.jpg)
សកម្មភាពកងកម្លាំងអន្តរាគមន៍ ទប់ទឹកជំនន់នៅខណ្ឌដង្កោ។ ហេង ជីវ័ន
ភ្នំពេញៈ អាជ្ញាធររាជធានីភ្នំពេញ បានសម្រេចបិទចរាចរណ៍លើកំណាត់ផ្លូវលេខ ២០ និង ផ្លូវលេខ ១០៤ ចាប់ពីរង្វង់មូលកួរស្រូវ ដល់ផ្សារកំពង់កន្តួតដោយសារស្ថានភាពទឹកស្ទឹងព្រែកត្នោតជន់ឡើងយ៉ាងគំហុក ហើយលិចហូរកាត់លើផ្លូវ និងលិចប៉ះផ្ទះប្រជាពលរដ្ឋជាច្រើនរយខ្នងដែលនៅតាមបណ្ដោយសណ្ដស្ទឹងព្រែកតោ្នត ក្នុងភូមិសាស្ត្រ ខណ្ឌដង្កោនិងខណ្ឌកំបូល។
លោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញ បាននិយាយថា ស្ថានភាពទឹកស្ទឹងព្រែកត្នោត កាលពីយប់ថ្ងៃទី២៥ខែតុលា ឆ្នាំ២០២១ បានជន់ឡើងយ៉ាងគំហុក បណ្ដាលឱ្យទឹកលិចហូរកាត់លើកំណត់ផ្លូវលេខ ២០ និង លេខ ១០៤ ដែលតម្រូវឱ្យរដ្ឋបាលរាជធានីភ្នំពេញ សម្រេចបិទចរាចរណ៍ឆ្លងកាត់ផ្លូវទាំង២ខ្សែនេះជាបណ្ដោះអាសន្នចាប់ពីចំណុចរង្វង់មូលកួរស្រូវ ដល់ផ្សារកំពង់កន្តួតដើម្បីការពារផលប៉ះពាល់និងខូចខាតផ្លូវធ្ងន់ធ្ងរ និងដើម្បីការពារសុវត្ថិភាពអ្នកធ្វើដំណើរ។
លោកបានថ្លែងថា៖ «ក្នុងខណៈនេះ ទឹកបានស្រកចុះបន្តិចវិញ ប៉ុន្តែសមត្ថកិច្ចយើងនៅមិនទាន់អនុញ្ញាតឱ្យរថយន្តដឹកទំនិញធំៗបើកឆ្លងកាត់នោះទេ ព្រោះបារម្ភខូចខាតផ្លូវ នៅចំណុចដែលទឹកកំពុងហូរកាត់នេះ»។
ជំនន់ទឹកស្ទឹងព្រែកត្នោត គិតត្រឹមថ្ងៃទី ២៦ ខែ តុលា ឆ្នាំ ២០២១ នេះ បានជន់លិចប៉ះពាល់ផ្ទះប្រជាពលរដ្ឋប្រមាណជាង ៦០០ ខ្នង នៅក្នុងភូមិសាស្ត្រខណ្ឌកំបូល និង ខណ្ឌដង្កោ។ នេះបើតាមរបាយការណ៍បឋម ដែល ភ្នំពេញ ប៉ុស្តិ៍ ទទួលបានពីអាជ្ញាធរមូលដ្ឋាន។
លោក ហង្ស មុនី អធិការខណ្ឌកំបូល បានប្រាប់ ភ្នំពេញ ប៉ុស្តិ៍ថា ការជន់ឡើងនៃទឹកស្ទឹងព្រែកត្នោត ដែលបណ្ដាលមកពីមានភ្លៀងធ្លាក់ខ្លាំងច្រើនថ្ងៃជាប់គ្នា នៅក្នុងភូមិសាស្ត្ររាជធានីភ្នំពេញ និង ទឹកដែលហូរធ្លាក់ពីផ្នែកខាងលើនៃខេត្តកំពង់ស្ពឺ បានបង្កឱ្យជន់លិចផ្លូវនិងប៉ះពាល់ផ្ទះប្រជាពលរដ្ឋចំនួន ២១៤ ខ្នង ដែលស្ថិតនៅសងខាងតាមបណ្ដោយសណ្ដស្ទឹងព្រែកត្នោតក្នុងភូមិសាស្ត្រសង្កាត់បឹងធំ នៃខណ្ឌកំបូល រាជធានីភ្នំពេញ។
លោកបានបញ្ជាក់ថា៖ «កំណាត់ផ្លូវលំក្នុងភូមិដូនកុក និងភូមិអន្លង់ស្វាយ មានកន្លែងខ្លះទឹកបានជន់លិចក្នុងជម្រៅជិត ២ ម៉ែត្រ មិនអាចធ្វើដំណើរដោយកង់ម៉ូតូ ឬរថយន្តនោះទេ។ ទោះជាបែបណា អ្នកភូមិភាគច្រើន សម្រេចចិត្តមិនជម្លៀសទៅកាន់ទីទួលសុវត្ថិភាព ឬទៅនៅផ្ទះបងប្អូនសាច់ញាតិជាបណ្ដោះអាសន្ននោះទេ»។
ដោយមើលឃើញពីទុកលំបាករបស់ប្រជាពលរដ្ឋនៅក្នុងតំបន់នោះ រដ្ឋបាលខណ្ឌកំបូល ក្រោមកិច្ចសហការចូលរួមពីកងកម្លាំងអន្តរាគមន៍ពិសេសនៃអង្គភាពយោធា ៩១១ បានប្រើប្រាស់កាណូតនិងអូប័រចំនួន ៦ គ្រឿង សម្រាប់អន្តរាគមន៍ដឹកជញ្ជូនប្រជាពលរដ្ឋ ពីក្នុងមូលដ្ឋានទៅកាន់ទីចំណតសុវត្ថិភាពដើម្បីធ្វើដំណើរបន្តទៅកាន់កន្លែងធ្វើការងារ និងផ្សារ ដោយមិនគិតថ្លៃ។ នេះបើតាមការអះអាងរបស់លោក សំរិទ្ធ កើន ជំទប់ទី២ សង្កាត់បឹងធំ។
លោកបានបញ្ជាក់ថា៖ «ការធ្វើដំណើរចេញចូលរបស់អ្នកភូមិអន្លង់ស្វាយ និង ភូមិដូនកុក ពីភូមិទៅកន្លែងធ្វើការ ផ្សារ និងមន្ទីរពេទ្យ គឺត្រូវបានកម្លាំងអន្តរាគមន៍ពិសេសនៃអង្គភាពយោធា ៩១១ ជួយសម្របសម្រួលដឹកជញ្ជូនដោយមិនគិតថ្លៃ តាមរយៈមធ្យោបាយ កាណូត និង អូប័រ»។
ជាមួយគ្នានេះកម្មការិនី រោងចក្រកាត់ដេរសម្លៀកបំពាក់ម្នាក់ នៅក្នុងសង្កាត់កំបូល អ្នកស្រី សូត្រ កញ្ញា អាយុ ២៩ ឆ្នាំ មានទីលំនៅភូមិដូនកុក សង្កាត់បឹងធំ ខណ្ឌកំបូលបាននិយាយប្រាប់ភ្នំពេញ ប៉ុស្តិ៍ថា៖ «ថ្វីបើភូមិរបស់យើងទឹកលិចហ៊ុមព័ន្ធជុំជិត ប៉ុន្តែយើងខ្ញុំជាប្រជាពលរដ្ឋ មានក្ដីកក់ក្ដៅខ្លាំងណាស់ ព្រោះអាជ្ញាធរ និងកងកម្លាំងយោធា បានយកចិត្តទុកដាក់ ចុះជួយអន្តរាគមន៍ដឹកជញ្ជូនយើងខ្ញុំពីភូមិទៅកាន់កន្លែងធ្វើការងារ និងពីកន្លែងការងារទៅភូមិវិញ ដោយមិនគិតថ្លៃ និងប្រកបដោយការទទួលខុសត្រូវ»។
ចំណែកលោក អ៊ុន សារុំ ចៅសង្កាត់គងនយ នៃខណ្ឌដង្កោ បានប្រាប់ ភ្នំពេញ ប៉ុស្តិ៍ថា ទឹកបានជន់លិចប៉ះពាល់ផ្ទះប្រជាពលរដ្ឋ ៤១៨ ខ្នង ក្នុងភូមិចំនួន ៤ រួមមាន ភូមិវាលថ្លាន់ ភូមិសេរីសម្បត្តិ ភូមិគងនយ និង ភូមិត្រពាំងសំរិទ្ធ។
លោកថ្លែងថា៖ «កាលពីព្រឹកល្ងាចថ្ងៃទី ២៥ ខែ តុលា ឆ្នាំ ២០២១ ទឹកបានលិចចូលក្នុងបន្ទប់ធ្វើការរបស់រដ្ឋបាលសាលាសង្កាត់យើង ត្រឹមជង្គង់ ប៉ុន្តែនៅព្រឹកថ្ងៃទី ២៦ ខែតុលានេះ វាបានស្រកបន្តិចវិញ គឺប្រមាណ ២ ហ៊ុន»។
លោក សារុំ ថ្លែងថា ដោយនៅតែមានក្ដីព្រួយកង្វល់អំពីបញ្ហាប្រឈមការជន់លិចដោយជំនន់ទឹកភ្លៀង និងជំនន់ទឹកស្ទឹងព្រែកត្នោត នៅពេលដែលទទួលបានព័ត៌មានពីក្រសួងធនធានទឹក និងឧតុនិយម ថាភ្លៀងនឹងបន្តធ្លាក់ខ្លាំង ២ ថ្ងៃ ជាប់គ្នាថែមទៀត គឺ ថ្ងៃទី ២៧ និង ២៨ ខែតុលា ខាងមុខនេះ ដែលអាចបង្កឱ្យជន់លិចផ្នែកខ្លះថែមទៀត នៅក្នុងភូមិសាស្ត្ររាជធានីភ្នំពេញ ខេត្តកំពង់ស្ពឺ តាកែវ កណ្ដាល កំពង់ឆ្នាំង ពោធិ៍សាត់ ព្រៃវែង និងខេត្ត ស្វាយរៀង។
លោកបានថ្លែងថា៖ «បើសិនជាមានភ្លៀងធ្លាក់ខ្លាំងដូចការព្យាករណ៍របស់ក្រសួងធនធានទឹក និងឧតុនិយមមែននោះ ទឹកនឹងបន្តជន់លិចផ្ទះអ្នកភូមិជាច្រើនថែមទៀតនៅតាមសណ្ដស្ទឹងព្រែកត្នោតនេះ ពិសេសក្នុងភូមិសាស្ត្រសង្កាត់គងនយយើងខ្ញុំតែម្ដង»។
យ៉ាងណាក៏ដោយ នៅពេលនេះក្រុមកម្លាំងសមត្ថកិច្ចចម្រុះទាំងថ្នាក់ជាតិ និង ថ្នាក់មូលដ្ឋាន សរុប ជិត ១ ០០០ នាក់ ដែលភាគច្រើន ជាកងកម្លាំងប្រដាប់អាវុធទាំង៣ប្រភេទ កំពុងប្រើគ្រឿងចក្រកាយដីលើកជាទំនប់ទប់ស្កាត់ទឹកមិនឱ្យជន់លិចចូលមកក្នុងរាជធានី ដោយបានកាយប្រឡាយសំខាន់ៗជាច្រើនកន្លែង ដើម្បីបង្វែរមុខទឹកឱ្យហូរធ្លាក់ទៅតាមបឹងព្រែក និងប្រឡាយនានា ចូលទៅទន្លេបាទី ក្នុងខេត្តតាកែវ និងទន្លេបាសាក់ ក្នុងខេត្តកណ្ដាល៕
