.jpg)
ជនសង្ស័យជួញដូរគ្រឿងញៀនត្រូវបានសមត្ថកិច្ចឃាត់ខ្លួន។ រូប នគរបាល
កំពង់ចាមៈ នគរបាលប្រឆាំងគ្រឿងញៀនបានបញ្ជូនបុរសសង្ស័យ ៣ នាក់ ទៅសាលាដំបូងខេត្តកំពង់ចាមនៅរសៀលថ្ងៃទី ៣១ តុលា ពាក់ព័ន្ធករណីជួញដូរគ្រឿងញៀនមេតំហ្វេតាមីនជាង ២ គីឡូក្រាម ប្រព្រឹត្តនៅក្រុង-ខេត្តកំពង់ចាម។
លោក ជីវ សេងរស់ ស្នងការរងទទួលការងារផែននគរបាលប្រឆាំងគ្រឿងញៀននៃស្នងការដ្ឋាននគរបាលខេត្តកំពង់ចាម ប្រាប់ ភ្នំពេញ ប៉ុស្តិ៍ នៅថ្ងៃទី ៣១ តុលាថា ជនសង្ស័យទី១- ឈ្មោះ ស៊ាត សីហា ភេទប្រុស អាយុ ៣២ ឆ្នាំ មានរបរបោកអ៊ុត រស់នៅភូមិយាងថ្មី សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ទី២- ឈ្មោះ ប៊ុត សំអុល ភេទប្រុស អាយុ ៣៥ ឆ្នាំមានរបរជាកសិកររស់នៅភូមិ រោងចក្រ សង្កាត់បយ៉ាខា ក្រុងប៉ៃលិន និងទី៣- ឈ្មោះ សឿង សុខលី ភេទប្រុស អាយុ ៣៧ ឆ្នាំជាជាងកាត់សក់ រស់នៅភូមិ អូរច្រាំង សង្កាត់-ក្រុង-ខេត្តប៉ៃលិន។ លោកថ្លែងថា៖ «ករណីជនសង្ស័យទាំង ៣ នាក់ គឺយើងបញ្ចប់នីតិវិធីសាកសួរហើយ។ ថ្ងៃនេះ (ថ្ងៃទី ៣១ តុលា) យើងបញ្ជូនបន្តទៅតុលាការ»។
លោក សេង រស់ ឱ្យដឹងថា ការបង្ក្រាបបទល្មើសគ្រឿងញៀននេះ គឺធ្វើឡើងកាលពីថ្ងៃទី ៣០ តុលា ឆ្នាំ ២០២១ ដឹកនាំដោយលោកឧត្តមសេនីយ៍ទោ សាន សុទ្ធី នាយករង ទទួលផែនការិយាល័យប្រឆាំងការសម្អាតប្រាក់ (ក៥) នៃមន្ទីរប្រឆាំងគ្រឿងញៀន សហការជាមួយស្នងការដ្ឋាននគរបាលខេត្តកំពង់ចាម និងមានការសម្របសម្រួលផ្លូវច្បាប់ពីលោក ហាក់ ហ៊ាន់ ព្រះរាជអាជ្ញារងអមសាលាដំបូង ខេត្តកំពង់ចាម។
លោកបន្តថា ការបង្រា្កបបទល្មើសគ្រឿងញៀននេះដែរកម្លាំងនគរបាលមន្ទីរប្រឆាំងគ្រឿងញៀនបានប្រើវិធានញុះញង់ ដោយអូសទាញក្រុមជនសង្ស័យពីខេត្តបាត់ដំបងឱ្យមកលក់ថ្នាំញៀននៅខេត្តកំពង់ចាម។ ចំពោះគ្រឿងញៀនដែលដកហូតបានពីក្រុមជនសង្ស័យ មានម្សៅក្រាមពណ៌ប្រភេទមេតំហ្វេតាមីន ២ កញ្ចប់ធំ ស្មើទម្ងន់ ២ ០៦៩,២៧ ក្រាម (ទាំងសម្បក ) រថយន្តម៉ាកកាមរីបាឡែនពណ៌ខ្មៅ ១ គ្រឿង ពាក់ស្លាកលេខប៉ៃលិន 2A-2069 និងទូរស័ព្ទដៃ ៣ គ្រឿង៕
