.jpg)
លោកស្រី ឱ វណ្ណឌីន ប្រគល់អំណោយជូនដល់លោកយាយ លោកតាមានអាយុចាប់ពី ១០០ឆ្នាំឡើង ដែលស្ម័គ្រចិត្តចាក់វ៉ាក់សាំងការពារជំងឺកូវីដ ១៩ ក្នុងស្រុកអង្គរជ័យ ខេត្តកំពត ថ្ងៃទិ ២១ ខែតុលា។ រូបភាព ក្រសួងសុខាភិបាល
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានថ្លែងឱ្យដឹងថា ការផ្ដល់អំណោយជូនមនុស្សចាស់ដែលមានវ័យចាប់ពី ១០០ ឆ្នាំឡើង ស្ម័គ្រចិត្តចាក់វ៉ាក់សាំងកូវីដ ១៩ ត្រូវបានបញ្ចប់ត្រឹមថ្ងៃទី ២១ ខែ តុលា ឆ្នាំ ២០២១ សរុបមានចំនួនជាង ១០០ នាក់។
លោកស្រីបានលើកឡើងក្នុងពេលចុះផ្ដល់អំណោយជូនមនុស្សចាស់ស្ម័គ្រចិត្តចាក់វ៉ាក់សាំងនៅក្នុងខេត្តកំពត កាលពីថ្ងៃទី ២១ ថា មនុស្សចាស់ដែលមានអាយុចាប់ពី ១០០ ឆ្នាំឡើង ដែលបានចាក់វ៉ាក់សាំងមានសរុបនៅទូទាំងប្រទេសចំនួន ១៤៩ នាក់ ក្នុងនោះលោកយាយមានចំនួនរហូតដល់ ១០០ នាក់ ហើយការផ្តល់អំណោយជូនពួកគាត់នេះក៏បានបិទបញ្ចប់ផងដែរ។
លោកស្រី ឱ វណ្ណឌីន បានមានប្រសាសន៍ថា៖ «ខ្ញុំយល់ឃើញថា អ្វីដែលជាការសម្រេចចិត្តដ៏ខ្ពង់ខ្ពស់របស់សម្តេចនាយករដ្ឋមន្រ្តី គឺជាទង្វើមួយដ៏ល្អប្រសើរមែនទែន ហើយជាការបង្ហាញពីការគិតគូរដ៏ខ្ពង់ខ្ពស់បំផុតរបស់សម្តេចតេជោលើបញ្ហាសុខទុក្ខ និងការរស់នៅរបស់លោកតាលោកយាយ ត្បិតពួកគាត់មានអាយុពី ១០០ ឆ្នាំឡើងទៅហើយក៏ដោយ»។
អ្នកនាំពាក្យរូបនេះបានបញ្ជាក់ទៀតថា ទោះបីជាពួកគាត់មានអាយុច្រើនមែន ប៉ុន្តែពួកគាត់មានការរស់នៅដ៏ល្អប្រសើររបស់ពួកគាត់ដែរ។ អំណោយសប្បុរសធម៌របស់លោកនាយករដ្ឋមន្រ្តីនេះ ជាការបង្ហាញនូវទឹកចិត្តល្អប្រពៃរបស់ថ្នាក់ដឹកនាំដែលលោកបានផ្តល់ជាអំណោយដល់មនុស្សចាស់ទាំងនេះ។
អំណោយទាំងនោះមាន ទឹកប្រាក់ចំនួន ៣ លានរៀល និងគ្រឿងឧបភោគបរិភោគមួយចំនួនទៀត។
លោកស្រី ឱ វណ្ណឌីន បានបញ្ជាក់ផងដែរថា យុទ្ធនាការចាក់វ៉ាក់សាំងបង្ការជំងឺកូវីដ ១៩ ក្នុងក្របខ័ណ្ឌទូទាំងប្រទេស ជុំទី១ ទៅលើអ្នកដែលមានអាយុចាប់ពី ១៨ ឆ្នាំឡើង ត្រូវបានប្រកាសបិទបញ្ចប់នៅថ្ងៃទី ២១ ខែតុលា ប៉ុន្តែការចាក់នៅតែបន្តរហូតដល់គ្រប់គោលដៅ ១០០ ភាគរយ ដែលលោកស្រីរំពឹងថាអាចនឹងសម្រេចបាននៅរយៈពេលប្រមាណ ២ សប្តាហ៍ទៀត។
យោងតាមរបាយការណ៍របស់គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានឱ្យដឹងថា គិតត្រឹមថ្ងៃទី ២១ ខែតុលា អ្នកដែលបានចាក់វ៉ាក់សាំងបង្ការជំងឺកូវីដ ១៩ ចាប់ពីអាយុ ១៨ ឆ្នាំឡើងទៅ មានជាង ៩,៩ លាននាក់ ឬស្មើនឹង ៩៩ ភាគរយ បើធៀបនឹងចំនួនប្រជាជនគោលដៅ ១០ លាននាក់។
របាយការណ៍ដដែលបានបន្តថា សម្រាប់ក្រុមអាយុពី ១២ ឆ្នាំឡើងទៅ ដល់ក្រោម ១៨ ឆ្នាំ ដែលបានចាក់វ៉ាក់សាំងមានចំនួនជិត ១,៨ លាននាក់ ឬស្មើនឹង ៩០ ភាគរយ បើធៀបនឹងចំនួនគោលដៅជាង ១,៩ លាននាក់ ខណៈកុមារអាយុពី ៦ ឆ្នាំ ដល់ក្រោម ១២ ឆ្នាំ បានចាក់វ៉ាក់សាំងរួច មានជិត ១,៩ លាននាក់ ឬស្មើ ៩៩ ភាគរយ ធៀបនឹងចំនួនគោលដៅជិត ១,៩ លាននាក់៕
