.jpg)
រថយន្តដឹកវ៉ាក់សាំងបង្ការជំងឺកូវីដ ១៩។ រូបថត TVK
ភ្នំពេញៈ ប្រមុខនៃរាជរដ្ឋាភិបាលកម្ពុជា បានផ្តល់បន្ថែមនូវរថយន្តសម្រាប់ដឹកវ៉ាក់សាំងទៅដល់មន្ទីរសុខាភិបាលរាជធានី-ខេត្ត ទាំង ២៥ ដែលសរុបទាំងអស់មានចំនួន ១០០ គ្រឿង ដើម្បីជាការលើកចិត្ត និងជាតម្រូវការចាំបាច់សម្រាប់រក្សាទុក និងការដឹកជញ្ជូនវ៉ាក់សាំងកូវីដ ១៩ ឱ្យបានត្រឹមត្រូវតាមបទដ្ឋានបច្ចេកទេស។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានថ្លែងឱ្យដឹងនៅថ្ងៃទី ២៥ ខែតុលា ក្នុងពិធីប្រគល់រថយន្តដឹកវ៉ាក់សាំងទៅដល់មន្ទីរសុខាភិបាលខេត្តទាំង ២៥ ថា រថយន្តសរុបទាំង ២ លើក ដែលលោកនាយករដ្ឋមន្ត្រីបញ្ជាទិញសម្រាប់ផ្តល់ជូនមន្ទីរសុខាភិបាលទូទាំងប្រទេស មានចំនួន ១០០ គ្រឿង ដែលលើកទី១ មានចំនួន ៦០ គ្រឿង និងការបញ្ជាទិញលើកទី២ ចំនួន ៤០ គ្រឿង។
រាជធានី-ខេត្ត ដែលទទួលបានរថយន្តដឹកវ៉ាក់សាំងមាន ខេត្តបន្ទាយមានជ័យចំនួន ៤ គ្រឿង ខេត្តបាត់ដំបង ចំនួន ៥ គ្រឿង ខេត្តកំពង់ចាម ៥ គ្រឿង ខេត្តកំពង់ឆ្នាំង ៣ គ្រឿង ខេត្តកំពង់ស្ពឺ ៤ គ្រឿង ខេត្តកំពង់ធំ ៤ គ្រឿង ខេត្តកំពត ៤ គ្រឿង ខេត្តកណ្តាល ៥ គ្រឿង ខេត្តកោះកុង ២ គ្រឿង ខេត្តក្រចេះ៣គ្រឿង ខេត្តមណ្ឌលគិរី៣គ្រឿង រាជធានីភ្នំពេញ ៤ គ្រឿង ខេត្តព្រះវិហារ ៣ គ្រឿង ខេត្តព្រៃវែង ៥ គ្រឿង ខេត្តពោធិ៍សាត់៣គ្រឿង ខេត្តរតនគិរី៣គ្រឿង ខេត្តសៀមរាប ៤ គ្រឿង ខេត្តព្រះសីហនុ២គ្រឿង ខេត្តស្ទឹងត្រែង ៣ គ្រឿង ខេត្តស្វាយរៀង ៤ គ្រឿង ខេត្តតាកែវ ៤ គ្រឿង ខេត្តឧត្តរមានជ័យ៣គ្រឿង និងខេត្តកែបចំនួន ២ គ្រឿង។
លោកស្រី ឱ វណ្ណឌីន ថ្លែងថា៖ «សម្តេចនាយករដ្ឋមន្ត្រី ហ៊ុន សែន តែងតែគិតគូរណាស់ទៅលើការងារចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស ដែលកន្លងមកយើងក៏បានផ្តល់រថយន្តចាក់វ៉ាក់សាំងម្តងរួចមកហើយ។ នៅពេលនេះដែរ ដោយសម្តេចយល់ឃើញថានៅតាមបណ្តារាជធានីខេត្តបានខិតខំធ្វើការចាក់វ៉ាក់សាំងដល់ប្រជាពលរដ្ឋបានយ៉ាងល្អ ហើយជាពិសេសតម្រូវការនៃការថែរក្សាទុកវ៉ាក់សាំង និងការដឹកជញ្ជូនផងដែរ ដែលធ្វើឱ្យសម្តេចបញ្ជាទិញរថយន្តទាំងនេះបន្ថែមទៀត»។
លោកស្រី ឱ វណ្ណឌីន ក៏បានអំពាវនាវទៅដល់ប្រជាពលរដ្ឋដែលមិនទាន់បានចាក់វ៉ាក់សាំងមកទទួលការចាក់ ពិសេសប្រជាពលរដ្ឋដែលមានវ័យចាស់ ស្ត្រីមានផ្ទៃពោះ ស្ត្រីបំបៅកូនដោយទឹកដោះ អ្នកដែលជាសះស្បើយពីជំងឺកូវីដ ១៩ និងជំងឺប្រចាំកាយមួយចំនួន។
លោកស្រីបានថ្លែងថា៖ «សុំប្រជាពលរដ្ឋធ្វើការពិចារណា ហើយក៏ត្រូវធ្វើការសម្រេចចិត្តឱ្យបានត្រឹមត្រូវ ដើម្បីមកទទួលយកនូវវ៉ាក់សាំងនេះ ហើយយើងត្រូវគិតថា វីរុសកូវីដ ១៩ បច្ចុប្បន្ននេះមានការរាតត្បាតសឹងតែពេញកន្លែងអស់ហើយ។ ដូចនេះនៅពេលដែលយើងមានវ៉ាក់សាំង យើងក៏មានភាពកក់ក្តៅក្នុងការការពារសរីរាង្គរបស់យើងផង ហើយក៏អាចការពារដល់ទារកនៅក្នុងផ្ទៃផង»។
លោកស្រី ឱ វណ្ណឌីន ថ្លែងថា អត្ថប្រយោជន៍នៃការទទួលបានពីវ៉ាក់សាំងសម្រាប់ស្ត្រីមានផ្ទៃពោះគឺធំធេងណាស់ ដោយសារអ្នកវិទ្យាសាស្ត្ររកឃើញថាមកដល់ពេលនេះមិនទាន់រកឃើញមានស្ត្រីមានផ្ទៃពោះចាក់វ៉ាក់សាំងហើយមានផលប៉ះពាល់ទៅដល់ទារកនៅក្នុងផ្ទៃនៅឡើយទេ។ ផ្ទុយទៅវិញ គេកំពុងតែធ្វើការសិក្សាបន្ថែមទៀតដោយសារគេរកឃើញថា សរីរាង្គបង្កើតបាននូវកងការពារឬអង់ទីគ័រ។
លោកស្រីបានបញ្ជាក់ថា៖ «ឥឡូវ គេរកឃើញថា ស្ត្រីដែលផ្ទៃពោះចាក់វ៉ាក់សាំងហើយរកឃើញថាមានអង់ទីគ័រ ហើយអង់ទីគ័រនោះឃើញរហូតទៅដល់ទងសុករបស់ទារកនៅក្នុងផ្ទៃ។ គេកំពុងតែជំរុញក្នុងការធ្វើការសិក្សាមួយទៀតដោយគេបានលើកឡើងថា លទ្ធភាពខ្ពស់ណាស់ គឺមានន័យថា អង់ទីគ័រដែលបង្កើតឡើងក្នុងសរីរាង្គរបស់ម្តាយ តើវានឹងអាចជួយការពារកូននៅពេលដែលកូនកើតចេញមកដែរទេ ដែលចម្លើយនេះគេកំពុងតែសិក្សាបន្តទៀត»។
ដោយឡែក លោកស្រីក៏បានលើកឡើងឱ្យដឹងដែរ អ្វីដែលគេសិក្សារកឃើញទៀតនោះ គឺវ៉ាក់សាំងកូវីដ១៩មិនមានការបង្កនូវហេតុការណ៍ឬផលអាក្រក់ណាមួយទៅដល់ផ្ទៃពោះរបស់ស្ត្រីនោះទេ។
លោកស្រី ឱ វណ្ណឌីន បញ្ជាក់ថា៖ «និយាយជារួម ផលចំណេញរបស់យើងច្រើន ប៉ុន្តែផលខាតរបស់យើងក៏ច្រើនដែរ ប្រសិនបើយើងមិនចាក់វ៉ាក់សាំងកូវីដ ១៩»៕
