.jpg)
កំណាត់ឈើធ្នង់ដែលសមត្ថកិច្ចរឹបអូសបានពីជនល្មើស។ រូបថត MCFC Page
ឧត្តរមានជ័យ: លោក ហែល ឆេងហុង អ្នកនាំពាក្យសាលាដំបូងខេត្តឧត្តរមានជ័យថ្លែងនៅថ្ងៃទី ៣១ ខែតុលាថា បុរស ២ នាក់ ដែលចូលកាប់ឈើក្នុងព្រៃសង្ឃសហគមន៍រុក្ខាវ័ន ហើយត្រូវបានមន្ត្រីនគរបាលយុត្តិធម៌បញ្ជូនមកតុលាការកាលពីថ្ងៃទី ២៩ ខែតុលា ត្រូវបានចៅក្រមស៊ើបសួរសម្រេចឃុំខ្លួនដាក់ពន្ធនាគារខេត្តឧត្តរមានជ័យ តាមច្បាប់ស្តីពីតំបន់ការពារធម្មជាតិ។
លោកថ្លែងថា៖ «ចៅក្រមស៊ើបសួរសម្រេចឃុំខ្លួន បុរស ២ នាក់ដាក់ពន្ធនាគារខេត្តឧត្តរមានជ័យពាក់ព័ន្ធបទល្មើស កាប់ប្រមូលឈើប្រណីតនៅតំបន់ការពារធម្មជាតិ តាមមាត្រា ៥៦ កថាខណ្ឌទី១ ចំណុចទី៤ និងមាត្រា ៦២ កថាខណ្ឌទី១ ចំណុចទី២ នៃច្បាប់ស្តីពីតំបន់ការពារធម្មជាតិ»។
ព្រះសង្ឃព្រះនាម ថូ ធូរស់ ប្រធានស្តីទីនៃ ព្រៃសង្ឃសហគមន៍រុក្ខាវ័ន បានឱ្យដឹងនៅថ្ងៃទី ៣១ ខែតុលាថា រយៈពេល ១០ ខែ ឆ្នាំ ២០២១ នេះ ឈើប្រណីតប្រភេទធ្នង់ ក្នុងព្រៃសង្ឃសហគមន៍រុក្ខាវ័ន ត្រូវបានកាប់បំផ្លាញអស់ប្រមាណ ៧០០ ដើម។ ប៉ុន្តែ កន្លងមកនេះមិនដែលចាប់បានជនល្មើសឡើយ។
ព្រះសង្ឃបញ្ជាក់ថា ទើបតែនៅថ្ងៃទី ២៨ តុលា កម្លាំងចម្រុះបានពួនស្ទាក់ចាប់បានជនល្មើស ២ នាក់ នៅហ្នឹងកន្លែងរួមជាមួយភ័ស្តុតាងឈើធ្នង់កំពុងស្ពាយ និង ៨ នាក់ទៀតបានរត់គេចខ្លួនបាត់ស្រមោលទាំងយប់ត្រង់ចំណុចខាងត្បូងស្នាក់ការតំបន់ស្នូលចម្ងាយប្រហែលជាង ១ គីឡូម៉ែត្រ ស្ថិតនៅភូមិបាក់នឹម សង្កាត់សំរោង ក្រុងសំរោង ខេត្តឧត្តរមានជ័យ។
ព្រះសង្ឃបានឱ្យដឹងថា ជនល្មើសមានឈ្មោះ ម៉ៅ វន ភេទប្រុស អាយុ ២៧ ឆ្នាំ រស់នៅភូមិបាក់នឹម សង្កាត់សំរោង ក្រុងសំរោង ខេត្តឧត្តរមានជ័យ និងឈ្មោះ សឹង បូឡា ភេទប្រុស អាយុ ៣៨ ឆ្នាំ រស់នៅភូមិគិរីវ័ន្ត សង្កាត់កូនក្រៀល ក្រុងសំរោង ខេត្តឧត្តរមានជ័យ។ ចំណែកវត្ថុតាងមានឈើប្រណីតប្រភេទធ្នង់ចំនួន ១៣ ដុំ។
ព្រះអង្គបានឱ្យដឹងថា៖ «មនុស្សហ្នឹងត្រូបានបញ្ជូនទៅស្នងការនៅថ្ងៃទី ២៩ ខែតុលា នៅពេលព្រឹក និងនៅរសៀលថ្ងៃដដែលសមត្ថកិច្ចបានបញ្ជូនទៅតុលាការ ចាត់ការតាមច្បាប់។ ហើយខាងស្នងការលោកកំពុងស៊ើបអង្កេតរឿងហ្នឹង ដើម្បីស្វែងរកអ្នកពាក់ព័ន្ធផ្សេងទៀត»។
ព្រះសង្ឃក៏បានអំពាវនាវឱ្យបញ្ឈប់ការធ្វើសកម្មភាពកាប់បំផ្លាញ ឬចូលលួចផ្លែឈើនៅក្នុងព្រៃសង្ឃសហគមន៍រុក្ខាវ័នបន្តទៀត និងសំណូមពរដល់មន្ត្រីមានសមត្ថកិច្ចអនុវត្តតាមច្បាប់ដែលមានជាធរមាន៕
