ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានចេញសេចក្តីសម្រេចឱ្យកម្មករនិយោជិតឈប់សម្រាកនៅថ្ងៃបុណ្យប្រចាំឆ្នាំ ២០២២ ដោយមានប្រាក់ឈ្នួលរយៈពេល ២១ ថ្ងៃដូចគ្នានឹងឆ្នាំ ២០២១ ដែរ។
យោងតាមសេចក្តីសម្រេចដែលចុះហត្ថលេខាដោយ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈនៅថ្ងៃទី ២៧ ខែ តុលា ឆ្នាំ ២០២១ បានសម្រេចអនុញ្ញាតឱ្យកម្មករនិយោជិតនៃរោងចក្រ សហគ្រាសទាំងអស់ ដែលមានចែងក្នុងមាត្រា ១ នៃច្បាប់ការងារបានឈប់សម្រាកពីការងារដោយមានប្រាក់ឈ្នួលទៅតាមប្រតិទិនរយៈពេល ២១ ថ្ងៃនៃថ្ងៃបុណ្យសម្រាប់ឆ្នាំ ២០២២។
លោក អ៊ិត សំហេង សរសេរថាចំពោះរោងចក្រ សហគ្រាសទាំងឡាយណា ដែលកម្មវត្ថុអាជីវកម្មមានចរិតលក្ខណៈសកលត្រូវប្រព្រឹត្តទៅជាប្រចាំនឹងមិនអាចបញ្ឈប់សកម្មភាពបាន ហើយការឈប់សម្រាកបុណ្យនៃកម្មករនិយោជិតទាំងអស់ព្រមគ្នាក្នុងពេលតែមួយនាំឱ្យខូចប្រយោជន៍ដល់សាធារណជន ឬក៏ធ្វើឱ្យខូចដំណើរការរបស់រោងចក្រ សហគ្រាស នោះ ម្ចាស់ ឬនាយករោងចក្រ សហគ្រាស ត្រូវរៀបចំបែងចែកឱ្យកម្មករនិយោជិតបានឈប់សម្រាកទៅតាមថ្ងៃបុណ្យនីមួយៗ ដោយផ្លាស់ប្ដូរគ្នា។
លោក សំហេង បានបញ្ជាក់នៅក្នុងសេចក្តីសម្រេចនេះថា ក្នុងករណីមានការព្រមព្រៀងគ្នារវាងកម្មករនិយោជិតសាមី និងនិយោជក ឬមានចែងនៅក្នុងបទបញ្ជាផ្ទៃក្នុងរបស់រោងចក្រ សហគ្រាស ឬអនុសញ្ញារួម ការឈប់សម្រាករបស់កម្មករនិយោជិតអាចអនុវត្តនៅពេលណាមួយផ្សេងទៀត ដែលខុសពីថ្ងៃឈប់សម្រាកបុណ្យដូចមានកំណត់ក្នុងប្រកាសនេះ។
លោក សំហេង សរសេរថា៖ «ម្ចាស់ ឬនាយករោងចក្រ សហគ្រាសត្រូវរៀបចំបញ្ជីឈ្មោះកម្មករនិយោជិតដែលត្រូវផ្លាស់ប្តូរគ្នាឈប់សម្រាកនៅថ្ងៃបុណ្យនីមួយៗ ហើយរក្សាទុកជាប្រចាំសម្រាប់ការត្រួតពិនិត្យរបស់អធិការការងារ»។
បើតាមលោក សំហេង ក្នុងអំឡុងពេលនៃការឈប់សម្រាកដោយផ្លាស់ប្ដូរគ្នានេះ ម្ចាស់ ឬនាយករោងចក្រ សហគ្រាសអាចប្រើប្រាស់ កម្មករនិយោជិតផ្សេងជាបណ្ដោះអាសន្នមកជំនួសកម្មករនិយោជិតដែលបានឈប់សម្រាក។
ភ្នំពេញប៉ុស្តិ៍មិនអាចទាក់ទងលោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ សុំធ្វើអត្ថាធិប្បាយបន្ថែមបានទេនៅថ្ងៃទី ២៧ ខែតុលា ឆ្នាំ ២០២១ ដោយទូរស័ព្ទរបស់លោកហៅចូលហើយ គ្មានអ្នកលើក។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ប្រាប់ ភ្នំពេញ ប៉ុស្តិ៍ នៅថ្ងៃទី ២៧ ខែតុលា ឆ្នាំ ២០២១ ឱ្យដឹងថា ជារៀងរាល់ឆ្នាំ កម្មករនិយោជិត ក្នុងវិស័យកាត់ដេរ និងដេរស្បែកជើងបានឈប់សម្រាកដោយមានប្រាក់ឈ្នួលស្របតាម សេចក្តីសម្រេចរបស់ក្រសួងការងារ និងបណ្តុះបណ្តាលវិជ្ជាជីវៈ ប៉ុន្តែកម្មករមួយចំនួនទៀតក៏បានធ្វើកាថែមម៉ោងនៅថ្ងៃឈប់សម្រាកនេះផងដែរ។
លោកបន្តថា ចំពោះការធ្វើការងារថែមម៉ោងនេះត្រូវបានម្ចាស់រោងចក្របើកប្រាក់គុណនឹង ២ ដងចំពោះរោងចក្រណាដែលមានសហជីព និងក្រុមហ៊ុនណាដែលគេគោរពតាមច្បាប់ ប៉ុន្តែក្រុមហ៊ុនមួយចំនួនមិនមានប្រាក់បន្ថែមទេ ដូចជា អ្នកធ្វើការក្នុងវិស័យសំណង់ និងរោងចក្រមួយចំនួន ដែលនេះ វាផ្ទុយទៅនឹងច្បាប់។
លោកថា៖ «ឈប់ឆ្នាំនេះ ដូចឆ្នាំមុនដែរ ព្រោះគេកាត់បុណ្យជាតិ ៧ ថ្ងៃហើយ នៅសល់តែ ២១ ថ្ងៃ ហើយថ្ងៃបុណ្យចំថ្ងៃអាទិត្យចំនួន ២ ថ្ងៃ ក្នុង ១ ឆ្នាំក៏គេកាត់ចោលដែរ ដែលនេះធ្វើឱ្យកម្មករខាតបង់ក្នុង ១ ខែៗ ជាង ៥ ដុល្លារ»៕
វីដេអូ៖