.jpg)
សត្វសុនខ ត្រូវបានបង្ហាត់ឱ្យហិតស្វែងរកអ្នកផ្ទុកវីរុសកូវីដ នាពេលកន្លងមក។ រូបថត HENG RATANA PAGE
ភ្នំពេញៈ សុនខចំនួន ៩ ក្បាល ដែលត្រូវបានអ្នកជំនាញនៃមជ្ឈមណ្ឌលសកម្មភាពកំចាត់មីនកម្ពុជា (CMAC) ហ្វឹកហ្វឺនរយៈពេលប៉ុន្មានខែកន្លងមកនេះ អាចមានសមត្ថភាពគ្រប់គ្រាន់ក្នុងការហិតចម្ងាយសុវត្ថិភាពស្វែងរកអ្នកផ្ទុកវីរុសកូវីដ ១៩ ក្នុងចំណោមមនុស្សរាប់ពាន់នាក់ដោយល្បឿនលឿនរយៈពេលពី ១០ ទៅ ១៥ វិនាទីប៉ុណ្ណោះ។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជាថ្លែងក្នុងពិធីចុះពិនិត្យវឌ្ឍនភាពការស្រាវជ្រាវ និងអភិវឌ្ឍសុនខហិតអ្នកជំងឺកូវីដ-១៩នៅវិទ្យាស្ថានបច្ចេកទេសសកម្មភាពកំចាត់មីនខេត្តកំពង់ឆ្នាំងកាលពីថ្ងៃទី ២៧ ខែតុលា ថា លោកពិតជាមានមោទនភាពជាមួយមន្ត្រីជំនាញសុនខ ដែលបានខិតខំប្រឹងប្រែងស្រាវជ្រាវចងក្រងឯកសារ និងផ្តល់ការហ្វឹកហ្វឺនសុនខយ៉ាងសកម្មបំផុតឱ្យមានសមត្ថភាពហិតស្វែងរកអ្នកផ្ទុកវីរុសកូវីដ ១៩ បាន។
លោកបានបន្តថា អ្នកជំនាញសុនខខែ្មរអាចស្រាវជ្រាវអាចហ្វឹកហ្វឺនសុនខហិតអ្នកជំងឺកូវីដ ១៩ បានដោយជោគជ័យក្នុងជំហានដ៏សំខាន់នេះ និងឃើញថា សុនខកម្ពុជាមានសមត្ថភាព និងអាចចូលរួមសកម្មភាពប្រយុទ្ធប្រឆាំងកូវីដបាន ដោយប្រើពេលប្រមាណពី ១០-១៥ វិនាទី អាចហិតស្វែងរកមុខសញ្ញាអ្នកមានផ្ទុកមេរោគកូវីដ ១៩ នៅក្នុងចំណោមមនុស្សច្រើន (ហ្វូងមនុស្ស)។
លោកបញ្ជាក់ថា សុនខ គឺជាឧបករណ៍អាចប្រើជាជំនួយក្នុងការស្វែងរកអ្នកជំងឺកូវីដនៅតាមកន្លែងមួយចំនួន ដូចជា តាមច្រកទ្វារអន្តរជាតិ ព្រលានយន្តហោះ ព្រឹតិ្តការណ៍ធំៗ ដូចជាការប្រកួតកីឡា កម្មវិធីមហាជនជាដើម។ នេះជាយុទ្ធសាស្ត្ររើសក្រួសចេញពីអង្ករ! ចំពោះមុខសញ្ញាសង្ស័យអាចចាត់វិធានការសុខាភិបាល។
លោកបន្តថា៖ «សុនខ ក៏មិនខុសពីឧបករណ៍ប្រភេទតេស្ត CPR ឬ តេស្តរហ័សដែរ។ ដូច្នេះ សុនខ គឺជាឧបករណ៍មួយផ្តល់សញ្ញាឱ្យដឹងថា មុខសញ្ញាណាជាមុខសញ្ញាសង្ស័យថា មានផ្ទុកវីរុសកូវីដ ១៩។ ក្រោយពីការសង្ស័យហើយ ត្រូវយកទៅវិភាគបន្ថែមទៀត ឬយ៉ាងម៉េច គឺជានីតិវិធីរបស់ក្រសួងសុខាភិបាល។ សុនខគ្រាន់តែជាឧបករណ៍ជួយសម្រាប់អ្នកជំនាញសុខាភិបាលបន្តធ្វើកិច្ចការបន្តទៀត»។
លោកថ្លែងថា ការហ្វឹកហ្វឺនបន្តនឹងអនុវត្តក្នុងសប្តាហ៍ខាងមុខនេះ នៅពេលបានទទួលសំណាកបន្ថែមទៀតពីសាកលវិទ្យាល័យវិទ្យាសាស្ត្រសុខាភិបាល។
ភ្នំពេញប៉ុស្តិ៍មិនអាចទាក់ទងលោកស្រី យក់ សម្បត្តិ និងលោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានទេពីម្សិលមិញ។
ប៉ុន្តែលោក កែរ រដ្ឋា ប្រធានមន្ទីរសុខាភិបាលខេត្តស្វាយរៀងបានថ្លែងថា បើសិនជាមានសុនខដែលមានសមត្ថភាពក្នុងការចូលរួមហិតក្លិនស្វែងរកអ្នកផ្ទុកជំងឺកូវីដ-១៩ ដោយមិនចំណាយថវិកាច្រើន វាពិតជារួមចំណែកយ៉ាងសំខាន់ក្នុងការកាត់បន្ថយការឆ្លងរាលដាលនៃជំងឺកូវីដ ១៩។
ទោះជាយ៉ាងណា លោក រដ្ឋា បានថ្លែងថា ចំពោះកិច្ចការនេះត្រូវមានសុនខគ្រប់គ្រាន់ ដើម្បីស្វែងរកអ្នកផ្ទុកនូវជំងឺកូវីដ ១៩ នៅតាមខេត្ត ឬនៅតាមតំបន់ណាដែលមានហានិភ័យខ្ពស់ពីការឆ្លងនូវជំងឺកូវីដ ១៩។
លោកប្រធានមន្ទីរសុខាភិបាលបានថ្លែងថា៖ «បើប្រើប្រាស់សុនខមានប្រសិទ្ធភាព គឺល្អហើយ ព្រោះវាមិនចំណាយ ថវិកាផង និងមិនចំណាយពេលវេលាច្រើនផងដែរ។ ជាពិសេស វាចូលរួមកាត់បន្ថយការឆ្លង ហើយនៅពេលដែលរកឃើញឱ្យគាត់ព្យាបាលនៅតាមផ្ទះ ឬតាមទីកន្លែងត្រូវបានរៀបចំ»៕
វីដេអូ៖
