.jpg)
សមត្ថកិច្ចនគរបាលស្រុកស្រែអំបិល ឃាត់ខ្លួនជនសង្ស័យ ៦ នាក់ ពេលចុះបង្ក្រាបករណីជួញដូរ និងរក្សាទុកនូវសារជាតិញៀន ប្រមាណ ២៣០ គីឡូក្រាម ស្ថិតក្នុងភូមិចំការក្រោម ឃុំស្រែអំបិល ស្រុកស្រែអំបិល ខេត្តកោះកុង កាលពីម្សិលមិញ។ អធិការដ្ឋាន ន.ប ស្រុកស្រែអំបិល
កោះកុងៈ សមត្ថកិច្ចនគរបាលស្រុកស្រែអំបិល ឃាត់ខ្លួនជនសង្ស័យ ៦ នាក់ ពេលចុះបង្ក្រាបករណីជួញដូរ និងរក្សាទុកនូវសារជាតិញៀន ប្រមាណ ២៣០ គីឡូក្រាម ស្ថិតក្នុងភូមិចំការក្រោម ឃុំស្រែអំបិល ស្រុកស្រែអំបិល ខេត្តកោះកុង នៅថ្ងៃទី ២២ ខែតុលានេះ។
លោកវរសេនីយ៍ឯក ហួន នុន អធិការនគរបាលស្រុកស្រែអំបិលបានឱ្យដឹងថា ដោយមានការចង្អុលបង្ហាញផ្ទាល់ពីលោកឧត្តមសេនីយ៍ទោ គង់ មនោ ស្នងការខេត្តកោះកុង និងដោយមានការសម្របសម្រួលរបស់លោក អេង ចាន់ភារ៉ា ព្រះរាជអាជ្ញារងអមសាលាដំបូងខេត្តកោះកុង។ កម្លាំងសមត្ថកិច្ចបង្ក្រាបបានជនសង្ស័យចំនួន ៦ នាក់ ភេទប្រុស ក្នុងនោះមានជនជាតិថៃចំនួន ២ នាក់។
លោកអធិការបញ្ជាក់ថា ជនជាតិថៃ ២ នាក់នោះ ជាមេក្លោងមានឈ្មោះ SUNGSING -PRAMOCH ភេទប្រុស អាយុ ៥៦ ឆ្នាំ នៅខេត្តស៊ូរ៉ាត់ថានី ប្រទេសថៃ ជនជាតិថៃ និងម្នាក់ទៀត ឈ្មោះ SAE-THAO ភេទប្រុស អាយុ ៥៦ ឆ្នាំ នៅខេត្តណាន ប្រទេសថៃ ជនជាតិថៃ។
ដោយឡែក ជនសង្ស័យ ៤ នាក់ទៀត មានឈ្មោះ លែន ណាក ភេទប្រុសអាយុ ៤១ ឆ្នាំ ជនជាតិខ្មែរ កម្មករនៅខេត្តតាកែវ ឈ្មោះ នៅ ចន្ធូ ភេទប្រុសអាយុ ៣៩ ឆ្នាំ ជនជាតិខ្មែរ នៅខេត្តព្រៃវែង ជាកម្មករ ឈ្មោះ ពេជ្រ តុង ភេទប្រុស អាយុ ៣៩ ឆ្នាំ ជាកម្មករ នៅខេត្តស្វាយរៀង និង ឈ្មោះ រស់ ថាញ់ ភេទប្រុសអាយុ ៤២ ឆ្នាំជាកម្មករនៅខេត្តតាកែវ។
បើតាមលោកអធិការនគរបាលស្រុកស្រែអំបិល ដំបូងកម្លាំងសមត្ថកិច្ចនៃស្រុកស្រែអំបិល បានចុះឃាត់អូប័រមួយគ្រឿងមានគ្នា ៤ នាក់ ករណីមានការសង្ស័យ ដែលការឃាត់ខ្លួនជនសង្ស័យចំនួន ៤ នាក់នេះ ធ្វើឡើងត្រង់ចំណុចភូមិចម្ការក្រោម ឃុំស្រែអំបិល។
លោកថា សមត្ថកិច្ចបានត្រួតពិនិត្យនៅនឹងកន្លែងភ្លាមៗ ដោយបានឆែកឆេររកឃើញគ្រឿងញៀនជាង ២៣០ គីឡូក្រាម និងបាននាំខ្លួនជនសង្ស័យទាំង ៤ នាក់នោះ យកទៅសាកសួរ។ ជនសង្ស័យបានសារភាពថា បានដឹកជញ្ជូនគ្រឿងញៀនទាំងនោះ មកពីទូក (បាហួរអន) ស្ថិតនៅចំណុចភូមិកំពង់ស្តាំ ឃុំជ្រោយស្វាយ ពេលដឹងព័ត៌មាននេះ ទើបសមត្ថកិច្ចបានបន្តដំណើរទៅឃាត់មនុស្សបាន ២ នាក់បន្ថែមទៀតនៅលើទូក។
លោកវរសេនីយ៍ឯក ហួន នុន បញ្ជាក់បន្ថែមថា ក្នុងប្រតិបត្តិការនេះ កម្លាំងសមត្ថកិច្ចបានចាប់រឹបអូសបានវត្ថុតាងរួមមាន ទូកឈើចំនួន ១ គ្រឿង (ធំ) ម្សៅក្រាមពណ៌ស សង្ស័យជាសារធាតុញៀនចំនួន ១០ កះទឹកសុទ្ធ (ស្មើប្រមាណជាង ២០០ Kg ថ្លឹងជញ្ជីងដៃ)។
លោកថ្លែងថា៖ «ចំពោះវត្ថុតាង និងជនសង្ស័យត្រូវបានឃាត់ខ្លួនយកមកកាន់អធិការដ្ឋាននគរបាលស្រុក និងបញ្ជូនបន្តទៅកាន់ស្នងការដ្ឋាននគរបាលខេត្តកោះកុង ដើម្បីសាកសួរ និងកសាងសំណុំរឿង ដើម្បីបញ្ជូនទៅកាន់តុលាការខេត្តចាត់ការបន្ត»៕
