.jpg)
អធិការស្រុកសង្កែ នៃខេត្តបាត់ដំបង លោក ស៊ុន សុវណ្ណ ដែលរងការចោទថា ប្រព្រឹត្តអំពើពុករលួយ។ រូបថត ប៉ូលិស
ភ្នំពេញៈ ស្នងការនគរបាលខេត្តបាត់ដំបង ចាត់ឱ្យមន្ត្រីស្រាវជ្រាវលើមន្ត្រីនគរបាលយុត្តិធម៌ នៅអធិការដ្ឋាននគរបាលស្រុកសង្កែ បន្ទាប់ពីមានលិខិតអនាមិក ចោទប្រកាន់ទៅលើលោក ស៊ុន សុវណ្ណ អធិការស្រុកសង្កែ ឃុបឃិតជាមួយកូនចៅមួយចំនួនប្រព្រឹត្តអំពើពុករលួយនៅក្នុងអង្គភាព។
លោក សាត គឹមសាន ស្នងការនគរបាលខេត្តបាត់ដំបង ថ្លែងនៅថ្ងៃទី ២៦ តុលាថា ក្រោយពីទទួលដំណឹងលិខិតអនាមិក ដែលបានសរសេរវាយប្រហារទៅលើលោកអធិការស្រុកសង្កែនោះ លោកក៏បានចាត់ឱ្យខាងបុគ្គលិក ជាអ្នកធ្វើការស្រាវជ្រាវ តែមិនទាន់ទទួលបានលទ្ធផលយ៉ាងណានៅឡើយទេ។
លោកបញ្ជាក់ថា៖ «ខ្ញុំបានចាត់ឱ្យទៅខាងបុគ្គលិកចុះធ្វើការស្រាវជ្រាវលើករណីនេះហើយ ឥឡូវគេកំពុងធ្វើការងារហ្នឹង»។
ក្នុងលិខិតអនាមិកដែលសរសេរគោរពជូនលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោក សាត គឹមសាន ស្នងការនគរបាលខេត្តបាត់ដំបង បានសរសេរខ្លឹមសារចោទប្រកាន់ទៅលើលោក ស៊ុន សុវណ្ណ អធិការនគរបាលស្រុកសង្កែ និងលោក ហៀង យ៉ុងហុង អធិការរង ទទួលបន្ទុកសេនាធិការថា បានរួមដៃគ្នាប្រព្រឹត្តអំពើពុករលួយក្នុងអង្គភាព និងបក្ខពួកនិយម។
លិខិតអនាមិកនោះសរសេរថា៖ «លោក ស៊ុន សុវណ្ណ អធិការស្រុកសង្កែ និងលោក ហៀង យ៉ុងហុង អធិការរង ទទួលបន្ទុកសេនាធិការ បានរួមគំនិតគ្នាប្រព្រឹត្តអំពើពុករលួយបក្ខពួកនិយម ដំឡើងឋានន្តរស័ក្ដិ ទារលុយពីកូនចៅក្រោមឱវ៉ាតរបស់ខ្លួន។ ឱ្យមន្ត្រីអសកម្មមិនមកធ្វើការបើកប្រាក់ខែរដ្ឋ និងកាប់ទន្ទ្រានដីព្រៃលិចទឹកនៅតំបន់ ៣ របស់រដ្ឋក្នុងឃុំកំពង់ព្រៀង ស្រុកសង្កែ ធ្វើជាកម្មសិទ្ធរបស់ខ្លួន»។
លិខិតអនាមិកនេះ បញ្ជាក់ថា ដោយសារតែទង្វើរបស់លោកអធិការស្រុកសង្កែ ទើបធ្វើឱ្យមន្ត្រីមួយចំនួននៅក្នុងអង្គភាព មានសតិអារម្មណ៍មិនល្អ បណ្ដាលឱ្យគ្មានវិន័យក្នុងអង្គភាព។ បន្ថែមលើនោះ លិខិតអនាមិកក៏បានបង្ហាញឈ្មោះ និងអត្តលេខមន្ត្រីមួយចំនួន ដែលលិខិតអនាមិកអះអាងថា ជាមន្ត្រីអសកម្ម និងខិលខូចជាច្រើនរូបនៅក្នុងអង្គភាព។
លិខិតដដែលលើកឡើងថា មានឈ្មោះមន្ត្រីចំនួន ៨ នាក់ ដែលអសកម្មមិនចូលធ្វើការ តែមានវត្តមានចុះក្នុងបញ្ជីវត្តមានរាល់ថ្ងៃ និងបានបើកប្រាក់ខែយ៉ាងទៀងទាត់ទៀតផង។ ដោយឡែក មន្ត្រីចំនួន ៥ រូបផ្សែងទៀត ក៏ត្រូវបានលិខិតនេះ សរសេរចោទថា លោក ស៊ុន សុវណ្ណ និងលោក ហៀង យ៉ុងហុង ឃុបឃិតគ្នាស្ងាត់ៗ រៀបចំផ្លាស់ប្ដូរតួនាទីមន្ត្រីទាំង ៥ រូបនោះ ពីផ្នែកមួយ ទៅផ្នែកមួយ ដោយគ្មានការឯកភាពពីថ្នាក់ដឹកនាំតាមផ្នែកជំនាញឡើយ និងខុសពីសេចក្ដីសម្រេចរបស់ថ្នាក់លើ។
លោក ស៊ុន សុវណ្ណ អធិការស្រុកសង្កែ ថ្លែងនៅថ្ងៃទី ២៦ ខែតុលាថា នេះជាការចោទប្រកាន់បង្កាច់បង្ខូចខុសការពិត។ ប៉ុន្តែលោកសុំមិនបកស្រាយអ្វីច្រើនឡើយ ដោយទុកឱ្យថ្នាក់ដឹកនាំធ្វើការស្រាវជ្រាវស្វែងរកការពិត។ លោអធិការប្រាប់ថា លោកស្នងការបានហៅអ្នកពាក់ព័ន្ធទៅសួរនាំជាបន្តបន្ទាប់ ប៉ន្តែនៅមិនទាន់ដឹងលទ្ធផលយ៉ាងណានោះទេ។
លោកថ្លែងថា៖ «សូមអធ្យាស្រ័យផង ខ្ញុំមិនដឹងថា ត្រូវបកស្រាយយ៉ាងម៉េចទេ។ បើគេបង្ខូចយើងអ៊ីចឹង យើងទុកឱ្យថ្នាក់ដឹកនាំគាត់ស្រាវជ្រាវ។ ខាងស្នងការខ្ញុំគាត់បានហៅកូនចៅខ្ញុំទៅសួរហើយ គឺអ្នកដែលពាក់ព័ន្ធទាំងអស់។ សួរតាំងពីម្សិលមិញ ហើយថ្ងៃនេះក៏សួរដែរ តែខ្ញុំមិនដឹងថាលទ្ធផលយ៉ាងណាទេ»៕
វីដេអូ៖
