.jpg)
លោកនាយករដ្ឋមន្ត្រី ហ៊ុន សែន ចូលរួមប្រជុំកំពូលអាស៊ានតាមអនឡាញ នៅព្រឹកនេះ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន នឹងចូលរួមកិច្ចប្រជុំកំពូលអាស៊ានលើកទី៣៨ និង ៣៩ និងកិច្ចប្រជុំកំពូលពាក់ព័ន្ធចាប់ពីថ្ងៃទី ២៦ ដល់ថ្ងៃទី ២៨ ខែតុលា តាមប្រព័ន្ធវីដេអូដែលប្រទេសប្រ៊ុយណេធ្វើជាម្ចាស់ផ្ទះ។
ក្រសួងការបរទេសបញ្ជាក់ក្នុងសេចក្តីប្រកាសព័ត៌មាននៅថ្ងៃទី ២៥ តុលាថា អមលោកនាយករដ្ឋមន្ត្រី ហ៊ុន សែន នៅក្នុងកិច្ចប្រជុំទាំងនេះ រួមមានលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ព្រមទាំងមន្រី្តជាន់ខ្ពស់របស់រដ្ឋាភិបាលកម្ពុជាមួយចំនួនផងដែរ។
លោកនាយករដ្ឋមន្ត្រីនឹងធ្វើបទអន្តរាគមន៍ក្នុងប្រជុំកំពូលអាស៊ានលើកទី ៣៨ និងលើកទី ៣៩ កិច្ចប្រជុំកំពូលអាស៊ាន-សាធារណរដ្ឋកូរ៉េ លើកទី ២២ កិច្ចប្រជុំកំពូលអាស៊ាន-ចិន លើកទី ២៤ កិច្ចប្រជុំកំពូលអាស៊ាន- សហរដ្ឋអាមេរិក លើកទី ៩ កិច្ចប្រជុំកំពូលអាស៊ាន-ជប៉ុន លើកទី ២៤ កិច្ចប្រជុំកំពូលប្រចាំឆ្នាំអាស៊ាន-អូស្ដ្រាលី លើកទី ១ កិច្ចប្រជុំកំពូលអាស៊ានបូក ៣ លើកទី ២៤ កិច្ចប្រជុំកំពូលអាស៊ីបូព៌ា លើកទី ១៦ កិច្ចប្រជុំកំពូលអាស៊ាន-ឥណ្ឌា លើកទី ១៨ និងកិច្ចប្រជុំកំពូលអាស៊ាន-រុស្ស៊ី លើកទី ៤ ដើម្បីអបអរសាទរខួបអនុស្សាវរីយ៍ ៣០ ឆ្នាំនៃទំនាក់ទំនងដៃគូសន្ទនាអាស៊ាន-រុស្ស៊ី។
នៅថ្ងៃទី ២៨ ខែតុលា លោក ហ៊ុន សែន នឹងធ្វើបទអន្តរាគមន៍ផងដែរនៅក្នុងពិធីបិទក្រោយពីប្រុយណេប្រគល់តំណែងប្រធានអាស៊ានឆ្នាំ ២០២២ ជូនកម្ពុជា។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាប្រាប់ភ្នំពេញ-ប៉ុស្តិ៍កាលពីថ្ងៃទី ២៥ ខែតុលា ថា នៅកិច្ចប្រជុំអាស៊ាននេះគឺរឿងដែលនៅតែជាអាទិភាពគឺការគិតគូរទៅលើការប្រយុទ្ធប្រឆាំងជំងឺកូវីដ ១៩ ការស្តារសេដ្ឋកិច្ចឡើងវិញក្រោយកូវីដ-១៩។ ការគិតគូររបស់មេដឹកនាំអាស៊ានអំពីមជ្ឈភាព និងតួនាទីរបស់អាស៊ានក៏នៅតែបញ្ហាអាទិភាពក្នុងកិច្ចប្រជុំនេះដែរ ពីព្រោះវាគឺជាបរិបទនៃការប្រកួតប្រជែងខាងភូមិសាស្ត្រនយោបាយ ជាពិសេសបញ្ហាសមុទ្រចិនខាងត្បូង។
លោកថ្លែងថា រឿងដែលអាស៊ានកំពុងប្រឈមមុខហើយវាជាបដិវត្តន៍មួយនៅក្នុងវប្បធម៌អាស៊ានគឺទាក់ទងនឹងបេក្ខភាពមេដឹកនាំយោធាមីយ៉ាន់ម៉ាដែលមិនត្រូវបានអញ្ជើញឱ្យចូលរួមក្នុងកិច្ចប្រជុំអាស៊ាន ដែលនេះជាទ្វេគ្រោះអាស៊ាន។ ប្រសិនបើអាស៊ានអនុញ្ញាតឱ្យមេដឹកនាំយោធាមីយ៉ាន់ម៉ាចូលរួមប្រជុំ វាកាន់តែធ្វើឱ្យអាស៊ានកាន់តែបាក់មុខបាក់មាត់។
លោក ភា ថ្លែងថា៖ «វាជាបញ្ហាមួយក្តៅរឿងភូមាហ្នឹង ហើយវាអាចនឹងបន្តក្តៅនៅពេលដែលកម្ពុជាយើងធ្វើជាម្ចាស់ផ្ទះ ហើយខ្ញុំជឿថា ប្រ៊ុយណេគាត់អត់សូវចង់ដោះស្រាយបញ្ហាហ្នឹងប៉ុន្មានទេ។ គាត់បណ្តែតបណ្តោយធម្មតា ព្រោះគាត់ជិតផុតអាណត្តិហើយហ្នឹង អ៊ីចឹង រឿងក្តៅហ្នឹងប្រហែលជាធ្លាក់មកលើស្រុកខ្មែរយើងហ្នឹងហើយ»។
លោក ប្រាក់ សុខុន ថ្លែងក្នុងពិធីប្រារព្ធខួបលើកទី ៣០ នៃកិច្ចព្រមព្រៀងសន្តិភាពទីក្រុងប៉ារីសកាលពីថ្ងៃទី ២៣ ខែតុលា ថា វិបត្តិនយោបាយសន្តិសុខនៅមីយ៉ាន់ម៉ា កំពុងបង្កើតស្ថានភាពដ៏លំបាកមិនធ្លាប់មាននៅផ្ទៃក្នុងអាស៊ានខ្លួនឯងផង និងក្នុងទំនាក់ទំនងជាមួយដៃគូសន្ទនារបស់ខ្លួនផង។ លោក សង្ឃឹមថាមេរៀនដែលទទួលបាននៅកម្ពុជាក្នុងការសម្រេចនូវសន្តិភាព និងការផ្សះផ្សាជាតិនោះ អាចនឹងជួយរួមវិភាគទានដល់ដំណោះស្រាយវិបត្តិនៅ «ប្រទេសជាបងប្អូនគ្រួសារអាស៊ានមួយនេះ»។
លោកបានបន្តថា កម្ពុជាក្នុងឋានៈជាប្រធានអាស៊ានឆ្នាំក្រោយនឹងអំពាវនាវចលនាសមាជិកក្នុងសហគមន៍អាស៊ានដែលកំពុងរួមគ្នាកសាងនោះឱ្យធ្វើសកម្មភាពជាមួយគ្នា ដើម្បីឆ្លើយតបដោះស្រាយការប្រឈមដ៏ច្រើន និងស្មុគស្មាញដែលយើងកំពុងជួប។
លោក ប្រាក់ សុខុន ថ្លែងថា៖ «យើងសង្ឃឹមថា ជាមួយនឹងសាមគ្គីភាពដ៏ខ្លាំងក្លាពីសំណាក់សមាជិកអាស៊ាន និងការគាំទ្រពីដៃគូខាងក្រៅ កម្ពុជានឹងអាចជួយរុញដំណើរការកសាងសហគមន៍អាស៊ានទៅមុខ ពង្រឹងមជ្ឈភាពអាស៊ាន រក្សាតួនាទីដ៏សំខាន់សម្រាប់ពាណិជ្ជកម្មសកលវិនិយោគ និងខ្សែចង្វាក់ផ្គត់ផ្គង់តាមរយៈការជំរុញការអនុវត្តក្របខ័ណ្ឌស្តារឡើងវិញគ្រប់ជ្រុងជ្រោយរបស់អាស៊ាន (ACRF) និងការអនុវត្តកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ជាដើម»៕
