.jpg)
លោក គិន ភា ថ្លែងក្នុងកិច្ចពិភាក្សាតុមូលស្ដីពីខួប ៣០ ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា កាលពីព្រឹកមិញ។ រូបថត រាជបណ្ឌិត្យសភាកម្ពុជា
ភ្នំពេញៈ លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាអំពាវនាវដល់អ្នកដែលបកស្រាយកិច្ចព្រមព្រៀងសន្តិភាពទីក្រុងប៉ារីស ចៀសវាងប្រើបាស់កិច្ចព្រមព្រៀងនេះ ដើម្បីបម្រើផលប្រយោជន៍នយោបាយដែលផ្ទុយពីផលប្រយោជន៍ជាតិ ហើយលោកចាត់ទុកថា កិច្ចព្រមព្រៀងនេះ នៅតែជាមេរៀនប្រវត្តិសាស្ត្រ។
លោក គិន ភា ថ្លែងថា កិច្ចព្រមព្រៀងទីក្រុងប៉ារីស ត្រូវបានអនុវត្តក្នុងដំណាក់កាលអន្តរកាលមួយ។ លោកមិនធ្វើការវិនិច្ឆ័យទៅលើសុពលភាព ឬការសើរើឡើងវិញនៃកិច្ចព្រមព្រៀងនេះបែបណានោះទេ តែលោកចាត់ទុកថា កិច្ចព្រមព្រៀងនេះ នៅតែមេរៀនប្រវត្តិសាស្ត្រ ដើម្បីបញ្ចៀសភាពច្រំដែលនៃប្រវត្តិសាស្ត្រ។
លោកថ្លែងបែបនេះ ក្នុងកិច្ចពិភាក្សាតុមូលស្ដីពីខួប ៣០ ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ដែលរៀបចំដោយរាជបណ្ឌិត្យសភាកម្ពុជា នៅថ្ងៃទី ២២ ខែតុលា។
លោកបញ្ជាក់ថា៖ «អ៊ីចឹង យើងគួរតែយកអ្វីដែលជាមេរៀន ដែលយើងធ្លាប់បានជួបប្រទះពីអតីតកាល ដែលយើងធ្លាប់បែកបាក់ជាតិ ហើយដែលយើងធ្លាប់បង្រួបបង្រួមជាតិ ផ្សះផ្សារជាតិ យើងរួមសាមគ្គីគ្នា ក្រោមកិច្ចព្រមព្រៀង ហើយក្រោយមក យើងមានរដ្ឋធម្មនុញ្ញរបស់យើង»។
លោក ភា បន្តថា៖ «ដូច្នេះ យើងបន្តទៅមាគ៌ាគោលការណ៍គំនិតពហុនិយមដើម្បីសង្គមជាតិយើងទាំងអស់គ្នា ចៀសវាងការប្រើប្រាស់កិច្ចព្រមព្រៀងសន្តិភាពទីក្រុងប៉ារីសបកស្រាយដើម្បីហេតុផលនយោបាយ ដើម្បីហេតុផល ផលប្រយោជន៍ផ្សេងៗ ដែលផ្ទុយទៅនឹងអ្វីដែលជាផលប្រយោជន៍ជាតិ ហើយសូមឱ្យការចងចាំនេះ ជាការចងចាំមួយសម្រាប់ឱ្យយើងបញ្ចៀសភាពច្រំដែលនៃប្រវត្តិសាស្ត្រ»៕
