ភ្នំពេញៈ ក្រសួងមហាផ្ទៃសម្រេចឱ្យមានការបង្កើត និងការគ្រប់គ្រងក្រុមបង្ការ និងពន្លត់អគ្គិភ័យកាតព្វកិច្ចនៅតាមសំណង់ និងគោលដៅដែលតម្រូវឱ្យមានប្លង់ប្រព័ន្ធបង្ការ និងពន្លត់អគ្គិភ័យ ព្រមទាំងក្រុមបង្ការនិងពន្លត់អគ្គិភ័យស្ម័គ្រចិត្តនៅតាមភូមិ និងសហគមន៍ក្នុងឃុំ-សង្កាត់។ នេះបើតាមប្រកាសរបស់ក្រសួងមហាផ្ទៃ ក្នុងខែនេះ។
ប្រកាសលេខ ២៦៤៤ ចុះថ្ងៃទី ១៩ ខែ តុលា ឆ្នាំ ២០២១ ចុះហត្ថលេខាដោយលោកឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង មាន ២៧ ប្រការ។ ប្រកាសនេះផ្តោតសំខាន់លើការពង្រីកសេវាគ្រប់គ្រង បង្ការទប់ស្កាត និងកាត់បន្ថយឱ្យបានជាអតិបរមានូវហានិភ័យគ្រោះមហន្តរាយ ដែលបង្កឡើងដោយគ្រោះអគ្គិភ័យនៅតាមសហគមន៍មូលដ្ឋានភូមិ ឃុំ-សង្កាត់ នៅទូទាំងប្រទេស តាមរយៈការបង្កើត និងគ្រប់គ្រងក្រុមបង្ការ-ពន្លត់អគ្គិភ័យកាតព្វកិច្ច និងក្រុមបង្ការ-ពន្លត់អគ្គិភ័យស្ម័គ្រចិត្ត។
ក្រុមបង្ការ-ពន្លត់អគ្គិភ័យនេះ ជាក្រុមជំនួយបឋម របស់កងកម្លាំងនគរបាលបង្ការពន្លត់អគ្គិភ័យ និងសង្គ្រោះនៃរាជធានី-ខេត្ត សម្រាប់ប្រតិបត្តិការបង្ការពន្លត់អគ្គិភ័យ និងសង្គ្រោះនៅតាមសំណង់គ្រឹះស្ថាន និងគោលដៅដែលតម្រូវឱ្យមានប្លង់ប្រព័ន្ធបង្ការ-ពន្លត់អគ្គិភ័យ និងតាមសហគមន៍មូលដ្ឋានភូមិ ឃុំ-សង្កាត់។
យោងតាមប្រការ ៦ ប្រការ ៧ និងប្រការ ៨ នៃប្រកាសនេះ អ្នកគ្រប់គ្រងសំណង់ ឬ គោលដៅដែលតម្រូវឱ្យមានប្លង់ប្រព័ន្ធបង្ការ-ពន្លត់អគ្គិភ័យ ត្រូវបង្កើតក្រុមបង្ការ-ពន្លត់អគ្គិភ័យកាតព្វកិច្ចមួយ ដែលមានសមាជិកយ៉ាងតិច ៥ នាក់ឡើងទៅ។
ពួកគេ គឺជាបុគ្គលិកដែលកំពុងបម្រើការងារនៅក្នុងការដ្ឋានដ្ឋានសំណង់ ឬសំណង់អគារ គ្រឹះស្ថានរបស់ខ្លួន និងដោយមានកិច្ចសហការនិងគាំទ្រផ្នែកបច្ចេកទេសពីអង្គភាពនគរបាលបង្ការ ពន្លត់អគ្គិភ័យ និងសង្គ្រោះ នៃរាជធានី-ខេត្ត និងអគ្គស្នងការដ្ឋាននគរបាលជាតិ។
ក្រុមបង្ការ-ពន្លត់អគ្គិភ័យកាតព្វកិច្ច គឺជាក្រុមជំនួយបឋមសម្រាប់ប្រតិបត្តិការពន្លត់អគ្គិភ័យ នៅតាមសំណង់ និងគោលដៅ ដែលតម្រូវឱ្យមានប្រព័ន្ធបង្ការ-ពន្លត់អគ្គិភ័យ។ មានតួនាទីផ្សព្វផ្សាយ អប់រំ ដល់សហគមន៍របស់ខ្លួនអំពីគ្រោះអគ្គិភ័យ និង ជួយសង្គ្រោះជីវិតមុនស្ស ទ្រព្យសម្បត្តិ និងចូលរួមជួយពន្លត់អគ្គិភ័យ ដោយអនុវត្តតាមការណែនាំរបស់មន្ត្រីនគរបាលបង្ការ ពន្លត់អគ្គិភ័យ និងសង្គ្រោះ នៅកន្លែងកើតហេតុ។
ប្រការ១០នៃប្រកាសនេះបញ្ជាក់ថា៖«ក្នុងពេលប្រតិបត្តិការពន្លត់អគ្គិភ័យ ក្រុមបង្ការ-ពន្លត់អគ្គិភ័យកាតព្វកិច្ច អាចសុំជំនួយគាំទ្រនូវឧបករណ៍ សម្ភារ និងមធ្យោបាយ ពីសប្បុរសជន ឬពីប្រជាពលរដ្ឋក្នុងមូលដ្ឋាន»។
ស្រដៀងគ្នានេះ ក្រុមបង្ការ-ពន្លត់អគ្គិភ័យស្ម័គ្រចិត្ត ក៏ជាក្រុមជំនួយបឋមសម្រាប់ប្រតិបត្តិការពន្លត់អគ្គិភ័យនិងសង្គ្រោះនៅតាមភូមិ ឃុំ-សង្កាត់ ឬសហគមន៍ដែលពួកខ្លួនរស់នៅ ហើយតួនាទីនិងភារកិច្ចទទួលខុសត្រូវរបស់ពួកគេ គឺដូចគ្នាទៅនឹងក្រុមបង្ការ-ពន្លត់អគ្គិភ័យកាតព្វកិច្ចផងដែរ។
ប៉ុន្តែការបង្កើត និងគ្រប់គ្រងក្រុមបង្ការ-ពន្លត់អគ្គិភ័យស្ម័គ្រចិត្ត គឺជាភារកិច្ចទទួលខុសត្រូវរបស់រដ្ឋបាលឃុំ-សង្កាត់ ក្រោមកិច្ចសហការនិងគាំទ្រផ្នែកបញ្ចេកទេសពីរដ្ឋបាល ស្រុក-ខណ្ឌ និងពីអង្គភាពនគរបាល បង្ការ ពន្លត់អគ្គិភ័យ និង សង្គ្រោះនៃរាជធានី-ខេត្តនីមួយៗនៅទូទាំងប្រទេស។
«ក្រុមបង្ការ-ពន្លត់អគ្គិភ័យស្ម័គ្រចិត្ត ត្រូវរៀបចំឡើងដោយជ្រើសរើសយកជនដែលមានអាយុយ៉ាងតិច១៨ឆ្នាំ មានកាយសម្បទា និងសុខភាពមាំមួន និង ជាប្រជាពលរដ្ឋដែលកំពុងរស់នៅក្នុងសហគមន៍មូលដ្ឋាន ភូមិ ឃុំ-សង្កាត់របស់ខ្លួន» នេះបើយោងតាមប្រការ១៦នៃប្រកាសនេះ។
យ៉ាងណាក៏ដោយ ប្រកាសស្ដីពី «ការបង្កើតនិងគ្រប់គ្រងក្រុមបង្ការ-ពន្លត់អគ្គិភ័យកាតព្វកិច្ច និងក្រុមបង្ការ-ពន្លត់អគ្គិភ័យស្ម័គ្រចិត្ត» មិនមានប្រការណាមួយ ដែលនិយាយអំពីការចាត់វិធានការ ដាក់ពិន័យទៅលើម្ចាស់ឬអ្នកគ្រប់គ្រងសំណង់ និង គោលដៅដែលតម្រូវឱ្យមានប្លង់ប្រព័ន្ធបង្ការ-ពន្លត់អគ្គិភ័យ ឬ រដ្ឋបាលឃុំ-សង្កាត់ ទាំងឡាយណា ដែលមិនអនុវត្តបង្កើតក្រុមបង្ការ-ពន្លត់អគ្គិភ័យកាតព្វកិច្ច និងក្រុមបង្ការ-ពន្លត់អគ្គិភ័យស្ម័គ្រចិត្ត នៅតាមអង្គភាព ឬស្ថាប័នរបស់ខ្លួននោះទេ។
ដូចគ្នានេះដែរ ក៏មិនបានចែងអំពីការដាក់ពិន័យ ទៅលើបុគ្គលនៃក្រុមបង្ការ-ពន្លត់អគ្គិភ័យកាតព្វកិច្ច និងក្រុមបង្ការ-ពន្លត់អគ្គិភ័យស្ម័គ្រចិត្ត ដែលបានប្រព្រឹត្តផ្ទុយពីតួនាទីនិងភារកិច្ចរបស់ខ្លួន ដែលបានចែងនៅក្នុងប្រកាសនេះដែរ។
ជុំវិញករណីនេះ លោកនេត វន្ថា ប្រធាននាយកដ្ឋាន បង្ការ-ពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិ ក្រសួងមហាផ្ទៃ ប្រាប់ភ្នំពេញប៉ុស្តិ៍ថា ប្រកាសនេះធ្វើឡើង ដើម្បីលើកទឹកចិត្តដល់ប្រជាពលរដ្ឋទូទៅ រួមទាំងវិស័យឯកជន ចូលរួមសហការ ជាមួយកម្លាំងនគរបាលបង្ការ-ពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានី-ខេត្ត ក្នុងការបង្ការ ទប់ស្កាត់ និងកាត់បន្ថយនូវហានិភ័យគ្រោះមហន្តរាយ ដែលបង្កឡើងដោយគ្រោះអគ្គិភ័យនៅកម្ពុជា។
លោកបញ្ជាក់ថា៖«ក្នុងតំណាក់កាលនេះ យើងមិនអាចដាក់បញ្ចូល នូវទោសប្បញ្ញត្តិណាមួយ នៅក្នុងប្រកាសនេះបានទេ ព្រោះយើងត្រូវការអ្នកចូលរួមពីគ្រប់ភាគីពាក់ព័ន្ធទាំងអស់។ជាពិសេសការចូលរួមពីប្រជាពលរដ្ឋក្នុងសហគមន៍មូលដ្ឋាន ភូមិ ឃុំ-សង្កាត់ និងវិស័យឯកជន ដើម្បីធ្វើឱ្យប្រសើរឡើងនូវ សុវត្ថិភាព សន្តិសុខសង្គម»។
ទន្ទឹមនឹងនេះលោកបង្ហាញពីក្ដីរំពឹងថា ការខូចខាតដោយគ្រោះអគ្គិភ័យនៅកម្ពុជា នឹងថយចុះ នៅពេលប្រជាពលរដ្ឋ និង វិស័យឯកជន យល់ច្បាស់ពីតួនាទីនិងភារកិច្ចរបស់ខ្លួន និងចូលរួមអនុវត្តតាមប្រកាសនេះដោយស្មារតីទទួលខុសត្រូវ។
ក្នុងរយៈពេល ៩ ខែនៃឆ្នាំ ២០២១ នេះ គ្រោះអគ្គិភ័យបានកើតឡើងចំនួន៤៩០លើក បណ្ដាលឱ្យមនុស្ស ១៩ នាក់ស្លាប់ និង ១៩ នាក់ទៀតរងរបួស។ ឆេះខូចខាតផ្ទះទាំងតូចទាំងធំសរុបចំនួន ៣៥១ ខ្នង និងតូបលក់ដូរ ចំនួន ២៣១ តូប។ បើធៀបទៅ រយៈពេល៩ខែដូចគ្នាកាលពីឆ្នាំមុន មានការថយចុះចំនួន ៣៤៨ លើក។
ក្នុងរយៈពេល ៩ ខែ ឆ្នាំ ២០២០ គ្រោះអគ្គិភ័យបានកើតឡើងចំនួន៨៣៨លើក បណ្ដាលឱ្យមនុស្ស ២៣នាក់ស្លាប់ និង៣៩នាក់ទៀតរងរបួស។ ឆេះខូចខាតផ្ទះទាំងតូចទាំងធំសរុបចំនួន៦៣៤ ខ្នង និងតូបលក់ដូរចំនួន ២៧១ តូប។ នេះបើតាមរបាយការណ៍របស់នាយកដ្ឋាន បង្ការ-ពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិ ដែលភ្នំពេញប៉ុស្តិ៍ទទួលបាននៅរសៀលថ្ងៃទី ២៧ ខែ តុលា ឆ្នាំ ២០២១៕