ភ្នំពេញៈ តុលាការកំពូលនៅថ្ងៃទី ២៧ តុលា បើកជំនុំជម្រះបុរសជាប់ចោទម្នាក់រឿងផលិតគ្រឿងញៀនខុសច្បាប់ប្រព្រឹត្តនៅរាជធានីភ្នំពេញ ក្នុងឆ្នាំ ២០១៦ ក្រោយពីសាលាឧទ្ធរណ៍ផ្តន្ទាទោសដាក់ពន្ធនាគារ ២០ ឆ្នាំ។
លោកចៅក្រម ឃឹម ប៉ុណ្ណ ប្រធានក្រុមប្រឹក្សាជំនុំជម្រះតុលាការកំពូលបានថ្លែងនៅក្នុងបន្ទប់សវនាការនៅថ្ងៃទី ២៧ តុលាថា សំណុំរឿងនេះមានជនជាប់ចោទឈ្មោះ សេន ដាយូសា ភេទប្រុសអាយុ ៣៤ ឆ្នាំ ជាជនជាតិខ្មែរអ៊ីស្លាម។
លោកបន្តថា៖ «តុលាការកំពូលនឹងពិភាក្សាសំណុំរឿងនេះ ក្រោយបញ្ចប់សវនាការហើយលើកទៅប្រកាសសាលដីកានៅថ្ងៃទី ៣ វិច្ឆិកា»។
ជនជាប់ចោទ សេន ដាយូសា និយាយនៅក្នុងបន្ទប់សវនាការនៅថ្ងៃទី ២៧ តុលាថា គាត់ប្តឹងសារទុក្ខមកតុលាការកំពូលនៅពេលនេះ ព្រោះគាត់មិនសុខចិត្តនឹងសាលាឧទ្ធរណ៍ដែលផ្តន្ទាទោសគាត់ដាក់ពន្ធនាគារ ២០ ឆ្នាំ។
ជនជាប់ចោទថា៖ «រឿងនេះខ្ញុំមិនបានប្រព្រឹត្តដូចការចោទប្រកាន់ទេ ខ្ញុំជាអ្នកជក់គ្រឿងញៀនទេ។ ខ្ញុំសូមឱ្យតុលាការដោះលែងខ្ញុំឱ្យមានសេរីភាពវិញ»។
ទោះយ៉ាងណាលោក ឌុច គឹមសន តំណាងមហាអយ្យការបានធ្វើសេចក្តីសន្និដ្ឋានថា ឆ្លងតាមការសិក្សាសំណុំរឿងបង្ហាញថា ជនជាប់ចោទគឺជាអ្នកប្រើប្រាស់គ្រឿងញៀន។ បន្ទាប់មកសមត្ថកិច្ចឃាត់ខ្លួនគាត់ និងឱ្យគាត់នាំទៅចាប់បុរសម្នាក់ទៀតដែលទីតាំងនោះជាកន្លែងផលិតគ្រឿងញៀន។
លោកថា៖ «ជនជាប់ចោទមានទំនាក់ទំនងជាមួយបុរសនោះដោយសារជនជាប់ចោទទិញថ្នាំញៀនពីបុរសនោះ។ ខ្ញុំស្នើសុំក្រុមប្រឹក្សាជំនុំជម្រះពិចារណាតាមច្បាប់»។
លោក នូ ចន្ថា មេធាវីការពារសិទ្ធិឱ្យជនជាប់ចោទបានសន្និដ្ឋានថា តាមការពិតកូនក្តីរបស់លោកជាអ្នកប្រើប្រាស់គ្រឿងញៀនទេ។ ប៉ុន្តែកូនក្តីលោកទិញថ្នាំញៀនពីឈ្មោះ យ៉ុង ចាន់ហ៊ុយយ៉ុង យកមកជក់។
លោកមេធាវីថា៖ «រឿងនេះកូនក្តីខ្ញុំនាំសមត្ថកិច្ចទៅចាប់យ៉ុង ចាន់ហ៊ុយយ៉ុង តែសមត្ថកិច្ចបែរជាចោទកូនក្តីខ្ញុំថាជាអ្នកផលិតថ្នាំញៀនដែរ។ ខ្ញុំស្នើតុលាការកំពូលដោះលែងគាត់វិញ»។
បើយោងកំណត់ហេតុរបស់តុលាការកំពូលបង្ហាញថា កាលពីវេលាម៉ោង ៣ ទៀបភ្លឺ ឈានចូលថ្ងៃទី ៤ ខែ ធ្នូ ២០១៦ នគរបាល ខណ្ឌឫស្សីកែវបានឃាត់ខ្លួនឈ្មោះ សេន ដាយូសា ហៅ បូ។ ពេលនោះសមត្ថកិច្ចដកហូតគ្រឿងញៀនបានចំនួន ២ កញ្ចប់តូច ខណៈជនជាប់ចោទកំពុងជិះម៉ូតូតាមផ្លូវ។ ជនជាប់ចោទប្រាប់សមត្ថកិច្ចនៅពេលចាប់ខ្លួនថា គេទិញគ្រឿងញៀនពីឈ្មោះ យ៉ុង ចាន់ហ៊ុយយ៉ុង ជាជនជាតិវៀតណាម។
កំណត់ហេតុបង្ហាញទៀតថា បន្ទាប់ពីឃាត់ខ្លួន គឺជនជាប់ចោទបាននាំសមត្ថកិច្ចទៅឃាត់ខ្លួនឈ្មោះ យ៉ុង ចាន់ហ៊ុយយ៉ុង អាយុ ៣៨ ឆ្នាំ បានម្នាក់ទៀតនៅផ្ទះមួយកន្លែងក្នុងភូមិចំរើនផល១ សង្កាត់ បឹងទំពុន ខណ្ឌមានជ័យ រាជធានី ភ្នំពេញ។
ពេលនោះដែរ សមត្ថកិច្ចបានរកឃើញថ្នាំញៀន និងសារធាតុផ្សំមួយចំនួនធំផងដែរ។ដូចជាសារធាតុម៉េតាណុលចំនួន ១៤ ដប, ម្សៅក្រាមពណ៌សថ្លាចំនួន ២ កញ្ចប់ ធំ , ថ្នាំពេទ្យសម្រាប់កែច្នៃផ្សំជាសារធាតុញៀនមួយចំនួនធំ, សារធាតុញៀនជាគ្រាប់ចំនួន៣កញ្ចប់ធំ, គ្រឿងញៀនប្រភេទខេ (សម្រាប់ហិត), ប្រភេទថ្នាំគ្រវី (គ្រាប់) គ្រឿងញៀនប្រភេទ wy (យ៉ាម៉ា) ជញ្ជីងថ្លឹងថ្នាំញៀន ចំនួន ១, ឧបករណ៍សម្រាប់ជក់ ថ្នាំញៀនមួយចំនួនព្រមទាំងឧបករណ៍សម្រាប់កែច្នៃសារធាតុញៀនមួយចំនួនទៀត។
សំណុំរឿងនេះត្រូវបានសាលាដំបូងរាជធានីភ្នំពេញ បើកការជំនុំជម្រះ និងប្រកាសសាលក្រមនៅថ្ងៃទី ២៣ សីហា ឆ្នាំ ២០១៧ ដោយផ្តន្ទាទោសឈ្មោះ យ៉ុង ចាន់ហ៊ុយយ៉ុង និងជនជាប់ចោទដាក់ពន្ធនាគារម្នាក់ៗ ៣០ ឆ្នាំ ចោទបទផលិតដោយខុសច្បាប់នូវសារធាតុញៀនតាមមាត្រា ៤០ ច្បាប់ស្តីពីការត្រួតពិនិត្យគ្រឿងញៀន។
ដោយមិនសុខចិត្តជនជាប់ចោទឈ្មោះ សេន ដាយូសា បានប្តឹងជំទាស់ទៅសាលាឧទ្ធរណ៍ហើយត្រូវឧទ្ធរណ៍ប្រកាសសាលដីការនៅថ្ងៃទី ១៩ តុលា ឆ្នាំ ២០២០ សម្រចបន្ថយទោសពី ៣០ ឆ្នាំមក ២០ ឆ្នាំវិញ ដោយសំអាងថាមិនមែនជាអ្នកប្រព្រឹត្តផ្ទាល់តែជនជាប់ចោទបានទិញថ្នាំពេទ្យឱ្យឈ្មោះ យ៉ុង ចាន់ហ៊ុយយ៉ុង។ បន្ទាប់ពីត្រូវសាលាឧទ្ធរណ៍បន្ថយទោសមកត្រឹម ២០ ឆ្នាំក្តី តែជនជាប់ចោទនៅតែមិនសុខចិត្តប្តឹងសារទុក្ខទៅតុលាការកំពូលទៀត៕