.jpg)
ក្រុមមេខ្យល់ដែលនាំមនុស្សឆ្លងដែនទៅថៃ។ រូបថត នគរបាល
ភ្នំពេញៈ នគរបាលប្រឆាំងការជួញដូរមនុស្ស និងការពារអនីតិជនខេត្តបន្ទាយមានជ័យបញ្ជូនមេខ្យល់ប្រុស-ស្រី ៤ នាក់ទៅតុលាការនៅថ្ងៃទី ២៥ តុលា ពាក់ព័ន្ធនាំពលករប្រុស-ស្រី ១២ នាក់ និងក្មេងម្នាក់បម្រុងលួចឆ្លងដែនចូលប្រទេសថៃ។
លោកស្រី ឌី សុជាតិ ស្នងការរងទទួលផែនការងារនគរបាលប្រឆាំងការជួញដូរមនុស្សខេត្តឱ្យភ្នំពេញប៉ុស្តិ៍ដឹងនៅថ្ងៃទី ២៥ តុលាថា ជនដែលត្រូវបញ្ជូនទៅសាលាដំបូងខេត្តបន្ទាយមានជ័យទី១- មានឈ្មោះ សួន ម៉ាង ភេទប្រុស អាយុ ៣៩ ឆ្នាំទី២- ឈ្មោះ ចំរើន ធារៈ ភេទប្រុស អាយុ ៤៣ ឆ្នាំ ទី៣- ឈ្មោះ ចាន់ រស្មី ភេទស្រីអាយុ ៤១ ឆ្នាំ និងឈ្មោះ ប្រម វិន័យ ភេទស្រី អាយុ ២៦ ឆ្នាំ។ ពួកគេទាំង ៤ នាក់រស់នៅខេត្តបន្ទាយមានជ័យ។
លោកស្រីថ្លែងថា៖ «ករណីនេះយើងឃាត់ពួកគេនៅថ្ងៃទី ២៣ តុលាតែយើងទើបបញ្ជូនទៅតុលាការនៅថ្ងៃនេះ (ថ្ងៃទី ២៥ តុលា)។ ព្រោះយឺតដោយសារបំពេញកំណត់ហេតុមិនទាន់»។
បើតាមលោកស្រី សុជាតិ ប្រាប់ថា កាលពីយប់ថ្ងៃទី ២៣ តុលាកម្លាំងនគរបាលវរៈការពារព្រំដែនគោកលេខ ៨០៧ សហការជាមួយកម្លាំងនគរបាលអធិការដ្ឋាននគរបាលស្រុកស្វាយចេកបានធ្វើការទប់ស្កាត់ពលករប្រុស-ស្រីពេញវ័យ ១២ នាក់ និងក្មេងប្រុសជាកូនពលករម្នាក់ផង។ ទន្ទឹមនោះសមត្ថកិច្ចឃាត់ខ្លួនមេខ្យល់ប្រុស-ស្រីបានចំនួន ៤ នាក់ទៀត។
លោកស្រីបន្តថា ការឃាត់ខ្លួនពួកគេខណៈសមត្ថកិច្ចកំពុងដើរល្បាតបានឃើញមនុស្ស ១ ក្រុមដើរបម្រុងឆ្លងដែនចូលក្នុងប្រទេសថៃ។ ពេលនោះសមត្ថកិច្ចបានហៅសួរនាំ ហើយពួកគេឆ្លើយប្រាប់ថា មុនសមត្ថកិច្ចឃាត់ខ្លួនគឺកាលពីថ្ងៃទី ២៣ តុលាពួកគេត្រូវបានមេខ្យល់ចំនួន ៤ នាក់ ទំនាក់ទំនងធានាថានាំផ្លូវឆ្លងដែនចូលទៅប្រទេសថៃ។
លុះមានការព្រមព្រៀងគ្នាអស់ហើយ នៅថ្ងៃខែដដែលក្រុមមេខ្យល់ទាំង ៤ នាក់នោះបានដឹកពួកគេតាមរថយន្ត ខ្លះតាមម៉ូតូដាក់នៅគោលដៅតែក៏ត្រូវសមត្ថកិច្ចឃាត់ទៅ។ ចំណែកក្រុមជនសង្ស័យបានប្រាប់សមត្ថកិច្ចថាពួកគេយកលុយពីពលករម្នាក់ចំនួន ២ ៥០០ បាត។
ចំពោះមធ្យោបាយវិញគឺពួកគេបើករថយន្ត និងម៉ូតូដើរប្រមូលតាមទីតាំងដែលបានណាត់គ្នា។ បន្ទាប់ដឹកជញ្ជូនពលករតាមរថយន្ត និងម៉ូតូដល់គោលដៅរួចក៏នាំគ្នាដើរដោយថ្មើរជើងបម្រុងឆ្លងព្រំដែនតែត្រូវសមត្ថកិច្ចឃាត់តែម្តង។
លោកស្រីស្នងការរងបញ្ជាក់ថា ក្រោយពីធ្វើការសាកសួរចប់គឺសមត្ថកិច្ចបានបញ្ជូនពលករប្រុស-ស្រីទាំង ១២ នាក់ និងក្មេងម្នាក់ផងទៅមណ្ឌលដើម្បីធ្វើចត្តាឡីស័កមុនបញ្ជូនពួកគាត់ត្រឡប់ទៅលំនៅឋានវិញ៕
