.jpg)
ប្រព័ន្ធ QR Code Stop Covid កម្ពុជាឈ្នះពានរង្វាន់នវានុវត្តន៍ឌីជីថលពីសហភាពទូរគមនាគមន៍អន្តរជាតិ (ITU) និងអង្គការសហប្រជាជាតិ។ក្រសួងក្រសួងប្រៃសណីយ៍ និងទូរគមនាគមន៍
ភ្នំពេញៈ ប្រព័ន្ធ QR Code Stop Covid កម្ពុជាឈ្នះពានរង្វាន់នវានុវត្តន៍ឌីជីថលពីសហភាពទូរគមនាគមន៍អន្តរជាតិ (ITU) និងអង្គការសហប្រជាជាតិ។ ការឈ្នះនេះ កម្ពុជានឹងទទួលបានប្រាក់រង្វាន់ ចំនួន ២០០០០ ដុល្លារអាមេរិក ថែមទាំងទទួលបានការអញ្ជើញចូលរួមក្នុងកម្មវិធីហ្វឹកហ្វឺន ដើម្បីចែកចំណេះដឹង និងបទពិសោធន៍ដល់បណ្តាប្រទេសដទៃទៀត សម្រាប់យកជាគំរូផងដែរ។
ក្រសួងក្រសួងប្រៃសណីយ៍ និងទូរគមនាគមន៍ ប្រកាសនៅរសៀលថ្ងៃទី ៣០ ខែតុលានេះថា ក្នុងថ្ងៃទី ២៩ ខែតុលានេះ ប្រព័ន្ធ QR Code Stop Covid ដែលរៀបចំឡើងដោយក្រសួងប្រៃសណីយ៍ និងទូរគមនាគមន៍ បានទទួលពានរង្វាន់នវានុវត្តន៍ឌីជីថលសកលស្តីពីកូវីដ ១៩ (Global South Covid-19 Digital Innovation Challenge) ពីសហភាពទូរគមនាគមន៍អន្តរជាតិ (ITU) និងការិយាល័យអង្គការសហប្រជាជាតិសម្រាប់កិច្ចសហការភាគខាងត្បូង (UNOSSC) ដែលជាស្ថាប័នរបស់អង្គការសហប្រជាជាតិទទួលបន្ទុកលើវិស័យទូរគមនាគមន៍ និងឌីជីថល។
ក្រសួងបញ្ជាក់ថា៖ «នេះគឺជាលើកទី ១ ដែលព្រះរាជាណាចក្រកម្ពុជាបានឈ្នះពានរង្វាន់កម្រិតពិភពលោកលើវិស័យទូរគមនាគមន៍ និងឌីជីថល ហើយក៏ជាជោគជ័យដ៏អស្ចារ្យ ដែលជាសក្ខីភាពសបញ្ជាក់ឱ្យឃើញថា កម្ពុជាដែលជាប្រទេសកំពុងអភិវឌ្ឍន៍មានសមត្ថភាពគ្រប់គ្រាន់ក្នុងការអភិវឌ្ឍនូវកម្មវិធីឌីជីថល ដែលមានការទទួលស្គាល់ជាលក្ខណៈអន្តរជាតិ» ។
ក្រសួងនេះបានឱ្យដឹងថា កម្មវិធីនវានុវត្តន៍ឌីជីថលសកលស្តីពីកូវីដ ១៩ គឺជាកម្មវិធីប្រកួតប្រជែងនវានុវត្តន៍កម្រិតសកល ផ្តល់ជូនប្រទេសសមាជិក ដែលមានគំនិតច្នៃប្រឌិតក្នុងការបង្កើតដំណោះស្រាយផ្នែកឌីជីថល អនុញ្ញាតឱ្យសហគមន៍ ស្ថាប័ន និងប្រជាពលរដ្ឋរបស់ខ្លួនអាចប្រើប្រាស់ ដើម្បីដោះស្រាយផលប៉ះពាល់ដែលបណ្តាលមកពីការរាតត្បាតនៃជំងឺរាតត្បាតបានទាន់ពេលវេលា។
កម្មវិធីនេះមាន ២៥០ ស្ថាប័ននៅជុំវិញពិភពលោកបានចូលរួមប្រកួត ហើយកម្ពុជាដែលមានក្រសួងប្រៃសណីយ៍ និងទូរគមនាគមន៍ ជាតំណាង ក៏បានយកប្រព័ន្ធ QR Code Stop Covid ដែលត្រូវបានប្រមុខរាជរដ្ឋាភិបាលកម្ពុជាគាំទ្រ និងជំរុញដាក់ឱ្យប្រើប្រាស់ ដើម្បីគ្រប់ស្ថាប័ន អង្គភាព សហគ្រាស ក្រុមហ៊ុន និងប្រជាពលរដ្ឋ អាចប្រើប្រាស់ ដើម្បីចូលរួមទប់ស្កាត់ ការរីករាលដាលជំងឺកូវីដ ១៩ សម្រាប់ការប្រកួតប្រជែងក្នុងកម្មវិធីនេះ។ ប្រព័ន្ធនេះ ក៏បានក្លាយជាប្រព័ន្ធ QR Code បណ្ណចាក់វ៉ាក់សាំង ឌីជីថល Stop QR Code Vaccine ដែលប្រើសម្រាប់ពហុគោលបំណង ទាំងពេលបច្ចុប្បន្ន ក៏ដូចជាអនាគត។
ក្រសួងបានបញ្ជាក់ទៀតថា៖ «ការទទួលបានជយលាភីនេះកម្ពុជានឹងទទួលបានពានរង្វាន់ និងប្រាក់រង្វាន់ចំនួន ២០ ០០០ ដុល្លារអាមេរិក ដើម្បីប្រើប្រាស់ក្នុងការពង្រីកបន្ថែមប្រព័ន្ធឱ្យកាន់តែទូលំទូលាយ ជាពិសេសគឺការទទួលបានការអញ្ជើញចូលរួមក្នុងកម្មវិធី ហ្វឹកហ្វឺន ដែលរៀបចំដោយសហភាពសហព័ន្ធទូរគមនាគមន៍ អន្តរជាតិ ដើម្បីចែកចំណេះដឹង និងបទពិសោធនរបស់កម្ពុជាយើងជូនដល់បណ្តាប្រទេសដទៃទៀត សម្រាប់យកជាគំរូផងដែរ»៕
វីដេអូ៖
