ភ្នំពេញៈ ប្រមុខរាជរដ្ឋាភិបាលកម្ពុជាបានសម្រេចលុបចោលនូវការធ្វើចត្តាឡីស័ករបស់អ្នកជំងឺកូវីដ ១៩ ដែលបានជាសះស្បើយរួច និងលើកលែងការធ្វើចត្តាឡីស័កចំពោះក្រុមគ្រូពេទ្យ និងក្រុមផ្តល់សេវាជួរមុខ ដែលបានអនុវត្តតាមវិធានការសុខាភិបាលខ្ជាប់ខ្លួនក្នុងពេលបំពេញការងារ និងទទួលបានលទ្ធផលតេស្តកូវីដ ១៩ អវិជ្ជមាន PCR (-) ក្រោយបញ្ចប់ភារកិច្ចនៅតាមមន្ទីរពេទ្យ និងមណ្ឌលព្យាបាលជំងឺកូវីដ ១៩។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ បានចេញលិខិតជូនដល់គ្រប់ប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ កាលពីថ្ងៃទី ២៥ ខែតុលា ទាក់ទងនឹងការធ្វើបច្ចុប្បន្នភាពរបបធ្វើចត្តាឡីស័ករបស់ក្រុមគ្រូពេទ្យ និងក្រុមផ្តល់សេវាជួរមុខ នៅតាមមន្ទីរពេទ្យ និងមណ្ឌលព្យាបាលជំងឺកូវីដ ១៩។
ការសម្រេចធ្វើបច្ចុប្បន្នរបបនៃការធ្វើចត្តាឡីស័កនៃក្រុមគ្រូពេទ្យ និងក្រុមផ្តល់សេវាជួរមុខនេះ តាមចំណារឯកភាពរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី ២៣ ខែតុលា ដោយបានឯកភាពតាមសំណើសុំគោលការណ៍របស់គណៈប្រចាំការនៃគណៈកម្មការជាតិប្រយុទ្ធនឹងជំងឺកូវីដ ១៩ កាលពីថ្ងៃទី ២២ ខែតុលា ដែលផ្អែកលើមូលដ្ឋានសំខាន់ចំនួន ២ គឺ ការធ្វើចត្តាឡីស័ករបស់អ្នកជំងឺកូវីដ-១៩ ដែលបានជាសះស្បើយ ត្រូវបានលុបចោល។ មូលដ្ឋានទី ២ គឺ អត្រាក្រុមគ្រូពេទ្យ និងក្រុមផ្តល់សេវាជួរមុខដែលបានចាក់វ៉ាក់សាំងកូវីដ ១៩ ទាំងដូសមូលដ្ឋាន និងដូសជំរុញ មានកម្រិតខ្ពស់ ដែលនាំឱ្យមានភាពស៊ាំ និងប្រសិទ្ធភាពក្នុងការកាត់បន្ថយកម្រិតគ្រោះថ្នាក់នៃវីរុសកូវីដ ១៩។
លោក ម៉ម ប៊ុនហេង ថ្លែងថា គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ បានលើកលែងការធ្វើចត្តាឡីស័កចំពោះក្រុមគ្រូពេទ្យ និងក្រុមផ្តល់សេវាជួរមុខ ដែលបានអនុវត្តតាមវិធានការសុខាភិបាលខ្ជាប់ខ្លួនក្នុងពេលបំពេញការងារ និងទទួលបានលទ្ធផលតេស្តកូវីដ ១៩ អវិជ្ជមាន (PCR) ក្រោយបញ្ចប់ភារកិច្ចនៅតាមមន្ទីរពេទ្យ និងមណ្ឌលព្យាបាលជំងឺកូវីដ ១៩ ហើយក្រុមគ្រូពេទ្យ និងក្រុមផ្តល់សេវាជួរមុខទាំងនេះ ត្រូវបានអនុញ្ញាតឱ្យមានការឈប់សម្រាករយៈពេល ៤ ថ្ងៃ មុននឹងវិលចូលបម្រើការងារនៅអង្គភាពដើមវិញ។
លោកថ្លែងថា៖ «គណៈកម្មការអន្តរក្រសួងក៏លើកលែងការធ្វើចត្តាឡីស័កចំពោះក្រុមគ្រូពេទ្យ និងអ្នកផ្តល់សេវាទូទៅដែលមិនមែនជាក្រុមផ្តល់សេវាជួរមុខ ប៉ុន្តែមានការចាំបាច់ត្រូវធ្វើអន្តរាគមន៍វេជ្ជសាស្ត្រ ដូចជាការវះកាត់ ឬការផ្តល់សេវានានាដល់អ្នកជំងឺកូវីដ-១៩ នៅតាមមន្ទីរពេទ្យ និងមណ្ឌលព្យាបាលក្នុងរយៈពេលខ្លី ហើយបានប្រើប្រាស់សម្ភារ និងឧបករណ៍ការពារខ្លួន (PPE) កម្រិត ៣ បានត្រឹមត្រូវ»។
លោករដ្ឋមន្ត្រីថា ចំពោះក្រុមគ្រូពេទ្យ និងក្រុមផ្តល់សេវាជួរមុខដែលប៉ះពាល់ផ្ទាល់ជាមួយអ្នកវិជ្ជមានកូវីដ ១៩ និងមិនបានអនុវត្តត្រឹមត្រូវតាមវិធានការសុខាភិបាល ត្រូវធ្វើចត្តាឡីស័ករយៈពេល ៧ ថ្ងៃ ដែលគិតចាប់ពីថ្ងៃដែលបានប៉ះពាល់ ដោយត្រូវធ្វើចត្តាឡីស័កនៅផ្ទះ ឬនៅតាមទីតាំងដែលបានកំណត់ទុក។
ដោយឡែក នៅថ្ងៃទី ២៥ ខែតុលា ដដែលនោះដែរ លោក ម៉ម ប៊ុនហេង បានចូលរួមកិច្ចប្រជុំលើកទី ៧២ នៃអង្គការសុខភាពពិភពលោក ប្រចាំតំបន់ប៉ាស៊ីហ្វិកខាងលិច ដែលជាកិច្ចប្រជុំប្រចាំឆ្នាំថ្នាក់រដ្ឋមន្ត្រីសុខាភិបាល ដោយមានប្រទេស និងដែនដីជាសមាជិកទាំង ៣៧ បានចូលរួមចាប់ពីថ្ងៃទី ២៥ ដល់ថ្ងៃទី ២៩ ខែតុលា ឆ្នាំ ២០២១។ ក្នុងឱកាសនោះ លោក ម៉ម ប៊ុនហេង បានលើកឡើងថា ដូចបណ្តាប្រទេសដទៃទៀតដែរ វីរុសកូវីដ ១៩ នៅតែបន្តចរាចរនៅក្នុងប្រទេសកម្ពុជា។
លោកថ្លែងថា៖ «យើងកំពុងខិតខំប្រឹងប្រែង ដើម្បីទប់ស្កាត់ការចម្លងមេរោគ រួមជាមួយការអនុវត្តនូវវិធានការ ៣ការពារ ៣កុំ។ ឥឡូវនេះ យើងកំពុងស្ថិតក្នុងដំណាក់កាលនៃការកែសម្រួលយុទ្ធសាស្ត្រឆ្លើយតបនឹងជំងឺកូវីដ ១៩ ដើម្បីរៀនពីរបៀបរស់នៅជាមួយមេរោគ ខណៈអនុញ្ញាតឱ្យបើកដំណើរការសាលារៀន និងសេដ្ឋកិច្ចឡើងវិញដោយសុវត្ថិភាព»។
លោក ម៉ម ប៊ុនហេង ក៏បានធ្វើការចែករំលែកនូវបទពិសោធដែលជាកត្តាសំខាន់រួមចំណែកដល់ភាពជោគជ័យក្នុងការឆ្លើយតបរបស់កម្ពុជា ដែលចំណុចទាំងនោះមាន ភាពជាអ្នកដឹកនាំក្នុងការសម្រេចចិត្ត និងអភិក្រមការចូលរួមរបស់រាជរដ្ឋាភិបាលទាំងមូល ការវិនិយោគលើសន្តិសុខ សុខភាព និងប្រព័ន្ធសុខាភិបាល ការចូលរួមជាសាធារណៈ ការចូលរួមរបស់សហគមន៍ និងបុគ្គល និងចំណុចចុងក្រោយគឺសាមគ្គីភាព និងភាពជាដៃគូ។
កម្ពុជា គឺជាប្រទេសតូចតែមានបេះដូងទូលាយ។ កាលពីឆ្នាំមុន កម្ពុជាបានគ្រប់គ្រងដោយជោគជ័យនូវការឆ្លើយតបនឹងជំងឺកូវីដ ១៩ ដោយមានការឆ្លងតិចជាង ៥០០ ករណី និងមិនមានអ្នកស្លាប់ឡើយ។ ក្រោមការដឹកនាំដ៏ឈ្លាសវៃរបស់លោកនាយករដ្ឋមន្ត្រី ហ៊ុន សែន ព្រមទាំងមានការគាំទ្រពីគ្រប់វិស័យ និងសង្គមទាំងមូល ប្រទេសកម្ពុជានៅតែអាចបន្តគ្រប់គ្រងឆ្លើយតបជំងឺកូវីដ-១៩ បាន។
លោកថា៖ «ការបញ្ឈប់ជំងឺរាតត្បាតនេះ គឺជាគោលដៅរួមរបស់យើង។ សន្តិភាព សន្តិសុខសង្គម សាមគ្គីភាព និងកិច្ចសហប្រតិបត្តិការ គឺជាកត្តាចាំបាច់។ ប្រទេសកម្ពុជាកំពុងធ្វើការរួមគ្នាជាមួយប្រទេសនានា អង្គការសុខភាព ពិភពលោក និងដៃគូទាំងអស់ ដើម្បីអនាគតកាន់តែប្រសើរ ឆ្ពោះទៅរកពិភពលោកប្រកបដោយសុខភាព និងសុវត្ថិភាព»។ លោកថា កម្ពុជាគាំទ្រចំពោះភាពជាអ្នកដឹកនាំ និងការសម្របសម្រួលរបស់អង្គការសុខភាពពិភពលោកក្នុងការឆ្លើយតប ជាសកលទៅនឹងជំងឺកូវីដ ១៩ ហើយលោកក៏បានថ្លែងអំណរគុណចំពោះអង្គការនេះ និងប្រទេសជាសមាជិកទាំងអស់ ដែលបានសហការចូលរួមប្រយុទ្ធនឹងជំងឺកូវីដ ១៩ និងកំពុងធ្វើដំណើរឆ្ពោះទៅរកអនាគតល្អប្រសើរទាំងអស់គ្នា៕
វីដេអូ៖