.jpg)
ផ្សារកំពង់ក្ដីត្រូវបានសម្រេចបើកឡើងវិញ ក្រោយស្ថានភាពកូវីដធូរស្រាលឡើងវិញ។ រូបថត ហ្វេសប៊ុក
សៀមរាបៈ រដ្ឋបាលខេត្តសៀមរាបសម្រេចបើកផ្សារចំនួន ៣ ឡើងវិញ ដែលមានផ្សារដំដែក ផ្សាររលួស និងផ្សារកំពង់ក្តី បន្ទាប់ពីត្រូវបានដាក់ចេញវិធានការរដ្ឋបាល ដើម្បីគ្រប់គ្រងការឆ្លងរាលដាលនៃជំងឺកូវីដ ១៩ ក្នុងផ្សារទាំងនោះ។
លិខិតរបស់រដ្ឋបាលខេត្តសៀមរាប នៅថ្ងៃទី ២២ ខែតុលា បានសម្រេចបើកឡើងវិញនូវផ្សារដំដែក ដែលស្ថិតក្នុងភូមិដំដែកផ្សារ ឃុំដំដែក ស្រុកសូទ្រនិគម ខេត្តសៀមរាប ផ្សាររលួស ដែលស្ថិតក្នុងភូមិដូនទាវ ឃុំរលួស ស្រុកប្រាសាទបាគង ខេត្តសៀមរាប និងផ្សារកំពង់ក្តី ដែលស្ថិតក្នុងភូមិកំពង់ក្តី២ ឃុំកំពង់ក្តី ស្រុកជីក្រែង ខេត្តសៀមរាប។
នៅថ្ងៃដដែលនោះ រដ្ឋបាលខេត្តសៀមរាប បាននិរាករណ៍សេចក្តីសម្រេចស្តីពីការបិទផ្សារទាំងនោះ ដែលជាទីតាំងមានការឆ្លងរាលដាលជំងឺកូវីដ ១៩ ផងដែរ៕
