ភ្នំពេញៈមនុស្សចំនួន ៩ នាក់បានស្លាប់ ដោយសារជំងឺកូវីដ ១៩ បន្ថែមទៀត ដែលក្នុងនោះមាន ៧ នាក់មិនបានចាក់វ៉ាក់សាំងកូវីដ ១៩ នោះទេ ខណៈដែលក្រសួងសុខាភិបាលក៏បានរកឃើញអ្នកឆ្លងថ្មីជាង ១០០ នាក់ទៀត និងមានអ្នកជាសះស្បើយជាង ៣០០ នាក់ផងដែរ។
យោងតាមសេចក្តីប្រកាសរបស់ក្រសួងសុខាភិបាលនៅព្រឹកថ្ងៃទី ២៤ ខែតុលាឆ្នាំ ២០២១ នេះ បានឱ្យដឹងថា ក្រសួងបានរកឃើញមានអ្នកវិជ្ជមានវីរុសកូវីដ១៩ចំនួន ១២៨ (PCR)នាក់ទៀត និងមានអ្នកជាសះស្បើយ ចំនួន ៣១៩ នាក់។ អ្នកដែលបានរកឃើញឆ្លងនេះមានករណីឆ្លងសហគមន៍ ចំនួន ១១៤នាក់ និងអ្នកដំណើរពីបរទេស ចំនួន១៤នាក់។
គិតត្រឹមព្រឹក ថ្ងៃទី ២៤ ខែតុលា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ សរុបទូទាំងប្រទេសចំនួន ១១៧ ៧៧២ នាក់ អ្នកជាសះស្បើយសរុបចំនួន ១១២ ៩៧៧ នាក់ និងអ្នកស្លាប់សរុបបានកើនដល់ចំនួន ២ ៧៣៤ នាក់៕