មណ្ឌលគិរីៈ អភិបាលខេត្តមណ្ឌលគិរី ជំរុញដល់មន្ត្រីជំនាញ ត្រូវរៀបចំសណ្ដាប់ធ្នាប់ឱ្យមានរបៀបរៀបរយក្នុងផ្សារក្រុងសែនមនោរម្យ ដើម្បីឱ្យសោភ័ណភាព និងស្នើដល់អាជីវករចូលរួមរក្សាអនាម័យបរិស្ថានឱ្យបានល្អ។
ក្នុងពេលចុះជួបសំណេះសំណាលជាមួយអាជីវករ និងពិនិត្យមើលស្ថានភាព ផ្សារក្រុងសែនមនោរម្យ កាលពីថ្ងៃទី២២ ខែតុលា លោក ថង សាវុន អភិបាលខេត្តមណ្ឌលគិរី បានធ្វើការណែនាំដល់អង្គភាពពាក់ព័ន្ធ ជាពិសេសរដ្ឋបាលក្រុងសែនមនោរម្យ ត្រូវយកចិត្តទុកដាក់គិតគូរពីសណ្ដាប់ធ្នាប់សាធារណៈ ដើម្បីឱ្យមានសោភ័ណភាព និងបរិស្ថានល្អ នៅក្នុងក្រុងសែនមនោរម្យ។
លោកអភិបាលខេត្តនេះ បានស្នើដល់អាជ្ញាធរក្រុងរៀបចំសម្អាតបរិវេណសួនឧទ្យាន ចាប់ពីរូបសំណាកដំរីដែក រហូតដល់វិមានឯករាជ្យ។ ត្រូវរៀបចំកន្លែងលក់ដូរថ្មី ឱ្យបានសមរម្យសម្រាប់អាជីវករ ដែលដាក់តាំងលក់ដូរ ជុំវិញបរិវេណរង្វង់មូលគោព្រៃ ដើម្បីរៀបចំសណ្តាប់ធ្នាប់ជុំវិញបរិវេណរង្វង់មូលនេះឱ្យមានសោភ័ណភាព សម្រាប់ទទួលភ្ញៀវទេសចរផងដែរ។
លោកបញ្ជាក់ថា ៖«អាជីវករទាំងអស់ ត្រូវគិតគូរពីប្រយោជន៍រួម កុំដាក់តាំងទំនិញនៅលើចំណីផ្លូវសាធារណៈ ចូលរួមវេចខ្ចប់សំរាម និងរក្សាអនាម័យតាមកន្លែងលក់រៀងៗខ្លួន ធ្វើយ៉ាងណាឱ្យផ្សាររបស់យើងមានសោភ័ណភាព របៀបរៀបរយ។ ម្យ៉ាងទៀត អាជ្ញាធរក្រុង និងអង្គភាព ជំនាញពាក់ព័ន្ធ ត្រូវចូលរួមសម្របសម្រួល ដោះស្រាយបញ្ហាផ្សេងៗ ដែលអាជីវករស្នើសុំឱ្យបានទាន់ពេលវេលា» ៕