិការនគរបាលស្រុកប្រាសាទបាគង បន្ទាប់ពីទទួលបានបណ្តឹងអនាមិកប្តឹងសុំឱ្យចុះជួយពិនិត្យមើលការងារដឹកនាំរបស់អធិការរូបនេះកាលពីថ្ងៃទី ២០ ខែតុលា ជុំវិញករណីពុំមានសមត្ថភាព និងប្រកាន់បក្ខពួកនិយម។
លោក តេង ច័ន្ទណាត ស្នងការនគរបាលខេត្តសៀមរាបថ្លែងនៅថ្ងៃទី ២០ ខែតុលាថា បន្ទាប់ពីបានឃើញបណ្តឹងអនាមិកដាក់មកស្នងការដ្ឋានខេត្តសៀមរាបស្នើសុំឱ្យចុះជួយពិនិត្យមើលការងារដឹកនាំរបស់លោក លឹម សម្បត្តិ អធិការនគរបាលស្រុកប្រាសាទបាគង លោកបានប្រាប់ទៅលោកអធិការដើម្បីឱ្យបំភ្លឺជុំវិញរឿងនោះ និងចាត់ឱ្យមានក្រុមការងារចុះស្រាវជ្រាវផងដែរ។
លោកបានបញ្ជាក់ថា៖ «យើងឱ្យគាត់ធ្វើការបំភ្លឺហើយ ទើបយើងធ្វើការងារ ចុះស្រាវជ្រាវ ព្រោះវាមិនអាចគ្រាន់តែថា មានបណ្តឹងអនាមិកហើយយើងទៅដកមន្ត្រីរបស់យើងកើតនោះទេ យើងត្រូវធ្វើឱ្យមានយុត្តិធម៌ទាំងសងខាង»។
នៅពេលសុំការបញ្ជាក់បន្ថែមកាលពីថ្ងៃទី ២១ តុលា លោកស្នងការខេត្តសៀមរាបមិនអាចទាក់ទងបានទេ។
ក៏ប៉ុន្តែលោកធ្លាប់បានប្រាប់កាលពីថ្ងៃទី ២០ ខែតុលា ករណីនេះលោកនៅមិនទាន់ទទួលបាលការបំភ្លឺពីលោក លឹម សម្បត្តិ នៅឡើយទេ។
នៅក្នុងពាក្យបណ្តឹងអនាមិករាយការណ៍ទៅស្នងការខេត្តសៀមរាបដែលភ្នំពេញប៉ុស្តិ៍ទទួលបាននៅថ្ងៃទី ១៩ ខែតុលាបានបង្ហាញថា ពលរដ្ឋ និងសមត្ថកិច្ចនគរបាលស្រុកប្រាសាទបាគងបានសំណូមពរដល់ស្នងការនគរបាលខេត្តសៀមរាប ពិនិត្យមើលការដឹកនាំរបស់លោក លឹម សម្បត្តិ អធិការនគរបាលស្រុកប្រាសាទបាគង និងសុំឱ្យផ្លាស់ប្តូរតួនាទីបច្ចុប្បន្ន ព្រោះអធិការរូបនេះពុំមានសមត្ថភាពដឹកនាំ និងប្រកាន់បក្ខពួកនិយម។
ពាក្យបណ្តឹងអនាមិកដដែលនោះបានលើកឡើងទៀតថា ចាប់តាំងពីលោក លឹម សម្បត្តិ បានចូលកាន់មុខតំណែងជាអធិការ នគរបាលស្រុកប្រាសាទបាគងនៅក្នុងចុងឆ្នាំ ២០១៩ មក បានធ្វើឱ្យមន្ត្រីនគរបាលជាតិនៅក្នុងអធិការដ្ឋាននគរបាលស្រុកប្រាសាទបាគងទាំងមូលមានការបែកបាក់សាមគ្គីភាពផ្ទៃក្នុងនោះមានការប្រកាន់បក្ខពួកនិយម អួតអាង ថាមានខ្សែខ្នងធំៗចាំជួយខ្លួននៅពីក្រោយ និងបានប្រព្រឹត្តអំពើពុករលួយខុសច្បាប់ដើម្បីផលប្រយោជន៍ផ្ទាល់ខ្លួនទៀតផង។
ក្រៅពីនេះប្រភពដដែលបានបង្ហាញដែរថា លោកអធិការរូបនេះបានដើរផឹកស៊ីជួបជុំគ្នាជាមួយបក្ខពួក ផ្ទុយពីការណែនាំប្រមុខរាជរដ្ឋាភិបាលដែលបានដាក់ចេញនូវវិធានការ៣ការពារ និង៣កុំ ដោយមិនបានយកចិត្តទុកដាក់ក្នុងការងារថែរក្សាសន្តិសុខសណ្តាប់ធ្នាប់ជូនប្រជាពលរដ្ឋរស់នៅក្នុងមូលដ្ឋានស្រុកប្រាសាទបាគងឡើយ។
ក្នុងពាក្យបណ្តឹងសរសេរទៀតថា៖ «បទល្មើសច្រើនជាបន្តបន្ទាប់បានកើតឡើងដូចជាចោរកម្ម លួច ឆក់ កាច់សោកម៉ូតូ គាស់ផ្ទះចូលយកទ្រព្យសម្បត្តិនៅក្នុងផ្ទះកើតមានពាសពេញស្រុក។ នៅពេលលោកអធិការចុះបង្ក្រាបកន្លែងល្បែងស៊ីសងតែងជំរិតទារប្រាក់ចំនួន ២០០ ដុល្លារទៅ ៣០០ ដុល្លារក្នុងម្នាក់ បើមិនឱ្យទេនឹងបញ្ជូនសំណុំរឿងទៅតុលាការ»។
យ៉ាងណាក៏ដោយ លោក លឹម សម្បត្តិ អធិការនគរបាលស្រុកប្រាសាទបាគងមិនអាចសុំបំភ្លឺជុំវិញករណីចោទប្រកាន់នេះបានទេ កាលពីថ្ងៃទី ២១ ខែតុលា ដោយសារទូរស័ព្ទរបស់លោកពុំមានអ្នកទទួល៕
