កំពង់ឆ្នាំងៈ អាជ្ញាធរខេត្តកំពង់ឆ្នាំងប្រកាសសម្រុកចុះដោះស្រាយបញ្ហានានា ដែលជាកង្វល់របស់ប្រជាពលរដ្ឋជួបប្រទះនៅគ្រប់មូលដ្ឋានឱ្យបានច្រើនបំផុតក្នុងខែវិច្ឆិកាខាងមុខ ដើម្បីកុំឱ្យពលរដ្ឋពិបាកក្នុងការចំណាយ ពេលវេលា និងថវិកាឡើងមកទីរួមស្រុក ឬខេត្តរកដំណោះស្រាយ។
លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ថ្លែងនាថ្ងៃទី ២៧ តុលាថា ដើម្បីដោះស្រាយបញ្ហាដែលជាកង្វល់របស់ប្រជាពលរដ្ឋជួបប្រទះនៅមូលដ្ឋាន អាជ្ញាធរនឹងចុះទៅដល់ទីតាំងគ្រប់ឃុំ ធ្វើការដោះស្រាយសម្របសម្រួលតាមលទ្ធភាពដែលអាចធ្វើទៅបាន។ រីឯបញ្ហាណាធ្ងន់ធ្ងរដែលថ្នាក់ខេត្ត ស្រុក និងឃុំដោះមិនបាន អាជ្ញាធរនឹងធ្វើរបាយការណ៍ជូនទៅរាជរដ្ឋាភិបាលបន្តទៀត។
លោកអភិបាលខេត្តបញ្ជាក់ថា ការធ្វើបែបនេះគឺបង្កលក្ខណៈងាយស្រួលជូនប្រជាពលរដ្ឋ ដើម្បីកុំឱ្យពួកគាត់ពិបាកក្នុងការចំណាយ ពេលវេលា និងថវិកាឡើងមកទីរួមខេត្ត ឬទីរួមស្រុក ស្វែងរកដំណោះស្រាយបញ្ហាដែលខ្លួនជួបប្រទះ នៅតាមមូលដ្ឋាន។ កិច្ចការនេះលោក ស៊ុន សុវណ្ណារិទ្ធិ អះអាងថា នឹងចាត់ឱ្យមានក្រុមការងារ មានអភិបាលរងខេត្ត ក្រុមប្រឹក្សាខេត្ត និងមន្ទីរ អង្គភាព ដែលទទួលបន្ទុក ចុះដោះស្រាយដោយផ្ទាល់នៅតាមគ្រប់បណ្តាឃុំទាំងអស់។
លោកថ្លែងថា៖ «យើងនឹងដោះស្រាយទៅលើបញ្ហាទាំងអស់ ដែលពាក់ព័ន្ធបញ្ហាដីធ្លី។ បញ្ហាដែលមានកន្លែងខ្លះពាក់ព័ន្ធការសុំជីកប្រឡាយ។ អ៊ីចឹងទុក្ខកង្វល់របស់ប្រជាពលរដ្ឋនៅតាមមូលដ្ឋានទាំងអស់គឺខុសៗគ្នា។ យើងដោះស្រាយទៅតាមឃុំនីមួយៗតាមសភាពជាក់ស្តែង»។
អភិបាលខេត្តប្រាប់ថា លោកបានបញ្ជាទៅគ្រប់អាជ្ញាធរឃុំឱ្យធ្វើការស្រង់ និងបូកសរុបរឿងរ៉ាវទាំងអស់ដែលមាននៅក្នុងមូលដ្ឋានផ្ញើមកខេត្តដើម្បីពិនិត្យមើល ហើយនៅថ្ងៃទី ១ ខែវិច្ឆិកា លោកនឹងចុះទៅដោះស្រាយតែម្តង។
លោកថ្លែងថា៖ «ខ្ញុំនឹងប្រជុំពិនិត្យរឿងហ្នឹង ហើយបូកសរុបឱ្យដឹងថា មានប៉ុន្មានសំណុំរឿង ហើយមាននៅក្នុងដៃតុលាការប៉ុន្មានរឿង ហើយប្រភេទរឿងនីមួយៗមានរឿងអ្វីខ្លះ។ បើសិនជា ពាក់ព័ន្ធការកាត់ឆ្វៀល ឬដីតំបន់ ២ ឬតំបន់ ៣ អាហ្នឹងយើងដោះស្រាយទៅតាមផ្លូវច្បាប់មួយៗ»។
បើតាមលោក ស៊ុន សុវណ្ណារិទ្ធិ ការដោះស្រាយបញ្ហាជូនប្រជាពលរដ្ឋបែបនេះ នឹងបន្តធ្វើជាបន្តបន្ទាប់រហូត ដើម្បីឱ្យក្លាយជាទម្លាប់ និងប្រពៃណីក្នុងការជួយរាស្ត្រ។ ប៉ុន្តែយ៉ាងណាលោកបញ្ជាក់ថា នឹងសម្រុកធ្វើឱ្យបានច្រើនបំផុតក្នុងខែវិច្ឆិកាខាងមុខនេះ ក្នុងករណីដែលដោះមិនអស់នឹងបន្តទៅខែក្រោយទៀត។
លោកថ្លែងថា៖ «ខ្ញុំគិតថា បើខ្ញុំដោះទូទាំងខេត្តរឿងមិនច្រើនប៉ុន្មានទេ ព្រោះកន្លែងខ្លះរឿងតិចតួចដែរ ដូចបញ្ហារបងកន្លះម៉ែត្រ ១ ម៉ែត្រអី។ អ៊ីចឹងយើងសំណូមពរអារកាត់ខ្លះទៅ ហើយខ្ញុំគិតថា ដល់ពេលខ្ញុំដោះគ្រប់ឃុំអ៊ីចឹង រឿងដែលវានៅសល់ប៉ុន្មាននឹងដោះបានលឿន។ ព្រោះវាសល់ តិច ហើយរឿងធំៗខ្ញុំយកមកដាក់ប្រជុំកម្រិតអភិបាលខេត្តសម្រេចថា ត្រូវធ្វើយ៉ាងម៉េចទៀតអ៊ីចឹងទៅ»។
លោក ប៉ា ចន្ទរឿន ប្រធានវិទ្យា-ស្ថានប្រជាធិបតេយ្យកម្ពុជាសាទរ នៅពេលទទួលដំណឹងថា អាជ្ញាធរ ខេត្តកំពង់ឆ្នាំងបានដុតដៃដុតជើងសម្រុករកដំណោះស្រាយ បញ្ហាជូនប្រជាពលរដ្ឋនៅតាមមូលដ្ឋាន។ លោកថា នេះជារឿងល្អ ពីព្រោះនេះជាអ្វីដែលអាជ្ញាធរគ្រប់ជាន់ថ្នាក់ត្រូវតែធ្វើ ដើម្បីដោះស្រាយជូនប្រជាពលរដ្ឋក្នុងនាមជាមន្ត្រីរាជការ។
លោកថ្លែងថា៖ «ពាក្យថាមន្ត្រីរាជការ ឬអ្នកដែលធ្វើការនៅក្នុងស្ថាប័នសាធារណៈ គឺជាអ្នកបម្រើរាស្ត្រ អ្នកដែលត្រូវជួយដោះស្រាយបញ្ហារបស់រាស្ត្រ ហើយតាមរយៈការបម្រើហ្នឹង រាស្ត្រតបស្នងមកវិញ តាមរយៈការបង់ពន្ធ ក៏ដូចជាចូលរួមចំណែកដើម្បីផ្តល់ជាការគាំទ្រដល់អ្នកដែលបានបម្រើគាត់»៕ ហ្នឹងបាទ»៕