.jpg)
បុរសរងរបួសដោយសារគ្រាប់មីន សម្រាកព្យាបាលនៅមន្ទីរពេទ្យ។ រូបថត CMAA
ឧត្តរមានជ័យៈ បុរសវ័យ ២៥ ឆ្នាំម្នាក់ រស់នៅភូមិខ្ទុំ សង្កាត់កូនក្រៀល ក្រុងសំរោង ខេត្តឧត្តរមានជ័យ បានរងរបួសធ្ងន់ដាច់ជើងឆ្វេង និងរបួសដៃឆ្វេងដោយសារគ្រោះថ្នាក់ជាន់មីនប្រឆាំងមនុស្សពេលកំពុងដើររកដំឡូងមីក្នុងចម្ការស្ថិតនៅចំណុចក្បែរជើងភ្នំដងរែក ក្នុងភូមិដងទង់ សង្កាត់កូនក្រៀល ក្រុងសំរោង បច្ចុប្បន្នជនរងគ្រោះត្រូវបានសាច់ញាតិបញ្ជូនទៅព្យាបាលនៅមន្ទីរពេទ្យបង្អែកខេត្តសៀមរាប។ នេះបើយោងតាមការឱ្យដឹងពីលោក លឿង ណុច ចៅសង្កាត់កូនក្រៀល។
លោក លឿង ណុច បានឱ្យដឹងថា ជនរងគ្រោះរូបនេះ គឺជាសាច់ញាតិរបស់មន្ដ្រីក្រុមប្រឹក្សាសង្កាត់ សង្កាត់កូនក្រៀល ហើយកាលពីវេលាម៉ោង ១២ ថ្ងៃត្រង់ថ្ងៃទី ២៤ ខែតុលា ឆ្នាំ ២០២១ ជនរងគ្រោះរួមជាមួយអ្នកភូមិផ្សេងទៀតបាននាំគ្នាទៅរកដំឡូងនៅក្នុងព្រៃចំណុចភូមិដងទង់ សង្កាត់កូនក្រៀល ក្រោយមកឈ្មោះ រឿន ថន អាយុ ២៥ ឆ្នាំដែលជាជនរងគ្រោះបានដើរវង្វេងក្រុមចូលទៅក្នុងព្រៃតែម្នាក់ឯង ទើបបណ្ដាលឱ្យរងគ្រោះថ្នាក់ដោយសារជាន់មីនប្រឆាំងមនុស្សនេះ។
លោកថ្លែងថា៖ «ឥឡូវគាត់ [ជនរងគ្រោះ] កំពុងព្យាបាលនៅមន្ទីរពេទ្យបង្អែកខេត្តសៀមរាប ប៉ុន្ដែស្ថានភាពបានធូរស្រាលបន្ដិចហើយ។ ដំបូងឡើយជនរងគ្រោះ និងអ្នកភូមិផ្សេងទៀតដើររកដំឡូងមីទេ ប៉ុន្ដែជនរងគ្រោះក៏ដើរចូលព្រៃនៅក្បែរជើងភ្នំដងរ៉ែកតែម្នាក់ឯង មួយសន្ទុះក្រោយមកទើបឮសំឡេងផ្ទុះមីន ហើយពលរដ្ឋនាំគ្នាតាមរកមើលក៏ឃើញជនរងគ្រោះបានរងគ្រោះថ្នាក់ទៅហើយ»។
លោក លឿង ណុច បានឱ្យដឹងថា ជាច្រើនឆ្នាំហើយ ភូមិសាស្ដ្រ សង្កាត់កូនក្រៀលមិនដែលមានករណីគ្រោះថ្នាក់ដោយសារមីនទេ នេះជាករណីដែលកើតឡើងដំបូងហើយ។
អាជ្ញាធរមីនបានអំពាវនាវដល់ប្រជាពលរដ្ឋទាំងអស់ត្រូវសាកសួរអាជ្ញាធរមូលដ្ឋាន ឬអ្នកដែលដឹងច្បាស់អំពីព័ត៌មានភូមិសាស្ដ្រនៅក្នុងភូមិ ឃុំរបស់ខ្លួន មុនពេលចូលទៅតំបន់ណាដែលមិនទាន់បានធ្វើការបោសសម្អាតមីន និងគ្រាប់មិនទាន់ផ្ទុះ។
យោងតាមរបាយការណ៍របស់អាជ្ញាធរមីន ជនរងគ្រោះ ដោយសារយុទ្ធភណ្ឌគ្រឿងផ្ទុះចាប់ពីខែមករា ដល់ខែកញ្ញា ឆ្នាំ ២០២១ មានឧប្បត្តិហេតុគ្រោះថ្នាក់ដោយសារយុទ្ធភណ្ឌគ្រឿងផ្ទុះចំនួន ២៨ លើកដែលបានបណ្តាលឱ្យមានអ្នកស្លាប់ និងរបួសសរុបចំនួន ៣៤ នាក់។
តួលេខជនរងគ្រោះនេះបានថយចុះ ៣៨% បើប្រៀបធៀបនឹងរយៈពេលដូចគ្នានៅឆ្នាំ ២០២០ ដែលមានជនរងគ្រោះ ៥៥ នាក់៕
