ភ្នំពេញៈ រដ្ឋបាលរាជធានីភ្នំពេញ សម្រេចបង្កើតក្រុមការងារត្រួតពិនិត្យ និងវាយតម្លៃសំណង់អគារចាស់ៗនៅតាមបណ្តាខណ្ឌទាំងអស់ ដើម្បីពង្រឹងយន្តការក្នុងការការពារ ថែរក្សា និងជាមូលដ្ឋានគ្រឹះក្នុងការស្នើសុំចុះបញ្ជីជាអគារបេតិកភណ្ឌ ទៅក្រសួងវប្បធម៌ និងវិចិត្រសិល្បៈ។
ការសម្រេចបែបនេះ បានធ្វើឡើងក្នុងកិច្ចប្រជុំ តាមរយៈការបញ្ជូនរូបភាព និងសំឡេង (Video Zoom Meeting) ស្ដីពីការទប់ស្កាត់ការវាយកម្ទេច និងបំផ្លិចបំផ្លាញសំណង់អគារបេតិកភណ្ឌ ក្នុងរាជធានី-ភ្នំពេញ ដែលដឹកនាំដោយលោក ឃួង ស្រេង អភិបាល នៃគណៈអភិបាលរាជធានី-ភ្នំពេញនៅថ្ងៃទី ២២ ខែ តុលា ឆ្នាំ ២០២១។
លោក ឃួង ស្រេង បានថ្លែងថា៖ «យើងនឹងបង្កើតឱ្យមានក្រុមការងារមួយចុះពិនិត្យ និងស្រង់ស្ថិតិ អគារបេតិកភណ្ឌដែលមាននៅក្នុងរាជធានីភ្នំពេញទាំងអស់។ ក្រោយមកទៀតយើងនឹងប្រគល់អគារបេតិកភណ្ឌទាំងនោះទៅឱ្យអាជ្ញាធរខណ្ឌ ធ្វើការគ្រប់គ្រងបន្ត។ ការធ្វើបែបនេះ ទើបយើងអាចរក្សាអគារបេតិកភណ្ឌទាំងនេះបានគង់វង្ស»។
ជាមួយគ្នានេះ សារាចរស្តីពីការទប់ស្កាត់ការវាយកម្ទេច និងបំផ្លិចបំផ្លាញសំណង់អគារបេតិកភណ្ឌ ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន នៅថ្ងៃទី ១២ ខែតុលា ក៏បានបញ្ជាក់ផងដែរថា រាជរដ្ឋាភិបាល ហាមឃាត់ចំពោះការកែប្រែ ការប្តូររូបរាងខាងក្រៅ ឬធ្វើឱ្យខូចខាតសោភណភាពចំពោះសំណង់ នៃតំបន់បេតិកភណ្ឌទីក្រុង។ ទប់ស្កាត់ការវាយកម្ទេច និងបំផ្លិចបំផ្លាញសំណង់វប្បធម៌ ប្រវត្តិសាស្ត្រ សំណង់បុរាណ និងសំណង់អគារបេតិកភណ្ឌ ដើម្បីការពារឱ្យបានគង់វង្ស។
សារាចររបស់លោកនាយករដ្ឋមន្ត្រីក៏បានណែនាំឱ្យបញ្ឈប់ជាបន្ទាន់ ចំពោះការបំផ្លាញអគារបេតិកភណ្ឌក្នុងតំបន់ការពារ និងក្រៅតំបន់ការពារ ដោយផ្តោតលើយុទ្ធសាស្ត្រ គោលនយោបាយ និងផែនទីចង្អុលបង្ហាញ ដើម្បីជំរុញការអភិរក្ស និងការពារការអភិវឌ្ឍទីក្រុងបេតិកភណ្ឌប្រកបដោយនិរន្តរភាព។
លោក ហ៊ុន សែន បញ្ជាក់ថា៖ «សំណង់អគារបេតិកភណ្ឌ ដែលនឹងត្រូវធ្វើការជួសជុល កែប្រែរូបរាង ឬវាយកម្ទេចចោលត្រូវស្នើសុំការពិនិត្យ និងសម្រេចពីក្រសួងវប្បធម៌ និងវិចិត្រសិល្បៈ និងអាជ្ញាធរពាក់ព័ន្ធជាមុនសិន»។
លោក ឡុង ប៉ុណ្ណាស៊ីរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈ ថ្លែងនៅថ្ងៃទី ២៤ តុលាថា សារាចររបស់រាជរដ្ឋាភិបាល ជាវិធានការបន្ថែមមួយទៀតសម្រាប់បំពេញចំណុចខ្វះចន្លោះមួយចំនួន។ ដោយផ្អែកលើការអភិវឌ្ឍថ្មីៗពេលខ្លះម្ចាស់កម្មសិទ្ធិ ឬម្ចាស់ទ្រព្យដែលមានសំណង់អគារបុរាណ ក្រៅពីវត្តអារាម និងប្រាសាទ ដែលជាសមត្ថកិច្ចរបស់ក្រសួងវប្បធម៌ ជួនកាលពេលមានការកែប្រែ ឬអភិវឌ្ឍអ្វីនោះ ពួកគាត់អាចវាយកម្ទេចចោលដោយសារតែមិនយល់។
លោក ឡុង ប៉ុណ្ណាស៊ីរីវត្ថ បានបញ្ជាក់ថា សារាចរនោះ គឺជាទម្ងន់គតិយុត្តមួយទៀត ដើម្បីបញ្ជាក់បន្ថែមឱ្យមានការចូលរួមអភិរក្ស។ ជាពិសេសនៅតាមបណ្ដា រាជធានី-ខេត្ត និងតំបន់ផ្សេងៗទៀត ដែលជាក់ស្តែងដូចនៅក្នុងខេត្តបាត់ដំបងមានផ្ទះសាងសង់ក្នុងសម័យលោកម្ចាស់។ នៅខេត្តក្រចេះ មានផ្ទះសំណង់ពីដើមៗជាលំនៅឋាន។
លោកថ្លែងថា៖ «ព្រោះនោះមានម្ចាស់កម្មសិទ្ធិ។ អ៊ីចឹងយើងអំពាវនាវឱ្យមានការយល់ ការចូលរួមពីប្រជាជនម្ចាស់ទ្រព្យ ក៏ដូចជាអាជ្ញាធរ ក្នុងការអនុញ្ញាត ឬមួយការកែប្រែរូបរាងអីឱ្យមានកិច្ចសហការ។ ជាពិសេសផ្តល់ព័ត៌មានមកក្រសួងវប្បធម៌ដែលជាសេនាធិការក្នុងការថែរក្សាការពារបេតិកភណ្ឌជាតិ»៕
វីដេអូ៖