ភ្នំពេញៈ ប្រជាពលរដ្ឋ ៣៥០ គ្រួសាររស់នៅតាមបណ្ដោយ ស្ទឹងព្រែកត្នោតក្នុងខណ្ឌដង្កោ បាននាំគ្នាជម្លៀសចេញពីលំនៅឋានទៅកាន់ទីទួលសុវត្ថិភាព បន្ទាប់ពីជំនន់ទឹកស្ទឹងព្រែកត្នោតបានជន់ឡើងបណ្ដាលឱ្យបាក់ទ្វារទឹក ១ កន្លែង កាលពីវេលាម៉ោង ១២:៣០ នាទីយប់រំលងអធ្រាត្រចូលថ្ងៃទី ២៧ តុលា ដោយបានធ្វើឱ្យពលរដ្ឋជាង ១ ០០០ គ្រួសាររងផលប៉ះពាល់ពីទឹកជំនន់ដែលហក់ឡើងយ៉ាងគំហុកនេះ។
លោកស្រី គឹម ញឹប អភិបាលខណ្ឌដង្កោបានថ្លែងថា៖ «នៅពេលនេះ កម្លាំងសមត្ថកិច្ចកំពុងរួមគ្នា ជួសជុលទ្វារទឹកនោះឡើងវិញ និងចាក់ដីរៀបជាខ្នងទំនប់ ដែលមកទល់រសៀលថ្ងៃ ២៧ ខែតុលា បានសម្រេចប្រមាណ ៨០ ភាគរយហើយ»។
ទន្ទឹមនឹងនេះ លោកស្រីបានអំពាវនាវដល់ពលរដ្ឋនៅតាមដីសណ្ដស្ទឹងព្រែកត្នោតក្នុងភូមិសាស្ត្រសង្កាត់ទៀន សង្កាត់សាក់សំពៅ សង្កាត់គងនយ សង្កាត់ព្រែកកំពឹស និងសង្កាត់ព្រៃស សូមបង្កើនការប្រុងប្រយ័ត្នអំពីគ្រោះទឹកជំនន់ស្ទឹងព្រែកត្នោតនេះ និងត្រៀមខ្លួនជម្លៀសមកកាន់ទីទួលសុវត្ថិភាពក្នុងករណីទឹកជន់លិចផ្ទះមិនអាចរស់នៅបាន។
អ្នកស្រី អឿ វណ្ណី អាយុ ៣១ ឆ្នាំមានលំនៅភូមិខ្វិត សង្កាត់សាក់សំពៅ ខណ្ឌដង្កោ បានប្រាប់ភ្នំពេញប៉ុស្តិ៍ថា កាលពីយប់រំលងអធ្រាត្រចូលថ្ងៃទី ២៧ តុលា ទឹកបានជន់ឡើងយ៉ាងគំហុកបណ្ដាលឱ្យជន់លិចផ្ទះរបស់អ្នកស្រីដល់ធ្នឹមដំបូល។ អ្នកស្រី និងក្រុមគ្រួសារបានសម្រេចចិត្តចល័តមកស្នាក់នៅបណ្តោះអាសន្នក្រោមដំបូលតង់កៅស៊ូនៅតាមបណ្តោយផ្លូវដែលមានសុវត្ថិភាព។
អ្នកស្រី វណ្ណី បានថ្លែងថា៖ «នៅភូមិខ្ញុំទឹកលិចក្បាលទៅហើយ ផ្ទះខ្លះលិចដល់ដំបូល ហើយផ្ទះខ្ញុំទឹកលិចដល់ត្រឹមធ្នឹមដំបូល លិចគ្រែ លិចទូរអីអស់ហើយ។ សំណាងល្អចេះបានត្រៀមពោងកង់ឡាន និងចានដែក ២-៣ សម្រាប់នាំកូនជិះ និងហែលឆ្លងមកទីទួលសុវត្ថិភាព»។
ស្ត្រីដែលមានកូនតូច ២ នាក់ក្នុងបន្ទុក រូបនេះបាននិយាយបន្តថា ស្ថានភាពភូមិខ្វិតស្ថិតនៅទីទំនាប គឺទាបជាងផ្លូវថ្នល់ទើបធ្វើឱ្យទឹកជន់លិចធ្ងន់ធ្ងរយ៉ាងនេះ។ ម្យ៉ាងទៀតគេសង់ផ្លូវថ្នល់ និងលើកទំនប់ព័ទ្ធជុំជិតអស់ទៅហើយ ពុំមានច្រកសម្រាប់ទឹកហូរចេញនោះទេ។
អ្នកស្រី វណ្ណី បានបន្ថែមថា៖ «កាលពីឆ្នាំមុន ក៏លិចជ្រៅដែរ ប៉ុន្តែលិចត្រឹមចង្កេះប៉ុណ្ណោះ យើងអាចទ្រាំរស់នៅក្នុងផ្ទះបាន ដោយកល់នេះកល់នោះឱ្យខ្ពស់ផុតពីទឹក។ ប៉ុន្តែនៅឆ្នាំនេះ ទឹកជន់លិចក្បាលទៅហើយ កល់អីក៏មិនជាប់ដែរ មានតែនាំគ្នារត់មកនៅទីនេះ [ទួលសុវត្ថិភាព] តែម្ដងទៅ»។
ស្រដៀងគ្នានេះដែរ លោក រុន ចំរើន អាយុ ៣៦ ឆ្នាំរស់នៅក្នុងភូមិពាម សង្កាត់ព្រៃស ខណ្ឌដង្កោបានប្រាប់ភ្នំពេញ-ប៉ុស្តិ៍ថា ក្នុងរយៈពេល ២ ឆ្នាំនេះ ទឹកឡើងខ្ពស់ ប៉ុន្តែឆ្នាំនេះ ទឹកឡើងលឿនជាងឆ្នាំមុនទៅទៀត។ ការកើនឡើងកម្ពស់ទឹកនេះដោយសារតែអាជ្ញាធរបានធ្វើទំនប់ទប់សងខាងស្ទឹងដែលបណ្តាលឱ្យតំបន់របស់លោកដែលជាប់ស្ទឹងរងផលប៉ះពាល់ខ្លាំងបែបនេះ។
លោក ចំរើន និយាយថា៖ «ទឹកស្ទឹងវាតូចហើយដល់គេទប់ទំនប់សងខាងទៅធ្វើឱ្យទឹកចាល់។ តាំងពីដើមមក ទំនប់ហ្នឹងបើមិនធ្លាយនៅខាងជើង ធ្លាយនៅខាងត្បូង។ អ៊ីចឹងទឹកវាជន់ឡើងនៅក្នុងស្ទឹងប៉ះពាល់អ្នកនៅខាងក្រោយដីសណ្ដជាប់មាត់ស្ទឹង ដូចជាផ្ទះខ្ញុំជាដើម ត្រូវលិចអស់គ្មានសល់អីទេ»។
បើតាមលោក ចំរើន ក្នុងរយៈពេលមិនដល់ ២៤ ម៉ោងផង ទឹកហក់ឡើងប្រមាណជាង ២ ម៉ែត្រ ដែលបណ្តាលឱ្យលិចផ្ទះ និងខូចខាតទ្រព្យសម្បត្តិមួយចំនួន។
យោងតាមទិន្នន័យបឋម ដែលភ្នំពេញប៉ុស្តិ៍ទទួលបានពីអាជ្ញាធរមូលដ្ឋានក្នុងខណ្ឌដង្កោ និងខណ្ឌកំបូល ជំនន់ទឹកស្ទឹងព្រែកត្នោត ដែលហូរធ្លាក់ពីផ្នែកខាងលើក្នុងភូមិសាស្ត្រខេត្តកំពង់ស្ពឺបានបង្កការជន់លិច និងប៉ះពាល់ដល់ប្រជាពលរដ្ឋជាង ១ ០០០ គ្រួសារហើយ គិតត្រឹមរសៀលថ្លៃទី ២៧ តុលា ក្នុងនៅសង្កាត់បឹងធំ ខណ្ឌកំបូល ប៉ះពាល់ចំនួន ២១៤ គ្រសារ និងនៅខណ្ឌដង្កោប៉ះពាល់ចំនួន ៨៤១ គ្រួសារក្នុងនោះនៅសង្កាត់ គងនយ ចំនួន ៤៩១ គ្រួសារ និងក្នុងសង្កាត់សាក់សំពៅចំនួន ៣៥០ គ្រួសារ៕
វីដេអូ៖