ភ្នំពេញៈ រដ្ឋបាលរាជធានីភ្នំពេញ ជូនដំណឹងស្តីពីការដាក់ឱ្យអនុវត្តតារាងកម្រៃសេវាគ្រប់គ្រងសំរាម សំណល់រឹង (ថ្មី) នៅរាជធានីភ្នំពេញ ដើម្បីធានាប្រក្រតីភាពនៃប្រតិបត្តិការថ្មី និងឱ្យត្រូវតាមការអភិវឌ្ឍរបស់ប្រទេសជាតិនាពេលបច្ចុប្បន្ន។
លិខិតរបស់ លោក ឃួង ស្រេង អភិបាលរាជធានីភ្នំពេញ ជូនដំណឹងទៅដល់ប្រជាពលរដ្ឋ កាលថ្ងៃទី ២២ ខែតុលា បានឱ្យដឹងថា អាជ្ញាធររាជធានីភ្នំពេញ បានសហការជាមួយក្រុមការងារ អន្តរក្រសួង និងអាជ្ញាធរមូលដ្ឋាន និងបានប្រើប្រាស់សេវាប្រឹក្សា យោបល់បច្ចេកទេស របស់ក្រុមហ៊ុន GRISIL Risk and Infrastructure Solution Limited ដើម្បីសិក្សាធ្វើបច្ចុប្បន្ន ភាពរៀបចំតារាងកម្រៃសេវាឡើងវិញ។
លោក ឃួង ស្រេង បញ្ជាក់ថា ដោយយកតារាងកម្រៃសេវាចាស់ ឆ្នាំ ២០០៣ ជាគោល និងផ្អែកលើមូលដ្ឋាន គោលនយោបាយ ការវិភាគ ការវាយតម្លៃ ប្រកបដោយលក្ខណៈវិទ្យាសាស្ត្រ គោលការណ៍សមធម៌ ស្របតាមកំណើនសេដ្ឋកិច្ចរបស់ប្រទេសជាតិ និងជីវភាពរស់នៅរបស់ប្រជាពលរដ្ឋនាពេលបច្ចុប្បន្ន សម្រេចបានតារាងតម្លៃថ្មី ដែលចែកជា ២ប្រភេទ។
ទី ១ គឺ ទីតាំងមិនប្រកបអាជីវកម្មមាន ១៦ អនុប្រភេទ ស្មើនឹង ៨០ភាគរយនៃទីតាំងសរុប និងទី ២ ទីតាំងប្រកបអាជីវកម្ម មាន៣៦ អនុប្រភេទ ស្មើនឹង ២០ភាគរយ នៃទីតាំងសរុប ដែលក្នុងនោះ ១៥ភាគរយ ជាអាជីវកម្ម សេវាកម្ម និងហាងទំនិញ ដែលនឹងដាក់ឱ្យអនុវត្តចាប់ពីថ្ងៃទី១ ខែវិច្ឆិកា ឆ្នាំ ២០២១ តទៅ។
ក្នុងលិខិតលោក ឃួង ស្រេង បានឱ្យដឹងទៀតថា រដ្ឋបាលរាជធានីភ្នំពេញ ជម្រាបជូនដំណឹងដល់ម្ចាស់លំនោឋាន ម្ចាស់អាជីវកម្ម សេវាកម្ម និងបងប្អូនប្រជាពលរដ្ឋទាំងអស់នៅរាជធានីភ្នំពេញ ជ្រាបថា ក្នុងការធ្វើកំណែទម្រង់ នៃការគ្រប់គ្រងសំរាម និងសំណល់រឹង នៅរាជធានីភ្នំពេញ តាមរយៈការដេញថ្លៃជ្រើសរើសប្រតិបត្តិករថ្មី ចំនួន ៣ ដើម្បីផ្តល់សេវា សម្អាត ប្រមូល និងដឹកជញ្ជូនសំរាមនៅរាជធានីភ្នំពេញ បានដំណើរការផ្តល់សេវាចាប់ពីថ្ងៃទី ១ ខែកក្កដា ឆ្នាំ ២០២១ រហូតដល់បច្ចុប្បន្ន។
ជាលទ្ធផល មានការសាទរ និងវាយតម្លៃខ្ពស់ពីបងប្អូនប្រជាពលរដ្ឋថា មានការផ្លាស់ប្តូរគុណភាព សេវា គួរឱ្យកត់សម្គាល់ ជាអាទិ៍ មិនមានគំនរសំរាមសេសសល់ច្រើនដូចមុន ការប្រមូលបានទៀងទាត់ជាងមុន ស្អាតជាងមុន មធ្យោបាយនិងសម្ភារបរិក្ខារប្រើប្រាស់ថ្មីជាងមុន បុគ្គលិកកម្មករច្រើន និងមានការអប់រំជាងមុន ដែលប្រការនេះបានធ្វើឱ្យមានការសាទរជាបណ្តើរៗ ពីគ្រប់មជ្ឈដ្ឋាន នៅរាជធានីភ្នំពេញ។
លោក ឃួង ស្រេង បញ្ជាក់បន្ថែមថា ទន្ទឹមនឹងលទ្ធផលគួរជាទីមោទនៈនេះរដ្ឋបាលរាជធានីភ្នំពេញ កត់សម្គាល់ឃើញថា ការអនុវត្តការបង់ប្រាក់ ថ្លៃសេវាប្រមូល និងដឹកជញ្ជូនសំរាម សំណល់រឹង ដោយប្រើប្រាស់តារាងបង់ប្រាក់ឆ្នាំ ២០០៣ គឺមិនទាន់ឆ្លើយតបទៅនឹងកំណើនសេដ្ឋកិច្ចរបស់ប្រទេសជាតិ កំណើនសន្ទស្សន៍ថ្លៃទំនិញ និងជីវភាពរស់នៅនាពេលបច្ចុប្បន្នឡើយ។
ពិសេសមិនមានលទ្ធភាពទូទាត់ថ្លៃសេវាសម្អាត ប្រមូល និងដឹកជញ្ជូនសំរាម ទៅកាន់ទីលានជូនប្រតិបត្តិករទាំង ៣ (ដែលបានប្រើប្រាស់រថយន្តដឹកសំរាម រថយន្តបោសថ្នល់ រថយន្តបាញ់លាងសម្អាតថ្នល់ ម៉ូតូកង់បីប្រើអាគុយ ម៉ូតូកង់បីធាក់ជើង កង់ប្រមូលសំរាម ធុងសំរាម និងសម្ភារប្រមូលសំរាមផ្សេងៗទៀតក្នុងពេលថ្មីៗ។ ព្រមទាំងប្រាក់បៀវត្សបុគ្គលិក កម្មករ ដែលមានតម្លៃខ្ពស់ជាងមុន) ទើបសម្រេចធ្វើការដាក់ឱ្យអនុវត្តតារាងកម្រៃសេវាគ្រប់គ្រងសំរាម សំណល់រឹង (ថ្មី)នេះ។
លោកបានស្នើសុំថា៖«ទទួលបានសេចក្តីជូនដំណឹងនេះ សូមម្ចាស់លំនៅឋាន ម្ចាស់អាជីវកម្ម សេវាកម្ម និងបងប្អូន ប្រជាពលរដ្ឋ ទាំងអស់នៅរាជធានីភ្នំពេញ មេត្តាជ្រាប និងអនុវត្តឱ្យមានប្រសិទ្ធភាពខ្ពស់» ៕
វីដេអូ៖