.jpg)
រដ្ឋបាលខេត្តសៀមរាបបន្តរំឭកពលរដ្ឋមិនឱ្យចតរថយន្ត និងលក់ដូរលើផ្លូវកំពុងស្ថាបនា ៣៨ ខ្សែ។ រូបថត ហ្វេសប៊ុក
សៀមរាបៈ រដ្ឋបាលខេត្តសៀមរាបបានក្រើនរំឭកជាថ្មីដល់ប្រជាពលរដ្ឋក្នុងក្រុងសៀមរាបឱ្យឈប់ចតរថយន្ត និងលក់ដូរ នៅលើចិញ្ចើមផ្លូវ ដើម្បីបង្កលក្ខណៈងាយស្រួលដល់ការស្ថាបនាផ្លូវថ្មើរជើង និងរៀបចំទ្រូងផ្លូវឱ្យមានសណ្តាប់ធ្នាប់ដែលស្ថិតក្នុងគម្រោងស្ថាបនាផ្លូវ ៣៨ ខ្សែ។
ការក្រើនរំឭកនេះ ធ្វើឡើងបន្ទាប់រដ្ឋបាលខេត្តសៀមរាបកាលពីខែកញ្ញា ឆ្នាំ ២០២១ បានចេញសេចក្តីជូនដំណឹងរួចមកហើយពាក់ព័ន្ធចំណាត់ការចំពោះយានជំនិះគ្រប់ប្រភេទ ដែលឈប់ ឬចត និងការដាក់តាំងសម្ភារលក់ដូរ នៅលើទ្រូងផ្លូវ និងចិញ្ចើមផ្លូវក្នុងក្រុងសៀមរាប។ ប៉ុន្តែ ពលរដ្ឋមួយចំនួនបានចូលរួមគោរពតាមការណែនាំ ខណៈពលរដ្ឋខ្លះ មិនអើពើហើយនៅតែបន្តភាពមិនមានសណ្តាប់ធ្នាប់នៅលើចិញ្ចើមផ្លូវដដែល។
លោក លីវ សុខុន អ្នកនាំពាក្យសាលាខេត្តសៀមរាបបានប្រាប់ ភ្នំពេញ ប៉ុស្តិ៍ថា ក្រុមការងារខេត្តបានបើកកិច្ចប្រជុំ ជាមួយក្រុមការងាររៀបចំសណ្តាប់ធ្នាប់ ដើម្បីពិភាក្សាពីវឌ្ឍនភាពនៃការអនុវត្តបន្ទាប់ពីចេញសេចក្តីជូនដំណឹង។
លោកបន្តថា៖ «ក្នុងកិច្ចប្រជុំនោះ គឺតម្រូវឱ្យសមត្ថកិច្ចពាក់ព័ន្ធក្នុងការរៀបចំសណ្តាប់ធ្នាប់ ត្រូវបន្តអនុវត្តសេចក្តីជូនដំណឹង និងអប់រំប្រជាពលរដ្ឋឱ្យបានយល់ដឹងពីការទុកចិញ្ចើមថ្នល់នេះ ដោយធ្វើយ៉ាងណាឱ្យពលរដ្ឋបញ្ចៀសការចតឡាន ឬលក់ដូរនៅលើចិញ្ចើមផ្លូវ ដើម្បីកុំឱ្យប៉ះពាល់ដល់គម្រោងស្ថាបនាផ្លូវ ៣៨ ខ្សែ»។
លោកបន្តថា៖ «ជួនកាលក្រុមការងារទើបរៀបចំកម្រាលក្រានីតថ្មីៗមិនទាន់ស្ងួតស៊ីម៉ងត៍ស្រួលបួលផង ពួកគាត់យកឡានទៅចតលើនោះ ឬដាក់លក់ដូរនាំឱ្យខូចឥដ្ឋ និងប៉ះពាល់ដល់ដំណើរការគម្រោងស្ថាបនា»។
ដោយសារគម្រោងស្ថាបនាផ្លូវ ៣៨ ខ្សែ គ្របដណ្តប់ស្ទើរតែទាំងអស់ក្នុងក្រុងសៀមរាបទៅហើយទើបធ្វើឱ្យមានការប៉ះពាល់ដល់ប្រជាពលរដ្ឋដែលធ្លាប់ចតឡាន និងលក់ដូរនៅមុខផ្ទះ ខណៈលោក លីវ សុខុន នៅតែបន្តអំពាវនាវដល់ពលរដ្ឋចូលរួមគោរពតាមការណែនាំទាំងអស់គ្នាដើម្បីសោភណភាពទីក្រុង។
លោកថា៖ «ផ្លូវ ៣៨ ខ្សែក្នុងក្រុងសៀមរាបគ្របដណ្តប់ស្ទើរទាំងអស់ហើយក្នុងក្រុងនេះពីមុនមកកាលយើងមិនទាន់រៀបចំផ្លូវ គឺគាត់ចតឡាននៅមុខផ្ទះគាត់ តែឥឡូវមិនឱ្យគាត់ចតទេ ព្រោះនាំឱ្យខូចបាក់ និងស្រុតឥដ្ឋ ព្រោះឥឡូវនេះ គេធ្វើផ្លូវថ្មើរជើង និងផ្លូវសម្រាប់ជិះកង់»។
ពលរដ្ឋ ១ រូបដែលរស់នៅក្នុងក្រុងសៀមរាប អ្នកស្រី សុធារី បានសម្តែងការសាទរចំពោះការរៀបចំឱ្យមានសណ្តាប់ធ្នាប់ក្នុងក្រុងសៀមរាប ជាពិសេសកន្លែងថ្មើរជើងតែម្តង។ អ្នកស្រីថា៖ «យើងដឹងហើយសៀមរាប ជាខេត្តមួយនៃគោលដៅទេសចរណ៍ជាតិ និងអន្តរជាតិ អ៊ីចឹងពេលភ្ញៀវទេសចរមកលេងអត់មានកន្លែងថ្មើរជើង ហើយអត់មានសណ្តាប់ធ្នាប់ក៏ប៉ះពាល់ដល់អារម្មណ៍គេដែរ»។
អ៊ីចឹងក្នុងនាមអ្នកស្រីជាពលរដ្ឋរស់នៅក្នុងក្រុងនេះដែរ អត់មានតវ៉ាអីទេហើយអ្នកស្រីយល់ព្រមគ្រប់យ៉ាងចំពោះដំណើរការស្ថាបនាផ្លូវនេះ តែសូមស្ថាបនាឱ្យបានលឿន។
រដ្ឋបាលខេត្តសៀមរាបកាលពីថ្ងៃទី ១៧ កញ្ញា ឆ្នាំ ២០២១ បានជូនដំណឹងដល់សាធារណជនថា គម្រោងស្ថាបនាហេដ្ឋារចនាសម្ព័ន្ធផ្លូវ ៣៨ ខ្សែក្នុងក្រុងសៀមរាបបាននិងកំពុងសាងសង់តាមផែនការដែលបានគ្រោងទុក ដើម្បីប្រែក្លាយហេដ្ឋារចនាសម្ព័ន្ធផ្លូវទាំងនោះ ស្របតាមលក្ខណៈបច្ចេកទេសធានាបាននូវគុណភាព សុវត្ថិភាព សោភណភាព ព្រមទាំងការពារបាននូវបរិស្ថានរស់នៅល្អ បម្រើឱ្យការធ្វើចរាចរណ៍របស់ប្រជាពលរដ្ឋភ្ញៀវទេសចរជាតិ អន្តរជាតិ និងការដឹកជញ្ជូននានា។
សេចក្តីជូនដំណឹងបន្តថា ៖ «បច្ចុប្បន្នដំណើរការសាងសង់ហេដ្ឋារចនាសម្ព័ន្ធផ្លូវ ៣៨ ខ្សែ កំពុងដំណើរការរៀបចំខឿនចិញ្ចើមផ្លូវ កម្រាលក្រានីតសម្រាប់ផ្លូវថ្មើរជើង ផ្លូវជិះកង់ និងការរៀបចំទ្រូងផ្លូវ។ រដ្ឋបាលខេត្តពិនិត្យឃើញមានការចតយានជំនិះគ្រប់ប្រភេទ ការដាក់តាំងសម្ភារផ្សេងៗ និងការលក់ដូរនៅលើទ្រូងផ្លូវចិញ្ចើមផ្លូវ ដែលធ្វើឱ្យបាត់បង់សណ្តាប់ធ្នាប់ ខូចខាតដល់ហេដ្ឋារចនាសម្ព័ន្ធផ្លូវដែលកំពុងសាងសង់»។
តាមរយៈសេចក្តីជូនដំណឹងនេះ រដ្ឋបាលខេត្តបានស្នើដល់ពលរដ្ឋត្រូវបញ្ឈប់ការចតលើកម្រាលក្រានីតការដាក់តាំងសម្ភារផ្សេងៗ និងការលក់ដូរនៅលើទ្រូងផ្លូវចិញ្ចើមផ្លូវ ចាប់ពីថ្ងៃចេញសេចក្តីជូនដំណឹងនេះតទៅ។
រដ្ឋបាលខេត្តព្រមានថា៖ «ក្នុងករណី នៅតែបន្តសកម្មភាពដូចដែលបានរៀបរាប់ខាងលើដែលនាំឱ្យខូចខាតដល់ហេដ្ឋារចនាសម្ព័ន្ធកំពុងសាងសង់ត្រូវទទួលខុសត្រូវសងការខូចខាត ហើយអាជ្ញាធរមាន សមត្ថកិច្ចនឹងចាត់វិធានការតាមផ្លូវច្បាប់»។
គម្រោងកែលម្អផ្លូវក្នុងក្រុងសៀមរាបចំនួន ៣៨ ខ្សែនេះមានប្រវែងសរុប ១០៨,៧៤១ គីឡូម៉ែត្រ ប្រើប្រាស់ថវិកាជាតិសរុបប្រមាណជាង ១៤៩ លានដុល្លារ ត្រូវការចំណាយពេលសាងសង់ចំនួន ១៣ ខែ គ្រោងនឹងបញ្ចប់នៅចុងឆ្នាំ ២០២១៕
