ភ្នំពេញៈ ស្ថានទូតសាធារណរដ្ឋសហព័ន្ធអាល្លឺម៉ង់ប្រចាំកម្ពុជាបានប្រគល់ម៉ាស៊ីនជំនួយដកដង្ហើមចំនួន ៨០ គ្រឿងដល់ក្រសួងសុខាភិបាលកម្ពុជាកាលពីថ្ងៃទី ២១ តុលា ដើម្បីជួយដល់អ្នកជំងឺកូវីដ ១៦ ប្រភេទធ្ងន់។
ពិធីប្រគល់ទទួលនេះត្រូវបានធ្វើឡើងនៅក្រសួងសុខាភិបាលរវាងឯកអគ្គរដ្ឋទូតអាល្លឺម៉ង់លោក Christian Berger និង លោក ម៉ម ប៊ុនហេង រដ្ឋមន្ត្រីក្រសួងសុខាភិបាលកាលពីរសៀលថ្ងៃទី ២១ ខែតុលាឆ្នាំ ២០២១។
យោងតាមស្ថានទូតសាធារណរដ្ឋសហព័ន្ធអាល្លឺម៉ង់ប្រចាំកម្ពុជាបានឱ្យដឹងថា ម៉ាស៊ីនជំនួយដកដង្ហើមទាំង ៨០ គ្រឿងដែលត្រូវបានដឹកមកដល់កម្ពុជាកាលពីពេលថ្មីៗនេះនឹងត្រូវផ្តល់ជូនមន្ទីរពេទ្យកុមារជាតិចំនួន ១០ គ្រឿង មន្ទីរពេទ្យខេត្តកំពតចំនួន ៣០ គ្រឿង មន្ទីរពេទ្យខេត្តកែបចំនួន ១០ គ្រឿង និង ៣០ គ្រឿងទៀតទៅមន្ទីរពេទ្យខេត្តកំពង់ធំ។
ម៉ាស៊ីនជំនួយដកដង្ហើមនេះត្រូវបានផ្ដល់ជូនតាមរយៈកញ្ចប់គាំទ្រហេដ្ឋារចនាសម្ព័ន្ធសំខាន់ៗដល់មន្ទីរពេទ្យជាតិ និងមន្ទីរពេទ្យខេត្តពីក្រសួងអភិវឌ្ឍន៍សេដ្ឋកិច្ច និងសហប្រតិបត្តិការនៃសហព័ន្ធអាល្លឺម៉ង់ និងចែកចាយដោយទីភ្នាក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិ (GIZ)។
សរុបមកប្រទេសអាល្លឺម៉ង់បានផ្តល់ថវិកាចំនួន ៥,០១១ លានដុល្លារអាមេរិក ជាមូលនិធិបន្ថែមលើអន្តរាគមន៍ជំងឺកូវីដ ១៩ ក្នុងកិច្ចសហប្រតិបត្តិការបច្ចេកទេសលើវិស័យសុខាភិបាលនៅកម្ពុជា។ ក្នុងនោះថវិកាប្រមាណ ១,៣ លានដុល្លារត្រូវបានចំណាយទៅលើការគាំទ្រលើសម្ភារបរិក្ខារវេជ្ជសាស្ត្រ និងហេដ្ឋារចនាសម្ព័ន្ធ៕