.jpg)
លោក ទៀ សីហា អភិបាលខេត្តសៀមរាប ។ រូបថតរដ្ឋបាលខេត្តសៀមរាប
សៀមរាបៈ រដ្ឋបាលខេត្តសៀមរាប សម្រេចបើកដំណើរការសាលារៀនឡើងវិញនៅថ្ងៃទី ១ ខែវិច្ឆិកា ដោយអនុវត្តការបង្រៀន និងរៀនតាមបណ្តុំសម្រាប់គ្រឹះស្ថានសិក្សាសាធារណៈ និង ឯកជនគ្រប់កម្រិត ក្នុងភូមិសាស្ត្រខេត្តសៀមរាប។
លិខិតជូនដំណឹងចុះហត្ថលេខាដោយ លោក ទៀ សីហា អភិបាលខេត្តសៀមរាប នៅថ្ងៃទី ២៨ ខែតុលា បានឱ្យដឹងថា រដ្ឋបាលខេត្តនេះសម្រេចឱ្យបើកដំណើរការសាលារៀនឡើងវិញ នៅថ្ងៃទី១ ខែវិច្ឆិកា ឆ្នាំ ២០២១ ដោយអនុវត្តការបង្រៀន និងរៀនតាមបណ្តុំ សម្រាប់គ្រឹះស្ថានសិក្សាសាធារណៈ និងឯកជនគ្រប់កម្រិតក្នុងភូមិសាស្ត្រខេត្តសៀមរាប។
លោក ទៀ សីហា បញ្ជាក់ថា ៖«រដ្ឋបាលខេត្តសៀមរាប បានអនុញ្ញាតឱ្យមានការបើកដំណើរការក្នុងជំហានទី១ មានគ្រឹះស្ថានសិក្សាចំនួន ១៧៣ រួចមកហើយ។ ដោយឡែក ក្នុងជំហានថ្មីបន្ទាប់នេះ រដ្ឋបាលខេត្តសៀមរាប នឹងអនុញ្ញាតឱ្យបើកដំណើរការឡើងវិញនូវគ្រឹះស្ថានចំណេះទូទៅសាធារណៈ និង ឯកជន គ្រប់កម្រិតក្នុងភូមិសាស្ត្រខេត្ត សៀមរាប ចាប់ពីថ្ងៃទី១ ខែវិច្ឆិកា តទៅ»។
បើតាមលោកអភិបាលខេត្តសៀមរាប ការសម្រេចបើកដំណើរការសាលារៀនឡើងវិញនេះ ធ្វើឡើងដោយយោងតាមអនុសាសន៍របស់លោកនាយករដ្ឋមន្ត្រី ហ៊ុន សែន និងសេចក្តីណែនាំ លេខ ៦០ អយក សណន. ចុះថ្ងៃទី ២១ ខែតុលា ឆ្នាំ ២០២១ របស់ក្រសួងអប់រំ យុវជន និងកីឡា ស្តីពីការបង្រៀន និងរៀនតាមបណ្តុំ សម្រាប់គ្រឹះស្ថានសិក្សាចំណេះទូទៅគ្រប់កម្រិត គ្រឹះស្ថានឧត្តមសិក្សា ទាំងសាធារណៈនិងឯកជននិងគ្រឹះស្ថានបណ្តុះបណ្តាលគ្រូ។
ព្រមទាំងសេចក្តីណែនាំ លេខ ៥០អយក.សណន. ចុះថ្ងៃទី ១៣ ខែកញ្ញា ឆ្នាំ២០២១ របស់ក្រសួងអប់រំយុវជន និងកីឡាស្តីពីគោលការណ៍ ប្រតិបត្តិស្តង់ដាសម្រាប់ការលើកកម្ពស់ សុខភាព និងសុវត្ថិភាពសិក្សាក្នុងការបង្រៀន និងរៀនតាមបណ្តុំសម្រាប់គ្រឹះស្ថានសិក្សាសាធារណៈ និងឯកជន ព្រមទាំងសេចក្តីណែនាំ លេខ ០២៣/២១ ស.ណ.ន ចុះថ្ងៃទី ១៥ ខែតុលា ឆ្នាំ ២០២១ របស់រដ្ឋបាលខេត្តសៀមរាប ស្តីពីវិធានការបង្ការ និងទប់ស្កាត់ការឆ្លងរាលដាល នៃជំងឺកូវីដ ១៩ ចំពោះការបើកដំណើរការឡើងវិញ នូវគ្រឹះស្ថានសិក្សាសាធារណៈ និងឯកជន ក្នុងភូមិសាស្ត្រខេត្តសៀមរាប។
លោក ទៀ សីហា បានឱ្យដឹងទៀតថា ដោយឈរលើមូលដ្ឋាន នៃស្ថានភាពជាក់ស្តែង ដើម្បីធានាដល់ប្រសិទ្ធភាព នៃការគ្រប់គ្រងការឆ្លងរាលដាល នៃជំងឺកូវីដ ១៩ សំដៅការពារសុខភាពសាធារណៈ អាយុជីវិត របស់ប្រជាពលរដ្ឋ សណ្តាប់ធ្នាប់សាធារណៈ ដោយអនុលោមទៅតាមច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ ធ្ងន់ធ្ងរផ្សេងទៀត និងលិខិតបទដ្ឋានគតិយុត្តជាធរមានទើបរដ្ឋបាលខេត្តសម្រេចបើកដំណើរការសាលារៀនឡើងវិញ ៕
