ភ្នំពេញៈ ក្នុងរយៈពេល ៩ ខែ ឆ្នាំ ២០២១ នេះ គ្រោះថ្នាក់ចរាចរណ៍បានបណ្តាលឱ្យមនុស្សស្លាប់ ១ ៨៨៨ នាក់ ហើយរបួសធ្ងន់ ១ ៥៦០ នាក់ ស្រាល ១ ០២៩ នាក់ និងយានជំនិះជិត ៤ ០០០ គ្រឿងត្រូវបានខូចខាត។
មន្ត្រីជាន់ខ្ពស់ក្រសួងសាធារណការ និងដឹកជញ្ជូនបានអះអាងថាកត្តាគ្រោះថ្នាក់ចរាចរណ៍ ដែលបង្កឱ្យមនុស្សបាត់ជីវិត និងខាតបង់ទ្រព្យសម្បត្តិភាគច្រើនគឺកើតចេញពីការមិនយល់ដឹងពីច្បាប់ និងបំពានច្បាប់របស់អ្នកបើកបរដែលទាមទារមានការឈ្វេងយល់ពីកត្តាសំខាន់ៗ និងសញ្ញាចរាចរណ៍សំខាន់ៗដើម្បីកុំឱ្យមានគ្រោះថ្នាក់។
ការអះអាងនេះបានធ្វើឡើងនៅក្នុងកម្មវិធី MPWT LIVE SHOW នាថ្ងៃ ២៧ តុលាដែលរៀបចំដោយក្រសួងសាធារណការ និងដឹកជញ្ជូនសម្រាប់ធ្វើការឆ្លើយតបសំណួររបស់ប្រជាពលរដ្ឋក្រោមប្រធានបទ ឈ្វេងយល់ពី កត្តាសំខាន់ៗ និងសញ្ញាចរាចរណ៍សំខាន់ៗ ដើម្បីរួមចំណែកធ្វើឱ្យថ្ងៃនេះថ្ងៃស្អែក កុំឱ្យមានគ្រោះថ្នាក់ចរាចរណ៍។
ក្នុងឱកាសនោះលោកស្រី មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូនបានឱ្យដឹងថា មូលហេតុធំៗ និងចម្បងៗ គឺបណ្តាលមកពីអ្នកបើកបរមិនមានការយល់ដឹងពីច្បាប់ ហើយបើកបរដោយបំពានច្បាប់ដែលបណ្តាលគ្រោះថ្នាក់ចរាចរណ៍ បន្តកើតមាន និងស្ថិតក្នុងក្តីកង្វល់ បើទោះការរីករាលដាលជំងឺកូវីដ ១៩ កំពុងកើតមានក៏ដោយ។
លោកស្រីអះអាងបន្តថាហេតុនេះប្រធានបទដែលក្រសួងសាធារណការបានរៀបចំនៅពេលនេះគឺមានគោលបំណងចែករំលែកចំណេះដឹងពាក់ព័ន្ធដល់ប្រជាពលរដ្ឋទៅនឹងកត្តាសំខាន់ៗ និងសញ្ញាចរាចរណ៍សំខាន់ៗដើម្បីបានចូលរួមកាត់បន្ថយគ្រោះថ្នាក់ចរាចរណ៍ទាំងអស់គ្នា។
បើតាមលោកស្រី មឹន មាណវី ក្នុងរយៈពេល ៩ ខែនេះមូលហេតុចម្បងជាងគេដែលបណ្តាលឱ្យមានគ្រោះថ្នាក់ចរាចរណ៍ គឺមកពីការបើកបរលើសល្បឿនកំណត់ចំនួន ៣៦ ភាគរយដោយកត្តានេះបានសម្លាប់មនុស្ស ៤៥៧ នាក់ ការមិនគោរពសិទ្ធិអត្ថិភាពមាន ២៤ ភាគរយសម្លាប់មនុស្ស ១៨៩ នាក់ និងការមិនប្រកាន់ស្តាំ ១៥ ភាគរយ សម្លាប់មនុស្ស ១៦៣ នាក់។
ចំណែកកត្តាបន្ទាប់បន្សំ គឺកត្តាជែង ៨,៣ ភាគរយ សម្លាប់មនុស្ស ៩៩ នាក់ ការបើកបរក្នុងស្ថានភាពគ្រោះថ្នាក់មាន ៨ ភាគរយសម្លាប់មនុស្ស ៥៨ នាក់ កត្តាគ្រឿងស្រវឹង ៤ ភាគរយសម្លាប់មនុស្ស ៤០ នាក់ កត្តាយានជំនិះ ៣ ភាគរយ សម្លាប់មនុស្ស ៤៣ នាក់ កត្តាងងុយដេក ១ ភាគរយ សម្លាប់មនុស្ស ៨ នាក់ និងកត្តាផ្លូវ ០,៤ ភាគរយសម្លាប់មនុស្ស ៧ នាក់។ នេះបើតាមការអះអាងរបស់រដ្ឋលេខាធិការរូបនេះ។
លោក គង់ រតនៈ ប្រធានវិទ្យាស្ថានជាតិសុវត្ថិភាពចរាចរណ៍ផ្លូវគោកបានថ្លែងថា ការបង្កើតឱ្យមានកម្មវិធីបែបនេះគឺជាដំណើរការល្អមួយក្នុងការផ្តល់សារអប់រំ និងការស្រាយមន្ទិលផ្សេងៗរបស់ប្រជាពលរដ្ឋដែលកំពុងប្រើប្រាស់ផ្លូវ ក្នុងបរិបទទំនើប ឬសង្គមឌីជីថល។
លោកថា នេះជាផ្នែក ១ ដែលគេឱ្យឈ្មោះថា ម៉ាឃីតធីងផ្នែកសង្គម (Social Marketing) ហើយប្រសិទ្ធភាពរបស់សកម្មភាពនេះ មានកម្រិត អាស្រ័យលើថា តើប្រជាពលរដ្ឋប៉ុន្មាននាក់ដែលបានចូលរួម ទស្សនា និងជាពិសេសចូលរួមក្នុងការសាកសួរ ដើម្បីឱ្យបានយល់ច្បាស់ពីប្រការគួរអនុវត្ត ទាក់ទងនឹងវិធានសុវត្ថិភាព ឬច្បាប់ស្តីពីចរាចរណ៍ផ្លូវគោក។
លោក គង់ រតនៈ ថ្លែងថា៖ «ខ្ញុំសំណូមពរថា ក្រសួងសាធារណការគួរមានកញ្ចប់ថវិកា ដើម្បីប៊ូសផេចហ្វេសប៊ុកឱ្យបានដល់អ្នកទស្សនាឱ្យបានច្រើន និងជាពិសេស ការផ្សព្វផ្សាយគួរធ្វើឡើងក្នុងពេលវេលា ដែលអ្នកប្រើប្រាស់បណ្តាញសង្គមប្រើច្រើន ដូចជាពេលសម្រាកបាយថ្ងៃត្រង់ពីការងារ ឬថ្ងៃឈប់សម្រាកជាដើម»។
លោកថា៖ «ដូចខ្ញុំធ្លាប់បានលើកឡើងគ្រាមុន សកម្មភាពអប់រំតែ ១ មុខ មិនគ្រប់គ្រាន់ក្នុងការកាត់បន្ថយចំនួនគ្រោះថ្នាក់ចរាចរណ៍ ឬអ្នកស្លាប់បានឡើយត្រូវមានការរឹតបន្តឹងច្បាប់ និងវិស្វកម្មផ្នែកសុវត្ថិភាពបន្ថែមទៀត»៕