.jpg)
លោកនាយករដ្ឋមន្ត្រី ហ៊ុន សែន ក្នុងពិធីនៅថ្ងៃទី ១ វិច្ឆិកា ឆ្នាំ ២០២១។ រូបថត SPM
ភ្នំពេញៈ ប្រមុខរាជរដ្ឋាភិបាលកម្ពុជា បានប្រកាសបើកប្រទេសឡើងវិញលើគ្រប់វិស័យ ចាប់ពីថ្ងៃទី ០១ ខែ វិច្ឆិកា ឆ្នាំ ២០២១ នេះតទៅ ស្របពេលដែលគ្រប់គ្រឹះស្ថានសិក្សាសាធារណៈ និងឯកជនទាំងអស់ បានបើកដំណើរការនៅថ្ងៃជាមួយគ្នានេះដែរ។
លោកនាយករដ្ឋមន្ត្រី ហ៊ុន សែន បានថ្លែងនាព្រឹកថ្ងៃទី ០១ ខែវិច្ឆិកានេះ ក្នុងពិធីប្រកាសបិទយុទ្ធនាការចាក់វ៉ាក់សាំងដល់ពលរដ្ឋដែលមានអាយុចាប់ពី ០៦ ឆ្នាំឡើង និងប្រកាសបើកយុទ្ធនាការ ចាក់វ៉ាក់សាំងកូវីដ ១៩ ដល់កុមារអាយុ ០៥ ឆ្នាំ។
លោកមានប្រសាសន៍ថា៖ «នៅពេលនេះ ថ្ងៃនេះ យើងក៏ដូចជាចាប់ផ្តើមនូវការបើកប្រទេសឡើងវិញ បើទោះបីថាយុទ្ធសាស្ត្រទាក់ទងនឹងការរៀបចំដំណើរការនៃការបើកប្រទេសនេះ ត្រូវបានទាក់ទិនជាមួយនឹងការអភិវឌ្ឍសង្គមរបស់យើង យើងនឹងដាក់បន្ថែមនៅពេលក្រោយ»។
លោកនាយករដ្ឋមន្ត្រីបានបញ្ជាក់ទៀតថា កម្ពុជាបានធ្វើការសាកល្បងរួចមកហើយ កាលពីក្នុងពិធីបុណ្យភ្ជុំបិណ្ឌ ទាក់ទិននឹងការសាកល្បងដ៏ធំ ហើយបន្ទាប់ពីការសាកល្បងនេះ ក៏អាចឱ្យមានការវាយតម្លៃបាន ថាតើគួរតែទៅមុខឬទៅក្រោយ។
លោកមានប្រសាសន៍ថា៖ «នៅក្នុងបញ្ហានេះ យើងបានកំណត់តាំងពីដើមទីថា នៅពេលដែលមានវ៉ាក់សាំង យើងកំណត់ការចាក់វ៉ាក់សាំង គឺជាគន្លឹះសំខាន់ បន្ទាប់ពីវិធានការដែលយើងបានធ្វើកន្លងទៅ គឺការរុករក ការធ្វើតេស្ត ការធ្វើចត្តាឡីស័ក និងការព្យាបាល»៕
វីដេអូ៖
