បាត់ដំបងៈ អភិបាលខេត្តបាត់ដំបង លោក សុខ លូ លើកពីបញ្ហាជនវិកលចរិត ជនអនាថា និងក្មេងហិតកាវនៅក្នុងក្រុងបាត់ដំបងជាបញ្ហាចម្បងដែលត្រូវរួមគ្នាគិត និង រួមគ្នាដោះស្រាយ ដែលគ្រោងនឹងរៀបចំកិច្ចប្រជុំជាមួយគណៈកម្មការដោះស្រាយបញ្ហាជនអនាថានៅសប្តាហ៍ក្រោយ ដើម្បីធ្វើការពិនិត្យស្រង់ទិន្នន័យដោះស្រាយបញ្ហានេះ។
លោក សុខ លូ ថ្លែងនៅថ្ងៃទី ២៨ ខែតុលាថា ដោយបានសង្កេតឃើញថា មានជនវិកលចរិត ជនអនាថា និងក្មេងហិតកាវមានចំនួនច្រើននៅក្នុងក្រុងបាត់ដំបង ហើយបញ្ហានេះ លោកចាត់ទុកថាជាបញ្ហាចម្បងដែលត្រូវរួមគ្នាគិត រួមគ្នាដោះស្រាយ។
លោកថ្លែងថា៖ «យើងធ្វើជំហានហ្នឹងហើយ បានយើងចាប់ផ្តើមពិចារណាចាត់ចែងរកទីកន្លែងដើម្បីទុកដាក់ពួកគាត់ ឧបមាថា ជនសតិមិនគ្រប់ យើងមិនមែនចេះតែប្រមូលគាត់បានទេ ព្រោះយើងត្រូវរកកន្លែងដើម្បីព្យាបាលគាត់ ឬត្រូវរៀបចំយ៉ាងម៉េច ចំណែកជនហិតកាវអីនេះ យើងអាចយកទៅដាក់មណ្ឌល ហើយក្មេងអនាថាយើងឱ្យមន្ទីរសង្គមកិច្ចចាត់ចែងមើលការគ្រប់គ្រងគាត់»។
លោកថ្លែងថា៖ «បញ្ហាអាចប៉ះពាល់ដល់អ្នកធ្វើដំណើរ យើងខ្លាចមានបញ្ហាអាចបុកគាត់ ជួនកាលមានការគប់កញ្ចក់ឡានបណ្តាលឱ្យមានគ្រោះថ្នាក់ បងប្អូនអ្នកហាត់ប្រាណក៏ខ្លាច ហើយភ្ញៀវទេសចរ ក៏កាន់តែខ្លាចទៀត អ៊ីចឹងនេះជាបញ្ហាចម្បងណាស់ដែលយើងត្រូវដោះស្រាយ» ។
លោក គឹម តេង ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តបាត់ដំបង ថ្លែងនៅថ្ងៃទី ២៨ ខែតុលានេះថា មុនពេលមានបញ្ហាកូវីដ ១៩ ជនអនាថា អ្នកសុំទាន ក្មេងហិតកាវ នៅភូមិសាស្ត្រខេត្តបាត់ដំបងមានប្រមាណ ១០០ នាក់។ ប៉ុន្តែពេលមានបញ្ហាកូវីដ ១៩ ជនទាំងនោះចាប់ផ្តើមមានចំនួនកាន់តែច្រើន ដោយមានអ្នកថ្មីផ្លាស់ទីមកពីកន្លែងផ្សេង ចូលមកក្នុងក្រុងបាត់ដំបង។
លោកថ្លែងថា៖ «ឥឡូវយើងកំពុងតែសិក្សាជាមួយអង្គការដៃគូផ្សេងៗ»។
លោក ប៉ុន ជេដ្ឋា នាយកអង្គការទំនុកចិត្តកុមារកម្ពុជា (CCT) នៅថ្ងៃទី ២៨ ខែតុលា បានសម្តែងការសប្បាយរីករាយ នៅពេលដឹងថា អាជ្ញាធរខេត្តបំផុសឱ្យមានការចូលរួមក្នុងការយកចិត្តទុកដាក់ដោះស្រាយបញ្ហាជនទាំងនោះ។ ចំពោះករណីកុមារ ជនអនាថា អ្នករស់នៅតាមចិញ្ចើមផ្លូវ និង គ្រួសាររស់នៅតាមសំណង់អនាធិបតេយ្យ។
កន្លងមកអង្គការបានជួយដល់ក្មេងដែលរស់នៅតាមចិញ្ចើមផ្លូវឱ្យបានចូលរៀន មានកន្លែងសម្រាកពេលថ្ងៃ មានអាហារទទួលទាន និងថ្នាំសង្កូវផ្សេងៗនៅពេលពួកគេឈឺ។ ប៉ុន្តែបើទោះបីជាលោកមានការយកអាសាជួយពួកគេយ៉ាងនេះក្តី ក៏ក្មេងប្រភេទទាំងនោះ មិនចង់ចូលរួមឡើយ។ «សម្រាប់ក្មេងហិតកាវ និងក្មេងដើរតាមចិញ្ចើមផ្លូវ គាត់ចូលរួមបានតិច ដោយសារតែគាត់ចង់ដើរលេង។ ខ្ញុំជឿជាក់ថា យើងអាចធ្វើបានដើម្បីដោះស្រាយបញ្ហាហ្នឹង»៕