.jpg)
គ្រឿងញៀនជាង ២០០ គីឡូក្រាមដែលសមត្ថកិច្ចនគរបាលបង្ក្រាបបាន កាលពីថ្ងៃទី ២២ តុលា នៅស្រុកស្រែអំបិល ខេត្តកោះកុង។ រូបថត ប៉ូលិស
ភ្នំពេញៈ ជនសង្ស័យ ៦ នាក់ ដែលក្នុងនោះមានជនជាតិថៃ ២នាក់ ពាក់ព័ន្ធនឹងគ្រឿងញៀនជាង ២០០ គីឡូក្រាម ដែលបង្ក្រាបបាននៅស្រុកស្រែអំបិល កាលពីថ្ងៃទី ២២ ខែតុលា កំពុងស្ថិតក្រោមការសួរចម្លើយរបស់សមត្ថកិច្ចនគរបាលនៃស្នងការដ្ឋាននគរបាលខេត្តកោះកុងនៅថ្ងៃទី ២៤ តុលា។
លោកឧត្តមសេនីយ៍ត្រីហេង តុលា ស្នងការរងទទួលផែន ការងារគ្រឿងញៀន នៃស្នងការដ្ឋាននគរបាលខេត្តកោះកុង ថ្លែងនៅរសៀលថ្ងៃទី ២៤ ខែតុលាថា ជនសង្ស័យ ៦ នាក់កំពុងស្ថិតក្នុងការសួរនាំដោយមន្ត្រីនគរបាលយុត្តិធម៌ មិនទាន់បានបញ្ជូនទៅកាន់តុលាការនៅឡើយទេ។
លោកថ្លែងថា៖«ជនសង្ស័យទាំង ៦ នាក់នោះ មានជនជាតិថៃ២នាក់ និងខ្មែរ ៤ នាក់ យើងកំពុងបន្តនីតិវិធីសួរនាំនៅឡើយ»។
លោកវរសេនីយ៍ឯកហួន នុន អធិការនគរបាលស្រុកស្រែអំបិលបានឱ្យដឹងថា កម្លាំងសមត្ថកិច្ចបង្ក្រាបបានជនសង្ស័យ៦នាក់ និងគ្រឿងញៀន ជាង ២០០ គីឡូក្រាម ក្នុងស្រុកស្រែអំបិល ខេត្តកោះកុង កាលពីថ្ងៃទី ២២ ខែតុលា។
បើតាមលោកអធិការនគរបាលស្រុកស្រែអំបិល ពីដំបូងកម្លាំងសមត្ថកិច្ចនគរបាលស្រុកស្រែអំបិល បានចុះឃាត់អូប័រ១គ្រឿង ដោយករណីមានការសង្ស័យ ហើយបានឃាត់ខ្លួនជនសង្ស័យទាំង ៤ នាក់នេះ នៅត្រង់ចំណុចភូមិចម្ការក្រោម ឃុំស្រែអំបិល។
លោកថា សមត្ថកិច្ចបានត្រួតពិនិត្យនៅនឹងកន្លែងភ្លាមៗ ដោយបានឆែកឆេររកឃើញគ្រឿងញៀនជាង ២០០ គីឡូក្រាម និងបានសាកសួរជនសង្ស័យទាំង ៤ នាក់។ ជនសង្ស័យបានសារភាពថា បានដឹកជញ្ជូនគ្រឿងញៀនទាំងនោះ មកពីទូក(បាហួរអន) ស្ថិតនៅចំណុចភូមិកំពង់ស្តាំ ឃុំជ្រោយស្វាយ។ ពេលដឹងព័ត៌មាននេះ ទើបសមត្ថកិច្ចបានបន្តដំណើរទៅឃាត់មនុស្សបាន ២ នាក់បន្ថែមទៀតនៅលើទូក។
លោកវរសេនីយ៍ឯកហួន នុន ថ្លែងថា៖«ក្នុងប្រតិបត្តិការនេះ កម្លាំងសមត្ថកិច្ចបានចាប់រឹបអូសបានវត្ថុតាង រួមមាន ទូកឈើធំចំនួន ១ គ្រឿង ម្សៅក្រាមពណ៌ស សង្ស័យជាសារធាតុញៀនចំនួន ១០ កេសទឹកសុទ្ធ (ស្មើប្រមាណជាង ២០០ Kg ថ្លឹងជញ្ជីងដៃ)។
លោកបញ្ជក់ថា ចំពោះវត្ថុតាង និងជនសង្ស័យត្រូវបានឃាត់ខ្លួនយកមកកាន់អធិការដ្ឋាននគរបាលស្រុក និងបញ្ជូនបន្តទៅកាន់ស្នងការដ្ឋាននគរបាលខេត្តកោះកុង នៅថ្ងៃទី២៣ តុលា ដើម្បីសាកសួរ និងកសាងសំណុំរឿង ដើម្បីបញ្ជូនទៅកាន់តុលាការខេត្តចាត់ការបន្ត។
ដោយឡែក សមត្ថកិច្ចជំនាញនៃមន្ទីរប្រឆាំងបទល្មើសគ្រឿងញៀន បង្ក្រាបករណីជួញដូរគ្រឿងញៀន ចាប់ខ្លួនក្រុមឧក្រិដ្ឋជនគ្រឿងញៀន ជនជាតិខ្មែរ៦នាក់ និងរឹបអូសគ្រឿងញៀនជិត ៣ គីឡូក្រាម នៅរាជធានីភ្នំពេញ កាលពីថ្ងៃទី១៩ ខែតុលា នៅចំណុចក្នុងហាងបុប្ផាលាក់ខ្លួន ផ្លូវទន្លេមេគង្គ សង្កាត់ព្រែកលាប ខណ្ឌជ្រោយចង្វា រាជធានីភ្នំពេញ។ ជនសង្ស័យ និងវត្ថុតាងចាប់យក ត្រូវបានសមត្ថកិច្ចជំនាញ កសាងសំណុំរឿងបញ្ជូនទៅសាលាដំបូងរាជធានីភ្នំពេញបន្តតាមនីតិវិធី។
ចំណែកកម្លាំងការិយាល័យប្រឆាំងគ្រឿញៀន នៃស្នងការដ្ឋាននគរបាលរាជធានីភ្នំពេញនៅថ្ងៃទី ២១ ខែតុលា បន្ទាប់ពីទទួលបានព័ត៌មានពីការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តព្រះវិហារ ថា មានករណីជួញដូរដោយខុសច្បាប់នូវសារធាតុញៀន(តាមបញ្ញើអីវ៉ាន់)មកភ្នំពេញ ក៏បានធ្វើការសហការជាមួយកម្លាំងនៃអធិការដ្ឋាននគរបាលខណ្ឌដូនពេញ ចុះទៅត្រួតពិនិត្យដល់ក្រុមហ៊ុនដឹកអ្នកដំណើរឈ្មោះ GTF នៅចំណុចផ្លូវលេខ១៤២ កែងផ្លូវលេខ ៨១ សង្កាត់ផ្សារថ្មីទី២ ខណ្ឌដូនពេញ រាជធានីភ្នំពេញ។
ជាលទ្ធផល កម្លាំងសមត្ថកិច្ច បានត្រួតពិនិត្យឆែកឆេររកឃើញវត្ថុតាង រួមមាន ក្រាមពណ៌ផ្កាឈូកសង្ស័យជាសារធាតុញៀន ចំនួន ២ កញ្ចប់។ សម្បកថង់សម្រាប់ច្រកគ្រឿងញៀនមួយចំនួន និងកាបូបស្ពាយពណ៌ទឹកប៊ិក សម្រាប់ទុកគ្រឿងញៀន ចំនួន ១។ នៅថ្ងៃទី ២២ ខែតុលា ឆ្នាំ២០២១ កម្លាំងការិយាល័យប្រឆាំងគ្រឿញៀន នៃស្នងការដ្ឋាននគរបាលរាជធានីភ្នំពេញ បានប្រគល់វត្ថុតាងខាងលើទៅឱ្យកម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តព្រះវិហារ ដើម្បីចាត់ការបន្តតាមនីតិធី៕
