ភ្នំពេញៈ កម្ពុជា និងវៀតណាម បញ្ជាក់ជំហរជាថ្មីនូវការប្តេជ្ញាចិត្តក្នុងការបន្តពង្រឹងទំនាក់ទំនងទ្វេភាគីរវាងប្រទេសទាំង ២ ដើម្បីស្វែងរកសក្តានុពលបន្ថែមទៀត សម្រាប់ជាប្រយោជន៍ប្រជាជននៃប្រទេសទាំង ២។
ការប្រកាសជំហរជាថ្មីបែបនេះ ធ្វើឡើងក្នុងកិច្ចប្រជុំពិគ្រោះយោបល់នយោបាយរវាងកម្ពុជា និងវៀតណាម លើកទី ៧ ដែលលោកស្រី សឿង រដ្ឋចាវី រដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិកម្ពុជា និងលោក ង្វៀន គួកហ្ស៊ុង អនុរដ្ឋមន្ត្រីការបរទេសវៀតណាមធ្វើជាសហប្រធាននៃកិច្ចប្រជុំនេះកាលពីថ្ងៃទី ២១ ខែតុលា តាមប្រព័ន្ធវីដេអូ។
សេចក្តីប្រកាសព័ត៌មានក្រសួងការបរទេសកម្ពុជាដែលចេញផ្សាយកាលពីថ្ងៃទី ២៤ ខែតុលាបញ្ជាក់ថា កម្ពុជា និងវៀតណាម ការផ្លាស់ប្តូរទំនាក់ទំនងជាញឹកញាប់រវាងថ្នាក់ដឹកនាំទាំង ២ តាមរយៈការជួបដោយផ្ទាល់ និងតាមរយៈប្រព័ន្ធវីដេអូ និងទូរស័ព្ទកន្លងមកទទួលបានលទ្ធផលវិជ្ជមាន។
ការប្រាស្រ័យទាក់ទង «ដ៏ល្អ» រវាងថ្នាក់ដឹកនាំបានជំរុញកិច្ចសហប្រតិបត្តិការរវាងប្រទេសទាំង ២ ឲ្យកាន់តែមានប្រសិទ្ធភាព និងប្រកបដោយផ្លែផ្កា។
សេចក្តីប្រកាសព័ត៌មានបញ្ជាក់ថា៖ «ភាគីទាំង ២ បានបញ្ជាក់ជាថ្មីម្ដងទៀត នូវការប្តេជ្ញាចិត្តយ៉ាងមុតមាំ ក្នុងការបង្កើនកិច្ចខិតខំប្រឹងប្រែងរួមទ្វេដង ក្នុងការធ្វើការជាមួយគ្នាយ៉ាងជិតស្និទ្ធ ដើម្បីបន្តធ្វើឱ្យទំនាក់ទំនងទ្វេភាគីរវាងកម្ពុជា និងវៀតណាមកាន់តែល្អប្រសើរឡើងថែមទៀត និងស្វែងរកនូវសក្តានុពលនានា របស់ប្រទេសទាំងពីរបន្ថែមទៀត ដើម្បីជាប្រយោជន៍សម្រាប់ប្រជាជនទាំង ២»។
ភាគីទាំង ២ កត់សម្គាល់ថា ទោះបីជាមានបញ្ហាប្រឈមនានាបណ្ដាលមកពីជំងឺរាតត្បាតនៃជំងឺកូវីដ ១៩ មិត្តភាពជាប្រពៃណី ទំនាក់ទំនង និងកិច្ចសហប្រតិបត្តិការរវាងប្រទេសទាំង ២ បានបន្តរីកលូតលាស់ លើគ្រប់វិស័យរួមមាននយោបាយ និងសន្តិសុខ ការឆ្លើយតបនឹងជំងឺរាតត្បាតកូវីដ ១៩ ពាណិជ្ជកម្ម និងវិនិយោគ អប់រំ និងវប្បធម៌ ទេសចរណ៍ ថាមពល ការតភ្ជាប់ និងកិច្ចសហការរវាងក្រសួងការ បរទេសទាំង ២។
ក្រសួងការបរទេសទាំង២បានប្រកាសជំហរពង្រឹង និងពង្រីកទំនាក់ទំនង និងកិច្ចសហប្រតិបត្តិការ រវាងប្រទេសទាំង ២ ដោយឈរលើស្មារតីនៃភាពជាអ្នកជិតខាងល្អ សាមគ្គីភាព ជំនឿទុកចិត្ត ការយោគយល់គ្នា និងការគោរពគ្នាទៅវិញទៅមក។
សេចក្តីប្រកាសព័ត៌មានបញ្ជាក់ថា៖ «ភាគីទាំង ២ បានកោតសរសើរ នូវវិធានការដ៏មានប្រសិទ្ធភាព ដែលបានដាក់ចេញដោយប្រទេសទាំង២ និងកិច្ចសហការជិតស្និទ្ធ ក្នុងការប្រយុទ្ធប្រឆាំង នឹងជំងឺរាតត្បាតសកលកូវីដ ១៩។ ភាគីទាំង ២ បានឯកភាពគ្នាអំពីភាពចាំបាច់ក្នុងការបន្តធ្វើការជិតស្និទ្ធ ដើម្បីជម្នះ វិបត្តិសុខភាពសកលដែលមិនធ្លាប់មានពីមុនមកនេះ»។
ចំពោះកិច្ចសហប្រតិបត្តិការក្នុងវិស័យការពារជាតិ និងសន្តិសុខ ភាគីទាំង២បានប្តេជ្ញាចិត្តក្នុងការពង្រឹងការសម្របសម្រួលដើម្បីបង្ការ និងប្រយុទ្ធប្រឆាំងនឹងបទល្មើសព្រហ្មទណ្ឌ រួមមានបទល្មើសពាក់ព័ន្ធនឹងគ្រឿងញៀន ការរត់ពន្ធ និងជួញដូរឈើ និងអាវុធខុសច្បាប់ តាមរយៈការផ្លាស់ប្តូរព័ត៌មានគ្នាឱ្យបានទាន់ពេលវេលា។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាប្រាប់ភ្នំពេញប៉ុស្តិ៍កាលពីថ្ងៃទី២៤ ខែតុលា ថា ទំនាក់ទំនងរវាងកម្ពុជា និងវៀតណាម នៅតែជាទំនាក់ទំនងក្នុងភាពជាអ្នកជិតខាងល្អ ដែលធ្វើឡើងតាមរយៈ៣ទម្រង់។ ទី ១ គឺក្នុងទម្រង់ទំនាក់ទំនងទ្វេភាគី រវាងប្រទេសនិងប្រទេស។
នៅពេលដែលថ្នាក់ដឹកនាំនៃប្រទេសទាំង ២ ជួបគ្នាគឺតែងតែមានការប្តេជ្ញាចិត្តលើកកម្ពស់ទំនាក់ទំនងឱ្យកាន់តែរឹងមាំ គ្រប់ជ្រុងជ្រោយ និងស៊ីជម្រៅ។
លោកថ្លែងថា៖ «កម្រិតទំនាក់ទំនងមួយទៀតដែរ ជារូបភាពទ្វេភាគី ប៉ុន្តែរវាងបក្ស និងបក្ស (គឺ) គណបក្សកម្មុយនីស្តវៀតណាម ជាមួយនឹងគណបក្សប្រជាជនកម្ពុជា គឺតែងមានជួបគ្នាជាប្រក្រតីហើយ»។
លោក ភា បន្តថា ទី៣គឺតាមរយៈទម្រង់ពហុភាគី ដែលប្រទេសទាំង ២ តែងតែគាំទ្រគ្នាទៅវិញទៅមក ប៉ុន្តែបញ្ហាមួយដែលគេមើលឃើញ មានការបារម្ភអំពីទំនាក់ទំនងកម្ពុជា និងវៀតណាមមិនរលូននៅពេលខាងមុខនោះ គឺចំណោទបញ្ហាទាក់ទងនឹងសមុទ្រចិនខាងត្បូង។ ប៉ុន្តែតាមរយៈការប្តេជ្ញាចិត្តរវាងប្រទេសទាំង ២ ដូចជាមិនមានសញ្ញាណាមួយ ដែលធ្វើឱ្យទំនាក់ទំនងនៃប្រទេសទាំង ២ អាចប្រែជាមិនល្អនោះទេ។
លោកថ្លែងថា៖ «ជាការនិទស្សន៍របសខ្ញុំ ខ្ញុំគិតថា ទំនាក់ទំនងហ្នឹងវានៅតែរឹងមាំក្នុងនាមជាប្រទេសជិតខាង។ វាក៏ជាយុទ្ធសាស្ត្ររបស់ប្រទេសកម្ពុជាដែរសម្រាប់ទំនាក់ទំនងជាមួយប្រទេសជិតខាងដោយប្រកាន់នូវជំហរនយោបាយមួយមិនយកអ្នកជិតខាងជាសត្រូវទេ ដើម្បីរួមរស់ដោយសុខដុមរមនាជាមួយគ្នាដើម្បីមានឱកាសក្នុងការអភិវឌ្ឍ ក្នុងការរកស៊ីវិនិយោគជាមួយគ្នា។ អាហ្នឹងជារឿងមួយច្បាស់លាស់សម្រាប់កម្ពុជា»៕