ភ្នំពេញៈ ក្រសួងសង្គមកិច្ច អតីតយុទ្ធជន និងយុវនីតិសម្បទា ជំរុញឱ្យអង្គភាព និងមន្ទីររបស់ខ្លួនឆ្លើយតបឱ្យបានទាន់ពេលវេលា និងមានប្រសិទ្ធភាពខ្ពស់ទៅជនរងគ្រោះ ដោយសារទឹកជំនន់ និងខ្យល់ព្យុះ។
តាមរយៈសេចក្តីណែនាំនៅថ្ងៃទី ២២ ខែតុលា ក្រសួងបានប្រាប់អង្គភាព និងមន្ទីររបស់ខ្លួនឱ្យឆ្លើយតប ចំពោះបញ្ហាទឹកជំនន់ ជូនប្រជាជនដោយមានការទទួលខុសត្រូវ និងមាន ប្រសិទ្ធភាពខ្ពស់ ដើម្បីចូលរួមកាត់បន្ថយផលប៉ះពាល់អវិជ្ជមាននៃទឹកជំនន់។
ក្រសួងក៏បានប្រាប់ដល់អង្គភាពទាំងនេះឱ្យធ្វើការប៉ាន់ប្រមាណធនធាន និងកំណត់មូលនិធិ និងធនធាន ដើម្បីគាំទ្រឱ្យមានប្រសិទ្ធភា និងរាយការណ៍ជូនក្រសួងជាបន្ទាន់ អំពីចំនួនប្រជាជន ស្ថានភាព និងទីតាំងដែលកំពុងជួបបញ្ហាទឹកជំនន់។
សេចក្តីណែនាំបញ្ជាក់ថា៖ «សហការរៀបចំផែនការសកម្មភាព ចុះដោះស្រាយ ឆ្លើយតបបញ្ហាទឹកជំនន់ និងការកើតមានជំងឺផ្សេងៗ មកលើប្រជាជនជូនក្រសួង ដើម្បីតាមដាន និងដោះស្រាយជាបន្ទាន់។ ត្រូវធ្វើការអង្កេតទិន្នន័យនៃផលប៉ះពាល់ ដើម្បីរៀបចំផែនការឆ្លើយតប និងត្រៀមបម្រុងក្នុងការផ្តល់ការអន្តរាគមន៍»។
ក្រសួងបានណែនាំឱ្យអង្គភាព និងមន្ទីររបស់ខ្លួនត្រូវអន្តរាគមន៍ ផ្តល់ស្បៀងសង្គ្រោះបន្ទាន់ ដល់ជនរងគ្រោះ ចុះតាមដាន និងស្រង់ទិន្នន័យជនរងគ្រោះជាប្រចាំដើម្បីរៀបចំឆ្លើយតបជូនប្រជាជនឱ្យបានទាន់ពេលវេលា។
សេចក្តីណែនាំបញ្ជាក់ថា៖ «អគ្គនាយកដ្ឋានបច្ចេកទេស នាយកដ្ឋានជំនាញពាក់ព័ន្ធ និងមន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានី-ខេត្តទាំងអស់ ត្រូវខិតខំអនុវត្តប្រកបដោយប្រសិទ្ធភាពខ្ពស់ និងឆ្លើយតបទាន់ពេលវេលា»៕