ស្ទឹងត្រែងៈ នគរបាលព្រហ្មទណ្ឌខេត្តស្ទឹងត្រែង បានបញ្ជូនបុរស ៣ នាក់ ទៅតុលាការនៅថ្ងៃទី ២៥ តុលា ករណីលេងល្បែងបញ្ជល់មាន់ ប្រព្រឹត្តនៅភូមិរាជានុកូល សង្កាត់-ក្រុងស្ទឹងត្រែង កាលពីថ្ងៃទី ២៤ តុលា។
លោក វ៉ា សុផាន់ ស្នងការរងទទួលផែនការងារនគរបាលព្រហ្មទណ្ឌនៃស្នងការដ្ឋាននគរបាលខេត្តស្ទឹងត្រែងប្រាប់នៅរសៀលថ្ងៃទី ២៥ តុលាថា ជនសង្ស័យទី១-ឈ្មោះ ពិត លក្ខណៈ ភេទប្រុស អាយុ ៤៧ ឆ្នាំ រស់នៅ ភូមិព្រែក សង្កាត់-ក្រុងស្ទឹងត្រែង។
ទី២-ឈ្មោះ ស៊ុន សុគន្ធ ភេទប្រុស អាយុ ៥០ ឆ្នាំ រស់នៅភូមិបាចុង សង្កាត់ព្រះបាទ ក្រុងស្ទឹងត្រែង និងឈ្មោះ សួន ឆៃ ឡា ភេទប្រុស អាយុ ៣៤ ឆ្នាំ រស់នៅ ភូមិរាជានុកូល សង្កាត់-ក្រុងស្ទឹងខេត្ត-ស្ទឹងត្រែង ។
លោកបញ្ជាក់ថា ជនសង្ស័យទាំង ៣ នាក់ ជាប់ពាក់ព័ន្ធលេងល្បែងភ្នាល់បញ្ជល់មាន់ ហើយពួកគេត្រូវបានលោកកសាងសំណុំរឿង បញ្ជូនទៅសាលាដំបូងខេត្តស្ទឹងត្រែង នៅថ្ងៃទី ២៥ តុលា។
ចំពោះវត្ថុតាងវិញ មានម៉ូតូចំនួន ១១ គ្រឿង ដែលអ្នកលេងបញ្ជល់មាន់រត់ចោល និងមាន់ជល់ ១ ក្បាល។
លោកសង្កត់ធ្ងន់ ១ ថា៖ «ក្រុមជនសង្ស័យ ខ្ញុំដឹកទៅតុលាការនៅវេលាថ្ងៃត្រង់ថ្ងៃនេះ (ថ្ងៃទី ២៥ តុលា)។ ប្រហែលជាតំណាងអយ្យការសួរមិនទាន់ចប់ទេ ព្រោះជនសង្ស័យមាន ៣ នាក់ឯណោះ»។
លោក ឈូក កុម៉ល់ អធិការនគរបាលក្រុងស្ទឹងត្រែង ប្រាប់នៅរសៀលថ្ងៃទី ២៥ តុលាថា មុនមានការបង្ក្រាបល្បែងបញ្ជល់មាន់នេះ គឺនគរបាលព្រហ្មទណ្ឌខេត្តស្ទឹងត្រែង បានធ្វើការស្រាវជ្រាវតាមរយៈសមត្ថកិច្ចប៉ុស្តិ៍នគរបាលសង្កាត់ស្ទឹងត្រែង ហើយបានដឹងថា នៅចំណុចភូមិរាជានុកូល ក្នុងសង្កាត់ស្ទឹងត្រែង មានករណីលួចលាក់បញ្ជល់មាន់។
លុះនៅរសៀលថ្ងៃទី ២៤ តុលា ក៏ត្រូវបានកម្លាំងនគរបាលព្រហ្មទណ្ឌខេត្ត ចុះបង្ក្រាបតែម្តង។ លោកថា៖ «ករណីនេះខាងខ្ញុំ គ្រាន់តែសហការបង្ក្រាបទេ។ ចំណែកនីតិវិធីពាក់ព័ន្ធតុលា គឺខេត្តគាត់អ្នកធ្វើ»៕