.jpg)
ជនជាតិភាគតិចសុំឱ្យអាជ្ញាធរជួយទប់ស្កាត់ការឈូសឆាយដីចម្ការវិលជុំ។ រូបថត សហការី
មណ្ឌលគិរីៈ ជនជាតិដើមភាគតិចព្នងជាង ១០០ គ្រួសារនៅភូមិពូហ្យាម និងភូមិពូឆប ឃុំសែនមនោរម្យ ស្រុកអូររាំង ស្នើដល់អាជ្ញាធរស្រុក និងខេត្ត ជួយអន្តរាគមន៍កុំឱ្យក្រុមហ៊ុនចិន វ៉ូជីសានធ្វើការឈូសឆាយដីចម្ការវិលជុំ និងដីកប់សពដូនតាតាមបែបប្រពៃណីរបស់ពួកគាត់។
លោក ឈឿន ប៊ុនធឿន ជាជនជាតិព្នងរស់នៅស្រុកអូររាំង ថ្លែងនៅថ្ងៃទី ២៦ តុលាថា មានអ្នកមានអំណាចពាក់ផ្កាយ ២ ម្នាក់បាននាំគ្រឿងចក្រចូលឈូសឆាយដីរបស់ជនជាតិដើមភាគតិចដែលជាទីតាំងដីចម្ការវិលជុំ ដីកប់ខ្មោចតាមបែបប្រពៃណីជនជាតិដើមភាគតិចព្នងនៅភូមិពូហ្យាម និងភូមិពូឆប ឃុំសែនមនោរម្យ ដោយសំអាងថា ឈូសឆាយការពារដើមស្រល់ក្រុមហ៊ុនវ៉ូជីសាន។
លោកថ្លែងថា៖ «ខ្ញុំសំណូមពរសុំឱ្យអាជ្ញាធរដែលជាថ្នាក់ដឹកនាំចុះមកមើល និងស្រាវជ្រាវសិក្សាពីអតីតកាល ពីមុន មកវាជាអ្វី ឥឡូវហ្នឹងជាស្អី របស់បងប្អូន គេមិនដែលធ្វើការឈូសឆាយបំពានលើដីប្រជាពលរដ្ឋអ៊ីចឹងទេ»។
លោក ប៊ុនធឿន ឱ្យដឹងថា ទីនោះជាដីរបស់ជនជាតិដើមភាគតិចព្នងចំនួន ១០២ គ្រួសារ រស់នៅភូមិពូហ្យាម និងភូមិពូឆប ឃុំសែនមនោរម្យ ស្រុកអូររាំង។ ប៉ុន្តែជនជាតិដើមភាគតិចមិនបានធ្វើប្លង់នោះទេ ដោយសារជាដីរួម។ ការចូលមកឈូសឆាយដីនៅទីតាំងនេះ គឺជាការរំលោភបំពានមកលើដីរបស់ប្រជាពលរដ្ឋព្រោះការកាត់ឆ្វៀលទៅឱ្យក្រុមហ៊ុននោះគឺនៅទីតាំងផ្សេង ប៉ុន្តែក្រុមហ៊ុនបែរជាមកឈូសលើដីប្រជាពលរដ្ឋនៅទីនេះទៅវិញ។
លោកថ្លែងថា៖ «គេឱ្យកាត់ឆ្វៀលនៅកន្លែងផ្សេង ឱ្យទៅក្រុមហ៊ុនហ្នឹង តែគាត់បែរមិនអ៊ីចឹងទេ គាត់មកឈូសកន្លែងដីរបស់បងប្អូនជនជាតិភាគតិចយើងនៅកន្លែងតំណមកន្លែងមានផ្នូរខ្មោច មានចម្ការ» ។
រដ្ឋបាលស្រុកអូររាំងបានឱ្យដឹងតាមរយៈលិខិតស្រាយបំភ្លឺនៅថ្ងៃទី ២៥ តុលាថា រដ្ឋបាលស្រុកពុំបានទទួលពាក្យបណ្តឹងណាមួយពាក់ព័ន្ធទៅនឹងទំនាស់ដីធ្លីរវាងប្រជាពលរដ្ឋក្នុងភូមិពូឆបជាមួយក្រុមហ៊ុនវ៉ូជីសាន ឡើយ។ ក្រោយទទួលដំណឹងនេះ រដ្ឋបាលស្រុក និងសហការជាមួយក្រុមហ៊ុនចិនវ៉ូជីសានដែលបានសុំសិទ្ធិវិនិយោគដីសម្បទាន សេដ្ឋកិច្ចលើដីកសិកម្មរបស់រាជរដ្ឋាភិបាល នឹងធ្វើការផ្ទៀងផ្ទាត់ចំណុចនិយាមការនៅក្នុងផែនទីរបស់ក្រុមហ៊ុន ដែលទទួលសិទ្ធិអនុញ្ញាតលើទីតាំងដីជាក់ស្តែង។
ក្នុងលិខិតរដ្ឋបាលស្រុកអូររាំងសរសេរថា៖ «ចំពោះករណីដែលបានកើតឡើងរដ្ឋបាលស្រុកទើបទទួលបានដំណឹងលើការរំលោភបំពានដីធ្លីថ្មីៗនេះ។ រដ្ឋបាលស្រុកនឹងធ្វើការចុះស្រាវជ្រាវសម្របសម្រួល ដើម្បីធ្វើការវិនិច្ឆ័យឱ្យអស់លទ្ធភាពជាមួយក្រុមហ៊ុន និងភាគីពាក់ព័ន្ធឱ្យបានឆាប់រហ័ស»។
ភ្នំពេញ ប៉ុស្តិ៍ មិនអាចស្វែងរកទំនាក់ទំនងសុំការបំភ្លឺពីតំណាងក្រុមហ៊ុន វ៉ូជីសានបានទេនៅថ្ងៃទី ២៦ តុលា។ ប៉ុន្តែ លោក ជាក់ ម៉េងហ៊ាង អភិបាលរង និងជាអ្នកនាំពាក្យរដ្ឋបាលខេត្តមណ្ឌលគិរីឱ្យដឹងថា ក្នុងរឿងនេះអាជ្ញាធរខេត្តបានឱ្យមន្ត្រីជំនាញរដ្ឋបាលព្រៃឈើ អញ្ជើញតំណាងជនជាតិដើមភាគតិចទៅសួរនាំដើម្បីបញ្ជាក់ថា ពួកគាត់ពិតជាធ្លាប់រស់នៅទីនោះពិតប្រាកដ ឬមួយយ៉ាងណា។
លោកថ្លែងថា៖ «ជាគោលការណ៍របស់អាជ្ញាធរក៏ដូចជារដ្ឋាភិបាល កាលណាគាត់មានលិខិតស្នាមកាន់កាប់បញ្ជាក់ពីភូមិឃុំ ទោះបីព្រៃកប់ខ្មោចព្រៃអីក៏ដោយ ក៏យើងនៅតែលើកទឹកចិត្ត និងកាត់ឆ្វៀលផ្តល់ឱ្យពួកគាត់ ឱ្យតែពិតថាជារបស់គាត់អាស្រ័យផល។ ប៉ុន្តែដើម្បីឱ្យដឹងពិតប្រាកដយើងនឹងពិនិត្យមើលឱ្យបានច្បាស់លាស់សិន»។
លោក ជាក់ ម៉េងហ៊ាង ប្រាប់ថា ដីនេះជាដីក្រុមហ៊ុនវ៉ូលីង និងវ៉ូជីសាន ដែលទទួលបានសិទ្ធិវិនិយោគទៅលើដីចំនួនប្រមាណ ២ ម៉ឺនហិកតា ប៉ុន្តែបានធ្វើការកាត់ឆ្វៀលចេញខ្លះនៅសល់ប្រមាណ ១៧ ០០០ ហិកតា ហើយក្រុមហ៊ុនបានធ្វើការដាំដើមស្រល់។ ដីនោះជាដីរដ្ឋដែលក្រុមហ៊ុនបានជួលពីរដ្ឋទៅដាំដើមស្រល់ ដែលសព្វថ្ងៃក្រុមហ៊ុនកំពុងកាប់ប្រមូលផល។
លោក គ្រើង តុលា អ្នកប្រឹក្សាយោបល់ក្រុមការងារបណ្តាញសហគមន៍ ជនជាតិដើមភាគតិចខេត្តមណ្ឌលគិរីថ្លែងនៅថ្ងៃទី ២៦ ខែតុលាថា នេះជាការរំលោភសិទ្ធិប្រជាពលរដ្ឋ ដែលធ្លាប់ធ្វើចម្ការអាស្រ័យផលបែបប្រពៃណីជាយូរលង់ណាស់មកហើយ។
លោកបន្តថា ក្នុងរឿងនេះក្រុមហ៊ុន ឬក៏អ្នកមានអំណាច មានលុយដែលមានបំណងមកវិនិយោគគឺគួរតែធ្វើការសហការជាមួយប្រជាពលរដ្ឋដើម្បីកុំឱ្យមានការប៉ះពាល់។ លោកថ្លែងថា៖ «ខ្ញុំយល់ថាក្រុមហ៊ុនហ្នឹងគឺមិនបានសិក្សាអីទាំងអស់ហើយស្រាប់តែគាត់ទៅធ្វើអ៊ីចឹង វាធ្វើឱ្យមានការរំលោភសិទ្ធិមនុស្សធ្ងន់ធ្ងរមែនទែន»៕
