កំពតៈ អភិបាលខេត្តកំពតថ្មី លោក ម៉ៅ ធនិន ប្រកាសបើកការស៊ើបអង្កេតជុំវិញភាពមិនប្រក្រតីរបស់មន្ត្រីថ្នាក់ក្រោមជាតិក្នុងស្រុកដងទង់ ពាក់ព័ន្ធករណីលួចលក់ដីអាងស្តុកទឹកដែលជាសម្បត្តិរដ្ឋ ទៅឱ្យក្រុមហ៊ុនឯកជនដើម្បីលុបធ្វើការអភិវឌ្ឍធ្វើជាបុរី។
កាលពីថ្ងៃទី ២៤ តុលា លោក ម៉ៅ ធនិន បើកវេទិកាសាធារណៈក្នុងបរិវេណសាលាស្រុកដងទង់ជាមួយប្រជាពលរដ្ឋ និងភាគីពាក់ព័ន្ធ ដើម្បីដោះស្រាយវិវាទដីធ្លីរវាងពលរដ្ឋ ៤ គ្រួសារ និងក្រុមហ៊ុន សេង សម្បត្តិ ដែលមានការចោទថា បានឃុបឃិតជាមួយមន្ត្រីមួយចំនួននៅក្នុងស្រុកលួចលក់ដីអាងស្តុកទឹកដែលជាសម្បត្តិរដ្ឋ ស្ថិតនៅភូមិសុភី ឃុំស្រែជាខាងជើង ស្រុកដងទង់ ខេត្តកំពត។
ក្នុងឱកាសនោះ លោក ម៉ៅ ធនិន បានបើកឱកាសឱ្យប្រជាពលរដ្ឋរងគ្រោះ និងតំណាងក្រុមហ៊ុន សេង សម្បត្តិ ព្រមទាំងអាជ្ញាធរដែនដីតទល់គ្នាជាសាធារណៈ និងបានដោះស្រាយឱ្យជម្លោះរវាងភាគីទាំង ២ បានបញ្ចប់ ដោយសម្រេចឱ្យពលរដ្ឋចំនួន ៤ គ្រួសារ ដែលមិនយល់ព្រមលក់ដីឱ្យក្រុមហ៊ុនមានសិទ្ធិកាន់កាប់អាស្រ័យផលលើដីរបស់ខ្លួនឡើងវិញ ក្រោយពីក្រុមហ៊ុនបានឈូសឆាយរំលោភបំពាន។
ចំណែកក្រុមហ៊ុន សេង សម្បត្តិ ដែលបានទិញសិទ្ធិកាន់កាប់អាស្រ័យផលបន្តពីប្រជាពលរដ្ឋចំនួន ១៩ គ្រួសារលើផ្ទៃដីប្រមាណ ១០ ហិកតា សម្រេចឱ្យមានសិទ្ធិកាន់កាប់អាស្រ័យផលលើដីទាំងនេះបន្ត និងតម្រូវឱ្យក្រុមហ៊ុនបញ្ឈប់ការវិនិយោគលើដីទាំងនេះបណ្តោះអាសន្ន ខណៈក្រុមហ៊ុនទទួលបានសិទ្ធិមិនស្របច្បាប់។ ក្រៅពីនេះលោក ម៉ៅ ធនិន ក៏បានប្រកាសជាសាធារណៈរក្សាទុកអាងស្តុកទឹកដែលមានប្រយោជន៍ដ៏ធំធេងនេះ សម្រាប់ប្រជាពលរដ្ឋក្នុងតំបន់ឱ្យនៅដដែលផងដែរ។ ក្នុងករណីដែលក្រុមហ៊ុន សេង សម្បត្តិ ចង់ធ្វើការអភិវឌ្ឍតំបន់នេះទៅជាបុរីបន្ត គឺត្រូវដាក់សំណើទៅថ្នាក់ខេត្ត ដើម្បីធ្វើការពិនិត្យ និងសម្រេចជាថ្មី។
ក្រៅពីបានសម្រេចបែបនេះលើភាពមិនប្រក្រតីជុំវិញសកម្មភាពរបស់មន្ត្រីពាក់ព័ន្ធដែលឃុបឃិតរៀបចំឯកសារខុសច្បាប់ លោក ម៉ៅ ធនិន ក៏បានអះអាងដែរថាលោកនឹងបន្តបើកការស៊ើបអង្កេតដើម្បីស្វែងរកអ្នកប្រព្រឹត្តកំហុសមកទទួលទោសទណ្ឌតាមច្បាប់ ខណៈលោកមានភ័ស្តុតាង និងឯកសារគ្រប់គ្រាន់។
លោកថ្លែងថា៖ «ពាក់ព័ន្ធជាមួយការដូរប្រភេទដីពីដីកសិកម្មមកជាដីលំនៅឋាន អាជ្ញាធរកម្រិតខេត្ត មានសិទ្ធិផ្តល់សិទ្ធិត្រឹម ៣ ហិកតាចុះ។ ចុះហេតុអ្វីបានរឿងនេះដីជាង ១០ ហិកតាមានសិទ្ធិប្តូរប្រភេទដី ហើយផ្តល់លទ្ធភាពពុះជាដីឡូត៍? តើចំណុចនេះច្បាប់ចេញពីណាមក? ដោះក្តីនេះ ឯកសារគ្រប់គ្រាន់ទាំងអស់ នៅក្នុងដៃខ្ញុំពីដើមរហូតដល់ចប់»។
លោកថា៖ «ចំពោះលិខិតស្នាម ដែលមានការពាក់ព័ន្ធជាមួយបុគ្គល ដែលមានសមត្ថកិច្ច [ខ្ញុំ] នឹងបើកការស្រាវជ្រាវទៅលើផ្លូវច្បាប់។ តើមន្ត្រីណាម្នាក់ ដែលបានអនុវត្តផ្ទុយពីការងារច្បាប់ គឺ [ខ្ញុំ] ត្រូវមានវិធានការរដ្ឋបាល។ ខ្ញុំ ក៏សុំទោសលោកយាយ លោកតាយើងដែរនូវកំហុសរបស់បុគ្គលមានតួនាទីហើយ ធ្វើឱ្យបងប្អូនមិនសប្បាយចិត្ត។ យើងសុំបញ្ចប់ (ជម្លោះ) ត្រឹមថ្ងៃនេះចុះ»។
ការសម្រេចបែបនេះជាសាធារណៈ ប្រជាពលរដ្ឋក្នុងមូលដ្ឋាន ជាពិសេសពលរដ្ឋរងគ្រោះ ដែលបានចូលរួមវេទិកាសាធារណៈបង្ហាញការសាទរ និងក្តីសប្បាយរីករាយ ខណៈតំណាងក្រុមហ៊ុន សេង សម្បត្តិ ដែលបានចូលរួមដែរនោះក៏បានឯកភាពផងដែរ។
លោក យឹម ផល្លី មន្ត្រីសម្របសម្រួលសមាគមការពារសិទ្ធិមនុស្ស (អាដហុក) ប្រចាំខេត្តកំពតថ្លែងថា ចំណាត់ការនីមួយៗនៃការដោះស្រាយរបស់អភិបាលខេត្តថ្មី សុទ្ធតែអាចទទួលយកបាន ហើយបានធ្វើឱ្យប្រជាពលរដ្ឋក្នុងមូលដ្ឋានមានភាពកក់ក្តៅ។
លោកអះអាងថា នឹងបន្តឃ្លាំមើលទៀតដើម្បីឱ្យប្រាកដថាអ្នកប្រព្រឹត្តកំហុសនឹងត្រូវទទួលទោសតាមច្បាប់ឱ្យខាងតែបាន។
លោកបញ្ជាក់ថា៖ «រឿងនេះ បើយើងនិយាយពីច្បាប់វិញ ចំពោះអ្នកក្លែងលិខិតសាធារណៈ គឺត្រូវមានការទទួលខុសត្រូវទៅតាមច្បាប់ព្រហ្មទណ្ឌ។ ព្រោះច្បាប់អនុញ្ញាតត្រឹម ៣ ហិកតា ហេតុអ្វីបានដីជាង ១០ ហិកតា អាចបំប្លែងពីដីកសិកម្ម ទៅជាដីកម្មសិទ្ធិស្របច្បាប់បាន?។ អ៊ីចឹងករណីនេះ បើមានការក្លែងលិខិតណាមួយ ច្បាប់នឹងធ្វើការស្រាវជ្រាវ និងដាក់ទោសទៅលើបុគ្គលដែលបានចូលរួមចេញលិខិតទាំងនេះ ហើយអ្នកដែលយកឯកសារនេះទៅប្រើប្រាស់ ដែលមានការរួមគំនិតក៏ត្រូវទទួលទោសដែរ»៕
វីដេអូ៖